ಅಕ್ಟೋಬರ್ 2, ಮಹಾತ್ಮ ಗಾಂಧೀಜಿ ಅವರ 150 ನೇ ಜನ್ಮದಿನ. ಇಡೀ ರಾಷ್ಟ್ರವೇ ಬಾಪೂಜಿಯ 150 ನೇ ಜನ್ಮದಿನವನ್ನು ಆಚರಿಸಲು ಸಕಲ ಸಿದ್ಧತೆಗಳನ್ನು ಮಾಡಿಕೊಂಡು ನಾಳೆಗಾಗಿ ಎದುರು ನೋಡುತ್ತಿದೆ. ಇದೇ ವೇಳೆ ಈ ಟಿವಿ ಭಾರತ್ ಮಹಾತ್ಮನ ಜನ್ಮದಿನವನ್ನು ವಿಭಿನ್ನ ಹಾಗೂ ವಿಶೇಷವಾಗಿ ಆಚರಿಸುತ್ತಿದೆ. ಗಾಂಧೀಜಿ ಅತ್ಯಂತ ಹೆಚ್ಚು ಇಷ್ಟಪಡುತ್ತಿದ್ದ ವೈಷ್ಣವ್ ಜನತೋ ತೇನೆ ರೆ ಕಹಿಯೇ ಹಾಡನ್ನು ಈಟಿವಿ ಭಾರತ ನೇತೃತ್ವದಲ್ಲಿ ದೇಶದ ಮಹಾನ್ ಗಾಯಕರು ಹಾಡಿದ್ದಾರೆ. ಅವರ ಸಿರಿಕಂಠದಲ್ಲಿ ಮೂಡಿ ಬಂದಿರುವ ಈ ಸುಂದರ ಹಾಡನ್ನು ರಾಮೋಜಿ ಸಮೂಹ ಸಂಸ್ಥೆಗಳ ಅಧ್ಯಕ್ಷರಾದ ರಾಮೋಜಿ ರಾವ್ ಲೋಕಾರ್ಪಣೆಗೊಳಿಸಿದ್ರು.
ಗಾಂಧಿ ವಿಶೇಷ ಹಾಡು ರಿಲೀಸ್ ಗಾಂಧೀಜಿ 150ನೇ ಜನ್ಮ ಜಯಂತಿ ಪ್ರಯುಕ್ತ ಕಳೆದ 40 ದಿನಗಳಿಂದ ಈಟಿವಿ ಭಾರತ ವಿಶೇಷ ಮಹತ್ವಪೂರ್ಣ ಲೇಖನ ಸರಣಿಗಳನ್ನು ಪ್ರಕಟಿಸುತ್ತಾ ಬಂದಿದೆ.
ವೈಷ್ಣವ್ ಜನತೋ ತೇನೆ ರೆ ಕಹಿಯೇ, ಗಾಂಧೀಜಿ ಬಹಳವಾಗಿ ಇಷ್ಟಪಡುತ್ತಿದ್ದ ಭಜನೆ. 15ನೇ ಶತಮಾನದ ಗುಜರಾತಿನ ಕವಿ ನರಸಿನ್ಹ ಮೆಹ್ತಾ ರಚಿಸಿದ ಈ ಗೀತೆಯಲ್ಲಿ ವೈಷ್ಣವ ಜೀವನ ಮತ್ತು ಆದರ್ಶಗಳನ್ನು ಬಹಳ ಅರ್ಥಪೂರ್ಣವಾಗಿ ಹೇಳಲಾಗಿದೆ. ಈ ಗೀತೆಯಿಂದ ಪ್ರಭಾವಿತರಾದ ಮಹಾತ್ಮ ಗಾಂಧೀಜಿ ಕೂಡಾ ತಮ್ಮ ಜೀವನದಲ್ಲಿ ಸರಳತೆ, ಭಕ್ತಿ, ನಿರ್ಭೀತತೆ ಹಾಗೂ ಇನ್ನಿತರ ಅಂಶಗಳನ್ನು ಅಳವಡಿಸಿಕೊಂಡಿದ್ದರು. ಸಬರಮತಿ ಆಶ್ರಮದಲ್ಲಿ ಈ ಹಾಡನ್ನು ದೇಶಭಕ್ತಿಯ ಸಂಕೇತವಾಗಿ ಪ್ರತಿದಿನ ಹಾಡಲಾಗುತ್ತಿತ್ತು. ಇದು ವಿಭಿನ್ನ ಜಾತಿ, ವರ್ಗಗಳ ಜನರು ಒಟ್ಟಿಗೆ ಸೇರಿಸಲು ಕೂಡಾ ಸಹಾಯಕವಾಗಿತ್ತು. ದೇಶದ ವಿವಿಧ ಆಚಾರ, ವಿಚಾರ, ಸಂಸ್ಕೃತಿ, ಸಂಪ್ರದಾಯಗಳನ್ನು ಪ್ರತಿಬಿಂಬಿಸುವ ಡಿಜಿಟಲ್ ಮಾಧ್ಯಮವಾದ ಈಟಿವಿ ಭಾರತ ನರಸಿನ್ಹ ಮೆಹ್ತಾ ಅವರ ಈ ಸುಂದರ ಗೀತೆಯನ್ನು ಪ್ರಸ್ತುತಪಡಿಸುವ ಮೂಲಕ ನಾಳಿನ ಕಾರ್ಯಕ್ರಮವನ್ನು ವಿಶೇಷವಾಗಿ ಆಚರಿಸುತ್ತಿದೆ. ಈ ಹಾಡಿನ ಮೂಲಕ ದೇಶದ ಅತ್ಯುತ್ತಮ ಗಾಯಕರನ್ನು ಈ ಒಂದು ವಿಶೇಷ ಗೀತೆಯಲ್ಲಿ ತೋರಿಸುವ ಪ್ರಯತ್ನ ಮಾಡಲಾಗಿದೆ. ಈ ಗೀತೆಯನ್ನು ಒಮ್ಮೆ ಕೇಳಿದರೆ ನಿಜವಾಗಿಯೂ ಎಂತವರಲ್ಲೂ ದೇಶಭಕ್ತಿ ಉಂಟಾಗುವುದರಲ್ಲಿ ಅನುಮಾನವೇ ಇಲ್ಲ.
ತಮಿಳು ಭಾಷೆಯಲ್ಲಿ ಪಿ. ಉನ್ನಿಕೃಷ್ಣನ್, ತೆಲುಗು-ಎಸ್.ಪಿ.ಬಾಲಸುಬ್ರಹ್ಮಣ್ಯಂ, ಕನ್ನಡ-ಆರ್. ವಿಜಯ್ ಪ್ರಕಾಶ್, ಗುಜರಾತಿ-ಯೋಗೇಶ್ ಗಾದವಿ, ಅಸ್ಸಾಮಿ-ಪುಲಕ್ ಬ್ಯಾನರ್ಜಿ, ಮರಾಠಿ-ವೈಶಾಲಿ ಮದೆ, ಮಲಯಾಳಂ-ಕೆ.ಎಸ್ ಚಿತ್ರ, ಪಂಜಾಬಿ-ಶಂಕರ್ ಸಹ್ನೈ, ಬೆಂಗಾಳಿ-ಹೈಮಂತಿ ಶುಕ್ಲಾ, ಒಡಿಶಾ-ಸುಭಾಷ್ ಚಂದ್ರ ದಾಸ್, ಹಿಂದಿ-ಚನ್ನು ಲಾಲ್ ಮಿಶ್ರ ಹಾಗೂ ಸಲಾಮತ್ ಖಾನ್, ಹೀಗೆ ಆಯಾ ಭಾಷೆಗಳಲ್ಲಿ ಖ್ಯಾತರಾದ ಗಾಯಕರು ಈ ಹಾಡಿಗೆ ದನಿಯಾಗಿದ್ದಾರೆ. ಖ್ಯಾತ ಸಂಗೀತ ನಿರ್ದೇಶಕ ವಸುರಾವ್ ಸಲುರಿ ಈ ಹಾಡಿಗೆ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಅಜಿತ್ ನಾಗ್ ಈ ಹಾಡಿಗೆ ನಿರ್ದೇಶನ ಮಾಡಿದ್ದಾರೆ. ಭಾರತದ ಬಹುತೇಕ ಎಲ್ಲಾ ರಾಜ್ಯಗಳಲ್ಲೂ ಈ ಹಾಡನ್ನು ಚಿತ್ರೀಕರಿಸಲಾಗಿದ್ದು ಈ ಮೂಲಕ ಸಂಸ್ಕೃತಿ ಹಾಗೂ ಸಂಪ್ರದಾಯದ ಶ್ರೀಮಂತಿಕೆಯನ್ನು ಹಾಡಿನಲ್ಲಿ ತೋರಿಸಲಾಗಿದೆ.
