ಮತ್ತೊಂದು ಲಾಕ್‌ಡೌನ್: ಬಹುತೇಕ ಸರ್ಕಾರಿ ಕಚೇರಿಗಳ ಕಾರ್ಯಸ್ಥಗಿತ: ವಿಲೇವಾರಿಯಾಗದೇ ಉಳಿದ ರಾಶಿ ರಾಶಿ ಕಡತ

ರಾಜ್ಯದ ಬಹುತೇಕ ಆಡಳಿತ ಯಂತ್ರ ಕೊರೊನೊ ನಿಯಂತ್ರಣದತ್ತ ಮಗ್ನವಾಗಿದೆ. ಇತ್ತ ಸರ್ಕಾರಿ ದೈನಂದಿನ ಕಾರ್ಯ ನಿರ್ವಹಿಸಲು ಕೇವಲ ಶೇ 50ರಷ್ಟು ಸಿಬ್ಬಂದಿ, ಅಧಿಕಾರಿಗಳು ಮಾತ್ರ ಉಳಿದು ಕೊಂಡಿದ್ದಾರೆ.

ಬೆಂಗಳೂರು: ಕೋವಿಡ್ 2ನೇ ಅಲೆ ಮೊದಲಿಗಿಂತಲೂ ವ್ಯಾಪಕವಾಗಿ ರಾಜ್ಯಾದ್ಯಂತ ಹಬ್ಬುತ್ತಿದೆ. ಇದರಿಂದ ಬಹುತೇಕ ಆಡಳಿತ ಯಂತ್ರ ಎರಡನೇ ಅಲೆಗೆ ನಿಯಂತ್ರಣ ಹೇರುವ ಕಾರ್ಯದಲ್ಲಿ ಮಗ್ನವಾಗಿದೆ. ಮುಂಜಾಗ್ರತಾ ಕ್ರಮವಾಗಿ ಸರ್ಕಾರಿ ಕಚೇರಿಗಳಲ್ಲಿ ಕೇವಲ ಶೇ 50ರಷ್ಟು ಸಿಬ್ಬಂದಿಗೆ ಮಿತಿ ಹಾಕಲಾಗಿದೆ. ಇದರಿಂದ ಈಗಾಗಲೇ ಕುಂಟುತ್ತಾ ಸಾಗುತ್ತಿದ್ದ ಕಡತ ವಿಲೇವಾರಿಗೆ ಅಕ್ಷರಶಃ ಗ್ರಹಣ ಹಿಡಿಯಲಿದೆ.

ಈಗಾಗಲೇ ಕೋವಿಡ್ 2ನೇ ಅಲೆ ಹಿನ್ನೆಲೆ ಸರ್ಕಾರ ಸರ್ಕಾರಿ ಕಚೇರಿಗಳಲ್ಲೂ ನಿರ್ಬಂಧಗಳನ್ನು ಹೇರಿದೆ. ಸರ್ಕಾರಿ ಕಚೇರಿಗಳಲ್ಲೂ 50:50 ಫಾರ್ಮುಲಾವನ್ನು ಅಳವಡಿಸಿದೆ. ಇನ್ನು ಎಲ್ಲಾ ಇಲಾಖೆಗಳ ಶೇ 50ರಷ್ಟು ಸಿಬ್ಬಂದಿಯನ್ನು ಕೋವಿಡ್ ನಿರ್ವಹಣೆ ಕರ್ತವ್ಯಕ್ಕೆ ನಿಯೋಜಿಸಲಾಗಿದೆ. ಹೀಗಾಗಿ ರಾಜ್ಯದ ಬಹುತೇಕ ಆಡಳಿತ ಯಂತ್ರ ಕೊರೊನೊ ನಿಯಂತ್ರಣದತ್ತ ಮಗ್ನವಾಗಿದೆ. ಇತ್ತ ಸರ್ಕಾರಿ ದೈನಂದಿನ ಕಾರ್ಯ ನಿರ್ವಹಿಸಲು ಕೇವಲ ಶೇ 50ರಷ್ಟು ಸಿಬ್ಬಂದಿ, ಅಧಿಕಾರಿಗಳು ಮಾತ್ರ ಉಳಿದುಕೊಂಡಿದ್ದಾರೆ.

ಈ ಕೋವಿಡ್ ನಿಯಂತ್ರಣ ಕ್ರಮಗಳಿಂದ ಕಡತ ವಿಲೇವಾರಿಗೆ ದೊಡ್ಡ ಪ್ರಮಾಣದಲ್ಲಿ ಹಿನ್ನಡೆಯಾಗಲಿದೆ ಎಂಬ ಆತಂಕ ಎದುರಾಗಿದೆ. ಸಿಬ್ಬಂದಿ ಕೊರತೆ ಹಿನ್ನೆಲೆ ಇಲಾಖೆಗಳ ಕಡತಗಳ ವಿಲೇವಾರಿ ಪ್ರಕ್ರಿಯೆ ವಿಳಂಬವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕಳೆದ ಆರ್ಥಿಕ ವರ್ಷದಲ್ಲಿ ದಾಖಲೆಗಳ ವಿಲೇವಾರಿ ನಿರೀಕ್ಷಿತ ಮಟ್ಟದಲ್ಲಿ ಪ್ರಗತಿ ಸಾಧಿಸಿರಲಿಲ್ಲ. ಹೀಗಾಗಿ ಕೆಲಸವನ್ನು ಚುರುಕುಗೊಳಿಸಬೇಕು ಎಂದು ಸಿಎಂ ಕಟ್ಟುನಿಟ್ಟಿನ ಸೂಚನೆ ನೀಡಿದರೂ, ಆಡಳಿತ ಯಂತ್ರದಲ್ಲಿ ಮಾತ್ರ ಕಡತಗಳ ವಿಲೇವಾರಿ ತೆವಳುತ್ತಾ ಸಾಗಿದೆ.

ಮಾರ್ಚ್ ಅಂತ್ಯದ ವೇಳೆಗೆ ಎಲ್ಲ ಇಲಾಖೆಗಳಲ್ಲಿ ಅಂದಾಜು ಸುಮಾರು 90,129 ಕಡತಗಳು ಬಾಕಿ ಉಳಿದುಕೊಂಡಿದೆ. ಈಗ ಮತ್ತೆ ಕೋವಿಡ್ ಮಾರ್ಗಸೂಚಿಯನ್ವಯ ನಿರ್ಬಂಧಗಳನ್ನು ಹೇರಿರುವುದರಿಂದ ಕೆಲಸ ಮತ್ತಷ್ಟು ಹಳ್ಳಹಿಡಿಯಲಿದೆ ಎಂದು ಇಲಾಖೆಯ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಜನಸ್ಪಂದನದಡಿ ಸ್ವೀಕೃತ ಅರ್ಜಿಗಳ ವಿಲೇವಾರಿ ವಿಳಂಬ: ಇತ್ತ ಜನಸ್ಪಂದನಾದಡಿ ಸ್ವೀಕರಿಸಲಾಗುವ ಅರ್ಜಿಗಳ ವಿಲೇವಾರಿಗೆ ಕಳೆದ ನಾಲ್ಕೈದು ತಿಂಗಳಿಂದ ಗ್ರಹಣ ಹಿಡಿದಿದೆ. ಬಹುತೇಕ ದಾಖಲೆಗಳು ವಿಲೇವಾರಿಯಾಗದೇ ಹಾಗೆಯೇ ರಾಶಿ ಬಿದ್ದಿವೆ.

ಜನಸ್ಪಂದನದಡಿ ಸ್ವೀಕೃತಿಯಾದ ಇಲಾಖಾವಾರು ಅರ್ಜಿಗಳ ವಿಲೇವಾರಿ ತೀರಾ ಕಳಪೆಯಾಗಿದೆ. ಒಟ್ಟು 37,339 ಅರ್ಜಿಗಳು ವಿಲೇವಾರಿಯಗದೇ ಹಾಗೆಯೇ ಬಾಕಿ ಉಳಿದುಕೊಂಡಿದೆ. ಈ ಪೈಕಿ 34,316 ಅರ್ಜಿಗಳನ್ನು 30 ದಿನ ಕಳೆದರೂ ವಿಲೇವಾರಿ ಮಾಡಿಲ್ಲ.

ಜನಸ್ಪಂದನದಡಿ ಸ್ವೀಕರಿಸಲಾದ ಜಿಲ್ಲಾಡಳಿತವಾರು ಅರ್ಜಿಗಳೂ ವಿಲೇವಾರಿಯಾಗದೇ ಬೆಟ್ಟದಷ್ಟು ಬೆಳೆದು ನಿಂತಿದೆ. ಇ-ಜನಸ್ಪಂದನ ಅಂಕಿಅಂಶದ ಪ್ರಕಾರ ಜಿಲ್ಲಾಧಿಕಾರಿ ಕಚೇರಿಗಳಲ್ಲಿ 4,331 ಅರ್ಜಿಗಳು ಬಾಕಿ ಉಳಿದುಕೊಂಡಿದ್ದರೆ, ಇನ್ನು 3,945 ಅರ್ಜಿಗಳು 30 ದಿನ ಕಳೆದರೂ ವಿಲೇವಾರಿಯಾಗದೆ ಹಾಗೆಯೇ ಬಾಕಿ ಉಳಿದುಕೊಂಡಿವೆ.

ಎಸ್ ಪಿ ಕಚೇರಿಗಳಲ್ಲಿ 1,308 ಅರ್ಜಿಗಳು ವಿಲೇವಾರಿಯಾಗದೆ ಬಾಕಿ ಉಳಿದುಕೊಂಡಿದ್ದರೆ, 1,181 ಅರ್ಜಿಗಳು 30 ದಿನ ಮೀರಿದರೂ ವಿಲೇವಾರಿಯಾಗದೇ ಬಾಕಿ ಉಳಿದುಕೊಂಡಿದೆ. ಸಿಇಒ ಕಚೇರಿಯಲ್ಲಿ 2,923 ಅರ್ಜಿಗಳು ಬಾಕಿ ಉಳಿದುಕೊಂಡಿದ್ದು, 2,783 ಅರ್ಜಿಗಳು ಬಾಕಿ ಉಳಿದುಕೊಂಡಿವೆ.

ಸಚಿವಾಲಯದಲ್ಲೇ ಕಡತಗಳ ರಾಶಿ: ಮಾರ್ಚ್ ವರೆಗಿನ ಕಡತ ವಿಲೇವಾರಿಯ ಪ್ರಗತಿ ಪರಿಶೀಲನೆ ವೇಳೆ ಸಚಿವಾಲಯದ ಕಚೇರಿಗಳಲ್ಲೇ ಸಾವಿರಾರು ವಿಲೇವಾರಿಯಾಗದೇ ಬಾಕಿ ಉಳಿದುಕೊಂಡಿರುವುದು ಬಯಲಾಗಿದೆ. ಸುಮಾರು 8 ಇಲಾಖೆಗಳಲ್ಲಿ ಶೇ 25ರಷ್ಟು ಮಾತ್ರ ವಿಲೇವಾರಿಯಾಗಿದೆ.

ಕಂದಾಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಕಚೇರಿಯಲ್ಲಿ ಒಟ್ಟು 9,902 ಕಡತಗಳಿವೆ. 30 ದಿನ ಮೀರಿದ್ದರೂ ಇವುಗಳ ಬಗ್ಗೆ ಯಾವುದೇ ಕ್ರಮ ವಹಿಸಿಲ್ಲ. ಅದರಂತೆ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್ ಇಲಾಖೆಯ ಸರ್ಕಾರದ ಪ್ರಧಾನ ಕಾರ್ಯದರ್ಶಿ ಕಚೇರಿಯಲ್ಲಿ 2,640, ನಗರಾಭಿವೃದ್ಧಿ ಇಲಾಖೆಯ ಸರ್ಕಾರದ ಕಾರ್ಯದರ್ಶಿ ಕಚೇರಿಯಲ್ಲಿ 8,150 ದಾಖಲೆಗಳು ಬಾಕಿ ಉಳಿದುಕೊಂಡಿದೆ. ಇವುಗಳು 30 ದಿನ ಮೀರಿದರೂ ಹಾಗೆಯೇ ವಿಲೇವಾರಿಯಾಗದೇ ಬಾಕಿ ಉಳಿದುಕೊಂಡಿವೆ.

ಉಳಿದಂತೆ ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ ಇಲಾಖೆಯಲ್ಲಿ 6684, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯಲ್ಲಿ 3,554, ಸಿಬ್ಬಂದಿ ಆಡಳಿತ ಸುಧಾರಣೆ ಇಲಾಖೆಯಲ್ಲಿ 7,500, ಪರಿಸರ ಮತ್ತು ಜೀವಿಶಾಸ್ತ್ರ ಇಲಾಖೆಯಲ್ಲಿ 3,540, ಕಡತಗಳಿಗೆ 30 ದಿನ ಮೀರಿದರೂ ಯಾವುದೇ ಕ್ರಮ ಕೈಗೊಂಡಿಲ್ಲ.

ಓದಿ:ಗಂಟುಮೂಟೆ ಕಟ್ಟಿ ಬೆಂಗಳೂರು ತೊರೆಯುತ್ತಿರುವ ಜನ: ರೈಲ್ವೆ, ಬಸ್ ನಿಲ್ದಾಣಗಳು ಫುಲ್ ರಶ್