ಬೆಂಗಳೂರು: ಕೆಲಸ ಕೊಡಿಸುವುದಾಗಿ ನಂಬಿಸಿ ನಿವೃತ್ತ ಯೋಧನಿಗೆ ವಂಚನೆ

ಉದ್ಯೋಗದ ಹೆಸರಿನಲ್ಲಿ ನಿವೃತ್ತ ಯೋಧರಿಗೆ ವಂಚನೆ ಎಸಗಿರುವ ಘಟನೆ ನಗರದಲ್ಲಿ ನಡೆದಿದೆ.

ಬೆಂಗಳೂರು: ರೈಲ್ವೆ ಇಲಾಖೆ ಹಾಗು ಸಿಆರ್​ಪಿಎಫ್​ನಲ್ಲಿ ಕೆಲಸ ಕೊಡಿಸುವುದಾಗಿ ನಂಬಿಸಿ ನಿವೃತ್ತ ಯೋಧನಿಗೆ ವಂಚನೆ ಮಾಡಿರುವ ಪ್ರಕರಣ ನಗರದಲ್ಲಿ ಬೆಳಕಿಗೆ ಬಂದಿದೆ. ಗೋಪಾಲ್ ಎಂಬ ನಿವೃತ್ತ ಯೋಧ ಸೇರಿ 9 ಜನರಿಗೆ ಸುಮಾರು 28 ಲಕ್ಷ ರೂಪಾಯಿವರೆಗೂ ವಂಚನೆಯಾಗಿದೆ. ತನಗೆ ಕೇಂದ್ರ ಹಾಗು ರಾಜ್ಯ ಸಚಿವರು ಆಪ್ತರು. ಅವರಿಂದ ನೇರವಾಗಿ ನೇಮಕಾತಿ ಮಾಡಿಸುತ್ತೇನೆಂದು ನಂಬಿಸಿ ಆರೋಪಿ ವಂಚಿಸಿದ್ದಾನೆ ಎನ್ನಲಾಗ್ತಿದೆ.

ಗೋಪಾಲ್ ಅವರು ಸೇನೆಯಿಂದ ನಿವೃತ್ತರಾದ ಬಳಿಕ ಆಲ್ ಇಂಡಿಯಾ ಇನ್ಸ್​ಟಿಟ್ಯೂಟ್ ಆಫ್ ಪ್ರೊಫೆಷನ್ ಟ್ರೈನಿಂಗ್ ಮ್ಯಾನೇಜರ್ ಆಗಿದ್ದ ವೇಳೆ ಶ್ರೇಯಾಂಶ್ ಬೋಗಾರ್ ಎಂಬಾತ ಪರಿಚಯವಾಗಿದ್ದ. ನಂತರ ತನಗೆ ಗಣ್ಯರು, ಪ್ರಭಾವಿಗಳ ಪರಿಚಯವಿದೆ. ಅವರಿಂದಲೇ ಕೆಲಸ ಕೊಡಿಸುತ್ತೇನೆ. ಆದ್ರೆ ಪೋಸ್ಟಿಂಗ್​ಗೆ 9 ಲಕ್ಷ ರೂಪಾಯಿ ಖರ್ಚಾಗುತ್ತೆ ಎಂದು ಹೇಳಿದ್ದನಂತೆ. ಇದನ್ನು ನಂಬಿದ ಗೋಪಾಲ್ ಅವರು ತನ್ನ ಸ್ನೇಹಿತರಿಗೂ ಕೆಲಸ ಸಿಗಲಿ ಎಂಬ ಕಾರಣಕ್ಕೆ ಅವರಿಗೂ ಶ್ರೇಯಸ್ ಬೋಗಾರ್​ನನ್ನು ಪರಿಚಯ ಮಾಡಿಸಿದ್ರು.

ಕೆಲ ದಿನಗಳ ಬಳಿಕ ಹಣ ನೀಡಲು ಶ್ರೇಯಾಂಶ್ ಬೋಗಾರ್​ಗೆ ಕರೆ ಮಾಡಿದಾಗ ಆತ ಅಶೋಕ್ ಹೋಟೆಲ್​ಗೆ ಬರಲು ಹೇಳಿದ್ದ. ಅಲ್ಲಿ ಮಾತುಕತೆ ನಡೆದು ಗೋಪಾಲ್ ಹಾಗು ಅವರ ಸ್ನೇಹಿತರು ಹಣ ನೀಡಿ ಹೊರಟು ಹೋಗಿದ್ದರು. ಹಣ ನೀಡಿ ತಿಂಗಳುಗಳೇ ಕಳೆದರೂ ಯಾವುದೇ ಹುದ್ದೆಯ ಬಗ್ಗೆ ಮಾಹಿತಿ ಸಿಗಲಿಲ್ಲ. ಮತ್ತೆ ಶ್ರೇಯಾಂಶ್ ಬೋಗಾರ್​ಗೆ ಕರೆ ಮಾಡಿದಾಗ ನೇರವಾಗಿ ನೇಮಕಾತಿ‌ ಮಾಡಿಸುತ್ತೇನೆ ಎಂದೇ ಕಾಲ ಕಳೆಯುತ್ತಿದ್ದನಂತೆ.

ಆತನ ನಡೆ ಬಗ್ಗೆ ಅನುಮಾನಗೊಂಡ ಗೋಪಾಲ್ ಅವರು ಹಣ ವಾಪಸ್ ಕೇಳಿದ್ದಾರೆ. ಈ ವೇಳೆ ಶ್ರೇಯಾಂಶ್ ಉಳಿದ ಆರೋಪಿಗಳಾದ ಅಜಿತ್, ಅರುಣ್ ಹಾಗು ವಿಠಲ್ ಜೊತೆ ಸೇರಿ ಜೀವ ಬೆದರಿಕೆ ಹಾಕಿದ್ದ ಎನ್ನುವ ಆರೋಪವಿದೆ. ಈ ಸಂಬಂಧ ಗೋಪಾಲ್ ಅವರು ಹೈಗ್ರೌಂಡ್ಸ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಇದನ್ನೂ ಓದಿ:ಸ್ಮಶಾನಕ್ಕೆ ತೆರಳಲು ಮಳೆ ಅಡ್ಡಿ.. ಗ್ರಾ ಪಂ ಕಚೇರಿ ಮುಂದೆ ಶವ ಹೂತ ಗ್ರಾಮಸ್ಥರು!