ಬಿಬಿಎಂಪಿ ವಾರ್ಡ್ ಮರು ವಿಂಗಡಣೆ: ರಾಜ್ಯ ಸರ್ಕಾರದಿಂದ ಅಂತಿಮ ಆದೇಶ

ಬಿಬಿಎಂಪಿ ವಾರ್ಡ್ ಮರು ವಿಂಗಡಣೆ ಮಾಡಲಾಗಿದ್ದು, ರಾಜ್ಯ ಸರ್ಕಾರ ಅಂತಿಮ ಆದೇಶ ಹೊರಬಿದ್ದಿದೆ.

ಬೆಂಗಳೂರು: ಬಿಬಿಎಂಪಿ ವಾರ್ಡ್ ಮರು ವಿಂಗಡಣೆ ಮಾಡಿ ರಾಜ್ಯ ಸರ್ಕಾರ ಅಂತಿಮ ಆದೇಶ ಪ್ರಕಟಿಸಿದೆ. ಮಹಾನಗರ ವ್ಯಾಪ್ತಿಯಲ್ಲಿದ್ದ 198 ವಾರ್ಡ್​​ಗಳನ್ನು ಡಿ ಲಿಮಿಟೇಷನ್ ಮಾಡಿ‌ 243 ವಾರ್ಡ್​ಗಳಾಗಿ ವಿಂಗಡಿಸಲಾಗಿದೆ.

ರಾಜ್ಯ ಸರ್ಕಾರ ಬಿಬಿಎಂಪಿ ಆಯುಕ್ತರು, ಬೆಂಗಳೂರು ನಗರ ಜಿಲ್ಲಾಧಿಕಾರಿ, ಬೆಂಗಳೂರು ಅಭಿವೃದ್ಧಿ ಮಂಡಳಿ ಹಾಗೂ ಬಿಬಿಎಂಪಿ ಕಂದಾಯ ವಿಭಾಗದ ವಿಶೇಷ ಆಯುಕ್ತರ ನೇತೃತ್ವದಲ್ಲಿ 2021ರ ಜನವರಿಯಲ್ಲಿ ವಾರ್ಡ್‌ಗಳ ಪುನರ್ ವಿಂಗಡಣಾ ಸಮಿತಿ ರಚನೆ ಮಾಡಿ 198 ವಾರ್ಡ್‌ಗಳನ್ನು 243 ವಾರ್ಡ್‌ಗಳಾಗಿ ಮರು ವಿಂಗಡಿಸಿ ವರದಿ ನೀಡುವಂತೆ ಸೂಚಿಸಿತ್ತು. ಸಮಿತಿ ಕಳೆದ ಜೂನ್ 9ರಂದು ಸರ್ಕಾರಕ್ಕೆ ವರದಿ ಸಲ್ಲಿಸಿದ್ದು, ಕರಡು ವರದಿ ಒಪ್ಪಿರುವ ರಾಜ್ಯ ಸರ್ಕಾರ ವಾರ್ಡ್ ಮರು ವಿಂಗಡಣೆ ಸಂಬಂಧಿಸಿದಂತೆ ಜೂನ್ 23ರಂದು ಕರಡು ವರದಿ ಪ್ರಕಟಿಸಿ 15 ದಿನದಲ್ಲಿ ಸಾರ್ವಜನಿಕ ಆಕ್ಷೇಪಣೆ ಸಲ್ಲಿಸುವಂತೆ ಸೂಚಿಸಿತ್ತು.

ಬಿಬಿಎಂಪಿ ವಾರ್ಡ್ ಮರು ವಿಂಗಡಣೆ ಆದೇಶ

ನಂತರ ಸಲ್ಲಿಕೆಯಾದ 3,833 ಆಕ್ಷೇಪಣೆಗಳನ್ನು ಪರಿಶೀಲಿಸಲು ನಗರಾಭಿವೃದ್ಧಿ ಇಲಾಖೆಯ ಅಪರ ಮುಖ್ಯ ಕಾರ್ಯದರ್ಶಿ ನೇತೃತ್ವದಲ್ಲಿ ಸಮಿತಿ ರಚನೆಯಾಗಿತ್ತು. ಅದರಂತೆ ಅಪರ ಮುಖ್ಯ ಕಾರ್ಯದರ್ಶಿಗಳು ಜುಲೈ 11 ಮತ್ತು 12ರಂದು ಸಭೆ ನಡೆಸಿ ಆಕ್ಷೇಪಣೆಗಳನ್ನು ಕೂಲಂಕಷವಾಗಿ ಪರಿಶೀಲಿಸಿ ರಾಜ್ಯ ಸರ್ಕಾರಕ್ಕೆ ಶಿಫಾರಸ್ಸು ಮಾಡಿದ ವರದಿಯನ್ನು ಒಪ್ಪಿಕೊಂಡು ರಾಜ್ಯ ಸರ್ಕಾರ, ಕರ್ನಾಟಕ ರಾಜ್ಯ ಪತ್ರದ ಮೂಲಕ ಅಂತಿಮ ಅಧಿಸೂಚನೆ ಹೊರಡಿಸಿದೆ.

ಅಂತಿಮ ವರದಿಯಲ್ಲಿ ಬದಲಾದ ವಾರ್ಡ್‌ಗಳ ಹೆಸರು:

ವಾರ್ಡ್ ಸಂಖ್ಯೆ	ಅಂತಿಮ ವರದಿಯ ಹೆಸರು	ಕರಡು ವರದಿಯ ಹೆಸರು
28	ದೊಡ್ಡ ಬಿದರಕಲ್ಲು	ಹಂದ್ರಹಳ್ಳಿ
55	ಪುನೀತ್ ರಾಜ್​ಕುಮಾರ್ ನಗರ	ಕಾವೇರಿ ನಗರ
33	ಕೆಂಗೇರಿ	ಕೆಂಗೇರಿ ಉಪನಗರ
35	ಹೆಮ್ಮಿಗೆಪುರ	ತಲಘಟ್ಟಪುರ
36	ಛತ್ರಪತಿ ಶಿವಾಜಿ	ಕನ್ನೇಶ್ವರ ರಾಮ
37	ಚಾಣಕ್ಯ	ವೀರಮದಕರಿ
39	ಕನ್ನೇಶ್ವರ ರಾಮ	ಚಾಣಕ್ಯ
40	ವೀರಮದಕರಿ	ಛತ್ರಪತಿ ಶಿವಾಜಿ
69	ಮನೋರಾಯನಪಾಳ್ಯ	ಚೋಳನಗರ
77	ದೇವರಜೀವನಹಳ್ಳಿ	ಮೋದಿ ಗಾರ್ಡನ್
84	ರಾಮಮೂರ್ತಿ ನಗರ	ಕೌದೆಕೆನಹಳ್ಳಿ
85	ವಿಜಿನಾಪುರ	ವಿಜ್ಞಾನಪುರ
87	ಮೇಡಹಳ್ಳಿ	ತಂಬುಚಟ್ಟಿ ಪಾಳ್ಯ
93	ಹೆಚ್‌ಎಎಲ್	ವಿಮಾನ ನಿಲ್ದಾಣ
95	ನಾಗವಾರ	ಗೋವಿಂದನಪುರ
153	ನಾಗರಬಾವಿ	ಕಲ್ಯಾಣ ನಗರ
154	ಚಂದ್ರಲೇಔಟ್	ನಾಗರಬಾವಿ
180	ಅಗರ	ವನ್ನಾರ್‌ಪೇಟೆ
183	ನೀಲಸಂದ್ರ	ಆಸ್ಟಿನ್‌ಟೌನ್
184	ವನ್ನಾರ್‌ಪೇಟೆ	ನೀಲಸಂದ್ರ
220	ಯಲಚೇನಹಳ್ಳಿ	ಕನಕನಗರ
221	ಕೋಣನಕುಂಟೆ	ಯಲಚೇನಹಳ್ಳಿ
232	ಹೆಚ್‌ಎಸ್‌ಆರ್ ಸಿಂಗಸಂದ್ರ	ಹೆಚ್‌ಎಸ್‌ಆರ್ ಲೇಔಟ್
241	ಪುಟ್ಟೇನಹಳ್ಳಿ ಸಾರಕ್ಕಿ ಕೆರೆ	ಸಾರಕ್ಕಿ ಕೆರೆ

ಇದನ್ನೂ ಓದಿ:ಪಿಎಸ್​ಐ ಪರೀಕ್ಷಾ ಅಕ್ರಮ ಕೊಲೆಯಂತಹ ಅಪರಾಧಕ್ಕಿಂತಲೂ ಹೇಯ ಕೃತ್ಯ: ಹೈಕೋರ್ಟ್