ಬೆಂಗಳೂರು: ಕೇಂದ್ರ ಸರ್ಕಾರ ರಾಜ್ಯಗಳಿಗೆ ಅಗತ್ಯಕ್ಕಿಂತ ಹೆಚ್ಚಾಗಿಯೇ ರಸಗೊಬ್ಬರ ಪೂರೈಕೆ ಮಾಡುತ್ತಿದೆ. ಆದರೂ ಕೆಲವು ಪ್ರದೇಶಗಳಲ್ಲಿ ಕಾಳಸಂತೆ, ಕೃತಕ ಅಭಾವ ಸೃಷ್ಟಿಯಾಗುತ್ತಿರುವ ಬಗ್ಗೆ ವರದಿಯಾಗಿದೆ. ರಾಜ್ಯ ಸರ್ಕಾರಗಳು ಈ ಬಗ್ಗೆ ತಕ್ಷಣವೇ ಗಮನ ಹರಿಸಿ ಕಠಿಣ ಕ್ರಮ ಜರುಗಿಸಬೇಕು ಎಂದು ಕೇಂದ್ರ ರಾಸಾಯನಿಕ ಹಾಗೂ ರಸಗೊಬ್ಬರ ಸಚಿವ ಡಿ.ವಿ.ಸದಾನಂದ ಗೌಡ ಆಗ್ರಹಿಸಿದ್ದಾರೆ.
ಮುಂಗಾರು ಹಂಗಾಮಿನಲ್ಲಿ ಬೇರೆ ಬೇರೆ ರಾಜ್ಯಗಳ ಯೂರಿಯಾ ಮತ್ತಿತರ ನಮೂನೆಯ ರಸಗೊಬ್ಬರಗಳ ಬೇಡಿಕೆ ಹಾಗೂ ಆಯಾ ರಾಜ್ಯಗಳಿಗೆ ಪೂರೈಸಲಾಗಿರುವ ರಸಗೊಬ್ಬರ ಪ್ರಮಾಣಗಳ ವಿವರಗಳುಳ್ಳ ಮಾಧ್ಯಮ ಹೇಳಿಕೆಯೊಂದನ್ನು ಕೇಂದ್ರ ಸಚಿವರು ದಾಖಲೆ ಸಮೇತ ಬಿಡುಗಡೆ ಮಾಡಿದರು.
ಆಯಾ ರಾಜ್ಯಗಳು ತಮಗೆ ಯಾವ ಹಂಗಾಮಿಗೆ ಯಾವ ನಮೂನೆಯ ರಸಗೊಬ್ಬರಗಳು ಎಷ್ಟೆಷ್ಟು ಬೇಕು ಎಂಬ ಬಗ್ಗೆ ಅಂದಾಜು ಮಾಡಿ ಮೊದಲೇ ತಿಳಿಸುತ್ತವೆ. ಅದರ ಪ್ರಕಾರ ನಮ್ಮ ರಸಗೊಬ್ಬರ ಇಲಾಖೆಯು ಸಾಕಷ್ಟು ಮುಂಚಿತವಾಗಿಯೇ ಕಾರ್ಖಾನೆಗಳು, ದಾಸ್ತಾನು ಕೇಂದ್ರಗಳು ಹಾಗೂ ಬಂದುರುಗಳಿಂದ ಆಯಾ ರಾಜ್ಯಗಳ ಗೋದಾಮು, ಡೆಲಿವರಿ ಕೇಂದ್ರಗಳಿಗೆ ರಸಗೊಬ್ಬರ ಪೂರೈಕೆ ಮಾಡುತ್ತದೆ. ಇದಾದ ನಂತರ ಆಯಾ ರಾಜ್ಯಗಳಲ್ಲಿ ಆಂತರಿಕ ವಿತರಣೆಯ ಸಂಪೂರ್ಣ ಜವಾಬ್ದಾರಿ ರಾಜ್ಯ ಸರ್ಕಾರಗಳಿಗೆ ಸೇರಿದ್ದು ಎಂದು ಕೇಂದ್ರ ಸಚಿವರು ಸ್ಪಷ್ಟಪಡಿಸಿದರು.
ಮುಂಜಾಗ್ರತಾ ದೃಷ್ಟಿಯಿಂದ ಕೇಂದ್ರವು ಎಲ್ಲಾ ರಾಜ್ಯಗಳಲ್ಲಿ ಸಾಕಷ್ಟು ಹೆಚ್ಚಿನ ಪ್ರಮಾಣದಲ್ಲಿಯೇ ರಸಗೊಬ್ಬರ ಪೂರೈಕೆ ಇರುವಂತೆ ನೋಡಿಕೊಳ್ಳುತ್ತದೆ. ಸಾಮಾನ್ಯವಾಗಿ ಮುಂದಿನ ಒಂದೆರಡು ತಿಂಗಳಿಗೆ ಸಾಕಾಗುವಷ್ಟು ಲಭ್ಯತೆ ಇರುತ್ತದೆ. ಉದಾಹರಣೆಗೆ ಕರ್ನಾಟಕದಲ್ಲಿ ಇಂದಿನಿಂದ ಸೆಪ್ಟೆಂಬರ್. 30ರ ತನಕ (ಖಾರೀಫ್‌ ಹಂಗಾಮು ಅಂತ್ಯ) 58.3 ಸಾವಿರ ಟನ್ ಯೂರಿಯಾ ಬೇಕು. ನಿನ್ನೆವರಿಗಿನ ಲೆಕ್ಕದಂತೆ ಕರ್ನಾಟಕದಲ್ಲಿ 2.04 ಲಕ್ಷ ಟನ್ ಯೂರಿಯಾ ದಾಸ್ತಾನಿದೆ. ಕರ್ನಾಟಕದಲ್ಲಿ ಮುಂದಿನ 40 ದಿನಗಳಲ್ಲಿ ಅಂದರೆ ಈ ಹಂಗಾಮಿನ ಕೊನೆಯವರೆಗೆ 14.2 ಸಾವಿರ ಟನ್ ಡಿ.ಎ.ಪಿ. ಮಾದರಿ ರಸಗೊಬ್ಬರ ಬೇಕು. ಆದರೆ ಈಗಾಗಲೇ 1.87 ಲಕ್ಷ ಟನ್ ಡಿ.ಎ.ಪಿ. ಗೊಬ್ಬರ ರಾಜ್ಯದಲ್ಲಿ ಲಭ್ಯವಿದೆ. ಹಾಗೆಯೇ ರಾಜ್ಯಕ್ಕೆ ಈ ಅವಧಿಯಲ್ಲಿ 25.2 ಸಾವಿರ ಟನ್ ಎನ್.ಪಿ.ಕೆ.ಎಸ್. ಮಾದರಿ ರಸಗೊಬ್ಬರ ಅಗತ್ಯವಿದೆ. ಲಭ್ಯತೆ ಪ್ರಮಾಣ 4.8 ಲಕ್ಷ ಟನ್ ಇದೆ.
ಇದು ಬೇಡಿಕೆಗಿಂತ ಹಲವು ಪಟ್ಟು ಜಾಸ್ತಿ. ಅದೇ ರೀತಿ ರಾಜ್ಯಕ್ಕೆ ಸೆಪ್ಟೆಂಬರ್ ಕೊನೆತನಕ 59.6 ಸಾವಿರ ಟನ್ ಎಂ.ಓ.ಪಿ. ಮಾದರಿ ಗೊಬ್ಬರ ಬೇಕು. ಸಂತೋಷದ ವಿಚಾರವೇನೆಂದರೆ ರಾಜ್ಯದಲ್ಲಿ ಇಂದು 1.11 ಲಕ್ಷ ಟನ್ ಎಂ.ಓ.ಪಿ. ದಾಸ್ತಾನು ಇದೆ. ರಸಗೊಬ್ಬರ ಪೂರೈಕೆ ನಿರಂತರ ಪ್ರಕ್ರಿಯೆ. ಪ್ರತಿನಿತ್ಯ ರಾಜ್ಯಕ್ಕೆ ಸರಾಸರಿ ಐದರಿಂದ ಆರು ಗೂಡ್ಸ್‌ ಟ್ರೇನುಗಳು ಬೇರೆ ಬೇರೆ ಕಡಗಳಿಂದ ರಸಗೊಬ್ಬರ ಹೊತ್ತು ಬರುತ್ತಿರುತ್ತವೆ. ಕರ್ನಾಟಕಕ್ಕೆ ಆಗಸ್ಟ್‌ ತಿಂಗಳಲ್ಲಿ ನಿನ್ನೆವರೆಗೆ 110 ರೇಕ್ಸ್‌ (ಒಂದು ರೇಕ್‌ ಅಂದರೆ ಒಂದು ಗೂಡ್ಸ್‌ ಟ್ರೇನ್) ಅಂದಾಜು 3.5 ಲಕ್ಷ ಟನ್ ರಸಗೊಬ್ಬರ ಪೂರೈಕೆಯಾಗಿದೆ.