ಬೆಂಗಳೂರು:ಮನೆಗಳಿಂದ ಬೆಳಗಿನ ಸಮಯದಲ್ಲಿ ಹಾಗೂ ವಾಣಿಜ್ಯ ರಸ್ತೆಗಳಲ್ಲಿ ರಾತ್ರಿ ಹೊತ್ತು ಕಸ ಸಂಗ್ರಹಿಸುವ ಮೂಲಕ ಸಿ.ವಿ ರಾಮನ್ ನಗರ ವಾರ್ಡ್ ಅನ್ನು ಕಸಮುಕ್ತವನ್ನಾಗಿ ಮಾಡಲು ಪಾಲಿಕೆ ಅಧಿಕಾರಿಗಳು ಪಣ ತೊಟ್ಟಿದ್ದಾರೆ.
ಬಿಬಿಎಂಪಿಯ ಘನತ್ಯಾಜ್ಯ ವಿಭಾಗದ ವಿಶೇಷ ಆಯುಕ್ತರಾಗಿರುವ ಜೊತೆಗೆ, ವಾರ್ಡ್ 57, ಸಿ.ವಿ ರಾಮನ್ ನಗರಕ್ಕೆ ನೋಡಲ್ ಅಧಿಕಾರಿಯಾಗಿರುವ ರಂದೀಪ್ ಅವರ ವಾರ್ಡ್ ಅನ್ನು ಕಸಮುಕ್ತ ಮಾಡುವ ಮೂಲಕ ಮಾದರಿ ವಾರ್ಡ್ ಆಗಿ ಪರಿವರ್ತಿಸುತ್ತಿದ್ದಾರೆ.
ವಾಣಿಜ್ಯ ಪ್ರದೇಶಗಳಲ್ಲಿ ರಾತ್ರಿ ಹೊತ್ತಿನಲ್ಲಿ ಕಸ ಸಂಗ್ರಹಿಸುವ ಮೂಲಕ ಯಾರೂ ಹೊರಗೆ ಕಸ ಎಸೆಯದಂತೆ ನೋಡಿಕೊಳ್ಳುತ್ತಿದ್ದಾರೆ. ಇದೇ ಪ್ರಯೋಗವನ್ನು ಇತರ ವಾರ್ಡ್ಗಳಲ್ಲೂ ಮಾಡಲು ತಿಳಿಸಲಾಗಿದೆ ಎಂದು ರಂದೀಪ್ ಈಟಿವಿ ಭಾರತಕ್ಕೆ ತಿಳಿಸಿದ್ದಾರೆ.
ಪ್ರತ್ಯೇಕ ಖರ್ಚಿಲ್ಲದೇ, ಅದೇ ಗುತ್ತಿಗೆದಾರರ ವಾಹನಗಳ ಪೈಕಿ ಎರಡು ಆಟೋಗಳನ್ನು ರಾತ್ರಿಹೊತ್ತಲ್ಲಿ ವಾಣಿಜ್ಯ ರಸ್ತೆಗಳಲ್ಲಿ ಕಸ ಸಂಗ್ರಹಿಸಲು ತಿಳಿಸಲಾಗಿದೆ. ಇದರಿಂದ ವ್ಯಾಪಾರಸ್ಥರ ರಾತ್ರಿ ವ್ಯಾಪಾರ ಮುಗಿದ ಬಳಿಕ ರಸ್ತೆ ಬದಿ ಕಸ ಎಸೆಯುವುದನ್ನು ತಡೆಯಬಹುದು. ಹಾಗೆಯೆ ಮಾರ್ಷಲ್ಗಳು ಕಸ ಎಸೆಯುವವರ ಮೇಲೆ ಹದ್ದಿನ ಕಣ್ಣಿಟ್ಟಿದ್ದು, ಕಟ್ಟುನಿಟ್ಟಾಗಿ ದಂಡ ವಿಧಿಸಲಾಗ್ತಿದೆ.
ಈ ವಾರ್ಡ್ನಲ್ಲಿ ಕಸ ಎಸೆಯುತ್ತಿದ್ದ 62 ವಾಣಿಜ್ಯ ಅಂಗಡಿಗಳಿಗೆ 8.48 ಲಕ್ಷ ರೂ. ದಂಡ ವಿಧಿಸಲಾಗಿದೆ. ಜೊತೆಗೆ ನಿಷೇಧಿತ ಪ್ಲಾಸ್ಟಿಕ್ ಬಳಕೆ ಮಾಡುತ್ತಿದ್ದ, ಕಸ ವಿಂಗಡಣೆ ಮಾಡದೇ ಇರುವ, ಹೋಟೆಲ್, ರೆಸ್ಟೋರೆಂಟ್, ಕಾಫಿ ಬಾರ್ಗಳು, ಸೂಪರ್ ಮಾರ್ಕೆಟ್, ಮಾಲ್ಗಳಿಗೂ ದಂಡ ವಿಧಿಸಲಾಗಿದೆ. ಬಿಬಿಎಂಪಿ ಸರಿಯಾಗಿ ಕಸ ಸಂಗ್ರಹ ಮಾಡುತ್ತಿಲ್ಲ ಎಂದು ಉದ್ಯಮಿಗಳು ದೂರಿದ ಹಿನ್ನಲೆ ಎರಡು ಹೊತ್ತು ಕಸದ ಗಾಡಿಗಳನ್ನು ಕಳುಹಿಸಿ ಕಸ ಸಂಗ್ರಹಿಸಲಾಗುತ್ತಿದೆ ಎಂದು ವಿಶೇಷ ಆಯುಕ್ತ ರಂದೀಪ್ ತಿಳಿಸಿದ್ದಾರೆ.