ಸಿಲಿಕಾನ್​ ಸಿಟಿಯಲ್ಲಿ ರಸ್ತೆಗಿಳಿಯಲು ಸಜ್ಜಾಗಿವೆ ಇ-ಬಸ್​: ಸರ್ಕಾರದ ಅನುಮತಿಯೊಂದೇ ಬಾಕಿ

ಕೇಂದ್ರ ಸರ್ಕಾರದ ಫೇಮ್​ ಸ್ಕೀಮ್​ 2 ಯೋಜನೆ ಅಡಿಯಲ್ಲಿ 300 ಎಲೆಕ್ಟ್ರಾನಿಕ್ ಬಸ್​ಗಳು ಬೆಂಗಳೂರು ಮಹಾನಗರ ವ್ಯಾಪ್ತಿಯಲ್ಲಿ ಸಂಚರಿಸಲಿವೆ. ಇದರಿಂದ ನಗರದ ವಾಯುಮಾಲಿನ್ಯ ತಡೆಗಟ್ಟಬಹುದು ಎನ್ನುತ್ತಾರೆ ಬಿಎಂಟಿಸಿ ವ್ಯವಸ್ಥಾಪಕ ನಿರ್ದೇಶಕ ಎನ್​.ವಿ. ಪ್ರಸಾದ್.

ಬೆಂಗಳೂರು: ದಿನೇ ದಿನೇ ಹೆಚ್ಚುತ್ತಿರುವ ರಾಜಧಾನಿಯಲ್ಲಿನ ಪ್ರಯಾಣಿಕರ ಸಂಖ್ಯೆ, ನಗರಕ್ಕೆ ನಿತ್ಯ ಲಕ್ಷಾಂತರ ಪ್ರಯಾಣಿಕರ ಆಗಮನ. ಜನಸಂಖ್ಯೆ ಹೆಚ್ಚಿದಂತೆ ವಾಹನಗಳಿಂದ ಉಂಟಾಗುವ ಮಾಲಿನ್ಯವೂ ಹೆಚ್ಚಾಗುತ್ತಲೇ ಇದೆ. ಮುಖ್ಯವಾಗಿ ಬಸ್​ಗಳಿಂದ ಶೇಕಡಾ 6 ರಷ್ಟು ಮಾಲಿನ್ಯ ಹೊರಸೂಸುತ್ತಿದೆ. ಇದಕ್ಕೆ ಬ್ರೆಕ್​ ಹಾಕುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರದ ಫೇಮ್​ ಸ್ಕೀಮ್​ 2 ಯೋಜನೆ ಅಡಿಯಲ್ಲಿ ಇ-ಬಸ್​ (ಎಲೆಕ್ಟ್ರಾನಿಕ್ ಬಸ್) ರಸ್ತೆಗೆ ಇಳಿಯಲಿವೆ.

ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಯು ಎಲೆಕ್ಟ್ರಿಕ್ ವಾಹನಗಳನ್ನು ರಸ್ತೆಗಿಳಿಸೋಕ್ಕೆ ಸಜ್ಜಾಗಿದ್ದು, ರಾಜ್ಯ ಸರ್ಕಾರದ ಅನುಮತಿಯೊಂದೇ ಬಾಕಿ ಉಳಿದಿದೆ. ಬರೋಬ್ಬರಿ 300 ಎಲೆಕ್ಟ್ರಿಕ್ ಬಸ್​ಗಳು ಸಜ್ಜಾಗಿವೆ.

ಚಾರ್ಜಿಂಗ್​ ಪಾಯಿಂಟ್​ ಎಲ್ಲಿ: ರಸ್ತೆಗೆ ಇಳಿಯುವ ಎಲೆಕ್ಟ್ರಿಕ್ ವಾಹನಗಳಿಗೆ ಬಿಎಂಟಿಸಿ ಡಿಪೋದಲ್ಲಿ ಚಾರ್ಜಿಂಗ್ ಪಾಯಿಂಟ್ ವ್ಯವಸ್ಥೆ ಮಾಡಲಾಗುವುದು. ವಿದ್ಯುತ್ ಪೂರೈಕೆಯಲ್ಲಿ ಯಾವುದೇ ಸಮಸ್ಯೆ ಆಗಲ್ಲ ಎಂದು ಬಿಎಂಟಿಸಿ ವ್ಯವಸ್ಥಾಪಕ ನಿರ್ದೇಶಕ ಎನ್.ವಿ. ಪ್ರಸಾದ್ ತಿಳಿಸಿದರು.

ವೋಲ್ವೋ ಬಸ್​ಗಳಿಂದ ನಷ್ಟಕ್ಕೆ ತುತ್ತಾಗಿರೋ ನಗರ ಸಾರಿಗೆ ಸಂಸ್ಥೆಯು, ಅವುಗಳ ಜಾಗದಲ್ಲಿ ಎಲೆಕ್ಟ್ರಿಕ್ ಬಸ್​ಗಳನ್ನು ನಿಲ್ಲಿಸಲು ಯೋಜನೆ ರೂಪಿಸಿದೆ. ಈಗಾಗಲೇ ಬಿಎಂಟಿಸಿ ಬೋರ್ಡ್‌ ಅನುಮೋದನೆ ಕೊಟ್ಟಿದ್ದು, ಸರ್ಕಾರ ಆದೇಶ ನೀಡಿದ ಕೂಡಲೇ ಕಾರ್ಯೋನ್ಮುಖರಾಗುತ್ತೇವೆ ಎಂದು ಅವರು ಮಾಹಿತಿ ನೀಡಿದರು.

ಹೆಚ್ಚುತ್ತಿರುವ ಬೆಂಗಳೂರಿನ ಮಾಲಿನ್ಯಕ್ಕೆ ಎಲೆಕ್ಟ್ರಿಕ್ ಬಸ್​​ಗಳ ಯೋಜನೆ ಬ್ರೇಕ್ ಹಾಕುತ್ತಾ ಎಂಬುದನ್ನು ಕಾದು ನೋಡಬೇಕಿದೆ.