ರೈಲ್ವೆ ಕ್ರಾಸಿಂಗ್ ಗೇಟ್ ತೆರೆದಾಗಲೇ ಹಾದು ಹೋದ ಗೂಡ್ಸ್ ರೈಲು: ಸ್ವಲ್ಪದರಲ್ಲೇ ತಪ್ಪಿದ ದುರಂತ

ರೈಲ್ವೆ ಕ್ರಾಸಿಂಗ್​ನಲ್ಲಿ ಗೇಟ್​ಮ್ಯಾನ್ ಇರದ ಕಾರಣ ಗೇಟ್ ತೆರೆದಿದ್ದ ವೇಳೆ ಗೂಡ್ಸ್ ರೈಲು ಹಾದು ಹೋಗಿದೆ. ಭಾನುವಾರವಾದ ಕಾರಣದಿಂದಾಗಿ ಗೇಟ್​ಮ್ಯಾನ್ ರಜೆಯಲ್ಲಿದ್ದ ಎನ್ನಲಾಗಿದೆ. ಆದರೆ ಸಿಬ್ಬಂದಿ ವಿರುದ್ಧ ವಾಹನ ಸವಾರರು ಆಕ್ರೋಶ ಹೊರಹಾಕಿದ್ದಾರೆ.

ಯಲಹಂಕ (ಬೆಂಗಳೂರು): ಯಲಹಂಕ-ದೇವನಹಳ್ಳಿ ಮಾರ್ಗದಲ್ಲಿ ರೈಲ್ವೆ ಗೇಟ್ ಹಾಕದೆ ಗೂಡ್ಸ್ ರೈಲು ಹಾದು ಹೋಗಿದ್ದು, ರೈಲ್ವೆ ಸಿಬ್ಬಂದಿ ನಿರ್ಲಕ್ಷ್ಯಕ್ಕೆ ವಾಹನ ಸವಾರರು ಅಕ್ರೋಶ ಹೊರಹಾಕಿದ್ದಾರೆ.

ಯಲಹಂಕ- ದೇವನಹಳ್ಳಿ ರೈಲ್ವೆ ಮಾರ್ಗದ ಗಂಟಿಗಾನಹಳ್ಳಿ ಬಳಿಯ ನಿಟ್ಟೆ ಕಾಲೇಜು ರೈಲ್ವೆ ಕ್ರಾಸ್ ಬಳಿ ರೈಲ್ವೆ ಗೇಟ್ ಅನ್ನು ಹಾಕದೆ ಹಾಗೆಯೇ ಬಿಡಲಾಗಿತ್ತು. ಅದೃಷ್ಟವಶಾತ್, ರೈಲು ಬರುವಾಗ ಹಳಿಯ ಮೇಲೆ ವಾಹನ ಸವಾರರು ಇರದ ಕಾರಣ ಯಾವುದೇ ಹಾನಿ ಸಂಭವಿಸಿಲ್ಲ.

ರೈಲ್ವೆ ಕ್ರಾಸಿಂಗ್​ನಲ್ಲಿ ಯಾವೊಬ್ಬ ಸಿಬ್ಬಂದಿ ಇರದೇ ಬೀಗಹಾಕಲಾಗಿತ್ತು. ಈ ವೇಳೆ ಬಂದ ಗೂಡ್ಸ್ ರೈಲು ಹಾದು ಹೋಗಿದೆ. ಬಳಿಕ ಗೂಡ್ಸ್ ರೈಲಿನಲ್ಲಿದ್ದ ಸಿಬ್ಬಂದಿ ಕೆಳಗಿಳಿದು ಬಂದು ಕ್ರಾಸಿಂಗ್ ವೇಳೆ ರಸ್ತೆಯಲ್ಲಿ ನಿಂತಿದ್ದಾನೆ.

ಇದೇ ವೇಳೆ ರೈಲು ನಿಲ್ಲಿಸಲಾಗಿದ್ದು ಕೆಲಸಮಯದ ಬಳಿಕ ಮತ್ತೆ ರೈಲು ಅಲ್ಲಿಂದ ತೆರಳಿದೆ. ಗೇಟ್​​ ಮ್ಯಾನ್ ಇಂದು ರಜೆಯಲ್ಲಿದ್ದ ಕಾರಣ ಈ ಅವಘಡ ನಡೆದಿದೆ ಎನ್ನಲಾಗಿದೆ.

ಇದನ್ನೂ ಓದಿ:ಬೆಂಗಳೂರಿನಲ್ಲಿ ಮಾರಕಾಸ್ತ್ರಗಳಿಂದ ಕೊಚ್ಚಿ ರೌಡಿಶೀಟರ್ ಹತ್ಯೆ