ಮೊಬೈಲ್​​ ಕೊಡಲಿಲ್ಲವೆಂದು ನೇಣಿಗೆ ಶರಣಾದ ಮಗಳ ನೇತ್ರದಾನ ಮಾಡಿದ ಪೋಷಕರು

ಮೊಬೈಲ್​​ ತೆಗೆದುಕೊಂಡು ಹೋಗಬೇಡ ಎಂದು ತಾಯಿ ಬುದ್ಧಿವಾದ ಹೇಳಿದಕ್ಕೆ ಮಗಳು ಆತ್ಮಹತ್ಯೆ ಮಾಡಿಕೊಂಡಿದ್ದಳು. ಪೋಷಕರು, ಮಗಳ ಕಣ್ಣುಗಳನ್ನು ದಾನ ಮಾಡುವ ಮೂಲಕ ಸಾರ್ಥಕತೆ ಮೆರೆದಿದ್ದಾರೆ.

ಬೆಂಗಳೂರು: ತಾಯಿ ಮೊಬೈಲ್ ಕೊಟ್ಟಿಲ್ಲ ಎಂದು ಆತ್ಮಹತ್ಯೆಗೆ ಶರಣಾಗಿದ್ದ ಮಗಳ ಕಣ್ಣುಗಳನ್ನು ದಾನ ಮಾಡುವ ಮೂಲಕ ಪೋಷಕರು ಸಾರ್ಥಕತೆ ಮೆರೆದಿದ್ದಾರೆ.

ಪ್ರಿಯಾಂಕ ಕಣ್ಣುಗಳನ್ನ ಲಯನ್ಸ್ ಕ್ಲಬ್​​​ಗೆ ಆಕೆಯ ಪೋಷಕರು ದಾನವಾಗಿ ನೀಡಿದ್ದಾರೆ. ಹನುಮಂತ ‌ನಗರದ 9ನೇ ರಸ್ತೆಯ ಬಳಿ ಪ್ರಿಯಾಂಕ (16) ತನ್ನ ತಂದೆ- ತಾಯಿ ಜೊತೆ ವಾಸವಾಗಿದ್ದರು. ನಿನ್ನೆ ಸಂಜೆ ಸ್ನೇಹಿತೆ ಮನೆಗೆ ಹೋಗುವಾಗ ಮೊಬೈಲ್ ತೆಗೆದುಕೊಂಡಿದ್ದಳು.

ಈ ವೇಳೆ ಪ್ರಿಯಾಂಕ ತಾಯಿ ಮೊಬೈಲ್ ತೆಗೆದುಕೊಂಡು ಹೋಗದಂತೆ ಬುದ್ಧಿವಾದ ಹೇಳಿದ್ದರು. ಇದೇ ವಿಚಾರಕ್ಕೆ ತಾಯಿಯೊಂದಿಗೆ ಸಣ್ಣ ಜಗಳ ಮಾಡಿಕೊಂಡಿದ್ದ ಪ್ರಿಯಾಂಕ, ಮೊಬೈಲ್ ಕೊಡಲಿಲ್ಲ ಅಂತ ಸ್ನೇಹಿತೆ ಮನೆಗೆ ಹೋಗದೆ, ತಾಯಿ ದೇವಸ್ಥಾನಕ್ಕೆ ಹೋಗಿದ್ದಾಗ ಮನೆಯಲ್ಲೇ ಆತ್ಮಹತ್ಯೆಗೆ ಶರಣಾಗಿದ್ದಳು.

ತನಿಖೆಯಲ್ಲಿ ಬಯಲು:

ಇದಕ್ಕೆ ಸಂಬಂಧಿಸಿದಂತೆ ಹನುಮಂತನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ಕೂಡ ದಾಖಲಾಗಿತ್ತು. ಪೊಲೀಸರು ಪ್ರಾಥಮಿಕ ತನಿಖೆ ಕೈಗೆತ್ತಿಕೊಂಡಾಗ ಸ್ನೇಹಿತೆ ಜೊತೆ ಟಿಕ್ ಟಾಕ್ ನೋಡಬೇಕು, ಮೊಬೈಲ್ ಕೊಡು ಅಂತಾ ತಾಯಿ ಜೊತೆ ಪ್ರಿಯಾಂಕ‌ ಕೇಳಿದ್ದಳು. ಈ ವೇಳೆ ತಾಯಿ ಮೊಬೈಲ್ ಕೊಡಲ್ಲ ರೂಮ್​ಗೆ ಹೋಗಿ ಓದಿಕೋ ಎಂದಿದ್ದರು. ಪ್ರಿಯಾಂಕಗೆ ಮೊಬೈಲ್​ನಲ್ಲಿ ಯಾವಾಗಲೂ ಟಿಕ್-ಟಾಕ್ ಆಪ್ ವೀಕ್ಷಿಸುವ ಗೀಳು ಜಾಸ್ತಿ ಇತ್ತು. ತಾಯಿ ಎಷ್ಟೇ ಬುದ್ಧಿವಾದ ಹೇಳಿದ್ರು ಕೇಳದ ಕಾರಣ ನಿನ್ನೆ ಮೊಬೈಲ್ ಕಸಿದುಕೊಂಡಿದ್ದರು. ಬಳಿಕ ಆತ್ಮಹತ್ಯೆಗೆ ಪ್ರಿಯಾಂಕ ಶರಣಾಗಿದ್ದಾಳೆ ಎನ್ನಲಾಗಿದೆ.