ಸಿಲಿಕಾನ್ ಸಿಟಿಯಲ್ಲಿ ಕಳೆಗಟ್ಟಿದ ದೀಪಾವಳಿ ಸಂಭ್ರಮ: ದುಬಾರಿ ದರದ ನಡುವೆಯೂ ಭರ್ಜರಿ ವಹಿವಾಟು

Diwali celebrations: ಬೆಂಗಳೂರಿನಲ್ಲಿ ದೀಪಾವಳಿ ಸಂಭ್ರಮ ಮನೆಮಾಡಿದೆ. ಹೂವು, ಹಣ್ಣುಗಳ ಬೆಲೆ ಹೇಗಿದೆ ನೋಡಿ.

ಬೆಂಗಳೂರು:ಸಿಲಿಕಾನ್ ಸಿಟಿಯಲ್ಲಿ ಬೆಳಕಿನ ಹಬ್ಬ ದೀಪಾವಳಿ ಸಂಭ್ರಮ ಕಳೆಗಟ್ಟಿದ್ದು, ಮಾರುಕಟ್ಟೆಯಲ್ಲಿ ಹೂ, ಹಣ್ಣು ಸೇರಿದಂತೆ ಹಬ್ಬದ ಪರಿಕರಗಳ ವ್ಯಾಪಾರ ಜೋರಾಗಿದೆ. ಸಿಹಿ ತಿನಿಸು, ಅಲಂಕಾರಿಕ ವಸ್ತುಗಳಿಗೂ ಹೆಚ್ಚಿನ ಬೇಡಿಕೆಯಿದ್ದು, ದುಬಾರಿ ದರದ ನಡುವೆಯೂ ಭರ್ಜರಿ ವಹಿವಾಟು ನಡೆಯುತ್ತಿದೆ.

ಹಬ್ಬದ ಹಿನ್ನೆಲೆಯಲ್ಲಿ ನಗರದ ಕೆ.ಆರ್.ಮಾರುಕಟ್ಟೆ, ಯಶವಂತಪುರ, ಮಲ್ಲೇಶ್ವರ, ಬಸವನಗುಡಿ, ಮಡಿವಾಳ, ಚಿಕ್ಕಪೇಟೆ, ಜಯನಗರ ಮಾರುಕಟ್ಟೆಯಲ್ಲಿ ಹೂ ಹಣ್ಣುಗಳ ಖರೀದಿ ಭರ್ಜರಿಯಾಗಿ ನಡೆದಿದೆ. ಜೊತೆಗೆ, ಪ್ರಮುಖ ರಸ್ತೆಗಳಲ್ಲಿ ಬಾಳೆಕಂದು, ಕುಂಬಳ, ಮಾವಿನೆಲೆ ಮಾರಾಟ ಮಾಡಲಾಗುತ್ತಿದೆ. ಜನರ ಖರೀದಿಯ ಭರಾಟೆ ಕೂಡ ಜೋರಾಗಿತ್ತು.

ಇದನ್ನೂ ಓದಿ :ದೇಶಾದ್ಯಂತ ದೀಪಾವಳಿ ಸಂಭ್ರಮ ; ಭಾವನಗರದಲ್ಲಿ ಸಿಹಿ ತಿಂಡಿಗಳಿಗೆ ಹೆಚ್ಚು ಬೇಡಿಕೆ

ಬೆಚ್ಚಿದ ಬೇಡಿಕೆ, ದರ ಏರಿಕೆ:ಹಬ್ಬದ ಹಿನ್ನೆಲೆಯಲ್ಲಿ ಹೂ, ಹಣ್ಣುಗಳ ಬೆಲೆಯಲ್ಲಿ ಏರಿಕೆಯಾಗಿದೆ. ಬಹುತೇಕ ಹೂವುಗಳ ಬೆಲೆ 10 ರಿಂದ 50 ರೂಪಾಯಿ ವರೆಗೆ ಹೆಚ್ಚಾಗಿದೆ. ಕೆ.ಜಿ ಸೇವಂತಿಗೆ 80 ರಿಂದ 150 ರೂಪಾಯಿ, ಮಲ್ಲಿಗೆ 900 ರಿಂದ 1000 ರೂ., ಕನಕಾಂಬರ 1000 ರೂ., ಸುಗಂಧರಾಜ 150 ರೂಪಾಯಿ, ಮೆರಾಬಲ್‌ ಗುಲಾಬಿ 180 ರಿಂದ 200 ರೂಪಾಯಿಗೆ ಹೆಚ್ಚಾಗಿರುವುದು ಕಂಡುಬಂತು. ಸೇಬು, ದಾಳಿಂಬೆ, ಕಿತ್ತಳೆ, ಏಲಕ್ಕಿ ಬಾಳೆಹಣ್ಣು, ಮೂಸಂಬಿ ಹಣ್ಣಿನ ದರವೂ ಏರಿಕೆಯಾಗಿದೆ. ದರ ಹೆಚ್ಚಿದ್ದರೂ ಕೂಡ ವಹಿವಾಟು ಜೋರಾಗಿಯೇ ಇತ್ತು.

ಇನ್ನೊಂದೆಡೆ, ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಈರುಳ್ಳಿ ಬೆಲೆ ಇಳಿಕೆ ಆಗಿದೆ. ಕೆಜಿ ಈರುಳ್ಳಿ 50 ರೂಪಾಯಿಗೆ ಲಭ್ಯವಾಗುತ್ತಿದೆ. ಇತರೆ ತರಕಾರಿಗಳು ಸಹ ಸಾಮಾನ್ಯ ದರದಲ್ಲಿವೆ. ಇನ್ನು ಮಾರುಕಟ್ಟೆಗಳು ಗಿಜುಗುಟ್ಟಿದ್ದರಿಂದ ಅಲ್ಲಲ್ಲಿ ಸಂಚಾರ ದಟ್ಟಣೆ ಉಂಟಾಗಿತ್ತು.

ಹೀಗಿದೆ ಹಣ್ಣಿನ ಬೆಲೆ (ಪ್ರತಿ ಕೆಜಿಗೆ) :

• ಸೇಬು 130 ರಿಂದ 140 ರೂಪಾಯಿ
• ದಾಳಿಂಬೆ 160 -170 ರೂಪಾಯಿ
• ಮೊಸಂಬಿ 100 ರೂಪಾಯಿ
• ಸಿತಾಫಲ 130 ರೂಪಾಯಿ
• ಕಿತ್ತಳೆ 80 ರೂಪಾಯಿ
• ದ್ರಾಕ್ಷಿ 200 ರೂಪಾಯಿ
• ಕರಿ ದ್ರಾಕ್ಷಿ 170 ರೂಪಾಯಿ
• ಏಲಕ್ಕಿ ಬಾಳೆಹಣ್ಣು 80 ರೂಪಾಯಿ
• ಸೀಬೆಕಾಯಿ 130 ರೂಪಾಯಿ
• ಬಾಳೆಹಣ್ಣು 40 ರೂಪಾಯಿ

ಹೂವುಗಳ ಬೆಲೆ (ಮಾರಿಗೆ) :

• ಸೇವಂತಿಗೆ 60 ರೂಪಾಯಿ
• ಮಲ್ಲಿಗೆ 160 ರೂಪಾಯಿ
• ಕಾಕಡ 130 ರೂಪಾಯಿ
• ಕನಕಾಂಬರ 120 ರೂಪಾಯಿ
• ಸುಗಂಧ ರಾಜ 150 ರೂಪಾಯಿ
• ಗುಲಾಬಿ 200 ರೂಪಾಯಿ
• ಬಿಳಿ ಸೇವಂತಿ 120 ರೂಪಾಯಿ

ನರಕ ಚರ್ತುದಶಿ, ಧನಲಕ್ಷ್ಮೀ ಪೂಜೆ ಆಚರಣೆಗೆ ಸಕಲ ಸಿದ್ಧತೆಯಾಗುತ್ತಿದೆ. ಇಂದು ದೀಪಾವಳಿ ಅಮಾವಾಸ್ಯೆಯ ಬಲೀಂದ್ರನ ಪೂಜೆ ಹಾಗೂ ಮಂಗಳವಾರ ಬಲಿಪಾಡ್ಯಮಿ ದಿನ ಚಂದ್ರದರ್ಶನ ಮಾಡಲಾಗುತ್ತದೆ. ನಗರದೆಲ್ಲೆಡೆ ಮಾರಾಟಗಾರರು ಲಕ್ಷ್ಮೀ ಪೂಜೆ ನಡೆಸಲು ಸಜ್ಜಾಗಿದ್ದಾರೆ.