ಬೆಂಗಳೂರು: ಸ್ನೇಹಿತನ ಮದುವೆ ರಿಸೆಪ್ಶನ್ಗೆ ಬಂದಿದ್ದ ಉದ್ಯಮಿಗಳ ಮಕ್ಕಳು ಮದ್ಯದ ಅಮಲಿನಲ್ಲಿ ಬಡಿದಾಡಿಕೊಂಡ ಘಟನೆ ಶನಿವಾರ ಬೆಳಗಿನ ಜಾವ ಹೆಬ್ಬಾಳದ ಹೋಟೆಲ್ವೊಂದರಲ್ಲಿ ನಡೆದಿದೆ. ಬಿಯರ್ ಬಾಟಲಿಯಿಂದ ತನ್ನ ತಲೆಗೆ ಹೊಡೆಯಲಾಗಿದೆ ಎಂದು ಆರೋಪಿಸಿರುವ ದರ್ಶನ್ ಗೋವಿಂದರಾಜು ಎಂಬಾತ ಆರ್.ಟಿ.ನಗರ ಠಾಣೆಯಲ್ಲಿ ವೇದಾಂತ್ ದುಗಾರ್ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.
ದರ್ಶನ್ ಗೋವಿಂದರಾಜು ಅವರು ಉದ್ಯಮಿ ಹಾಗೂ ವೈಷ್ಣವಿ ಬಿಲ್ಡರ್ಸ್ ಮಾಲೀಕ ಗೋವಿಂದರಾಜು ಅವರ ಪುತ್ರ. ಹಾಗೆಯೇ, ವೇದಾಂತ್ ದುಗಾರ್ ಅವರು ವಿಎಆರ್ ಫೆಸಿಲಿಟೀಸ್ ಮಾಲೀಕ ಸಂಜಯ್ ದುಗಾರ್ ಮಗ. ವೇದಾಂತ್ ದುಗಾರ್ ಮತ್ತು ದರ್ಶನ್ ಇಬ್ಬರು ಸ್ನೇಹಿತರು. ಕಳೆದ ಕೆಲ ದಿನದ ಹಿಂದೆ ರೆಸ್ಟೋರೆಂಟ್ವೊಂದರಲ್ಲಿ ಇಬ್ಬರೂ ಮುಖಾಮುಖಿಯಾಗಿದ್ದಾಗ ದರ್ಶನ್, ವೇದಾಂತ್ ದುಗಾರ್ನನ್ನು ಮಾತನಾಡಿಸದೇ ಹೋಗಿದ್ದನಂತೆ. ಶನಿವಾರ ಬೆಳಗ್ಗೆ ಫೋರ್ ಸೀಸನ್ ಹೋಟೆಲ್ನಲ್ಲಿ ಪುನಃ ಮುಖಾಮುಖಿಯಾದಾಗ ಅದೇ ವಿಚಾರವಾಗಿ ಕಿರಿಕ್ ಆರಂಭವಾಗಿದೆ. "ಎಲ್ಲರೂ ನನ್ನನ್ನು ಮಾತನಾಡಿಸ್ತಾರೆ, ನೀನ್ಯಾಕೆ ಮಾತನಾಡಿಸಲ್ಲ? ಎಂದು ದರ್ಶನ್ ಬಳಿ ವೇದಾಂತ್ ದುಗಾರ್ ಪ್ರಶ್ನಿಸಿದ್ದಾನೆ. ಈ ವೇಳೆ ದರ್ಶನ್, 'ಅದು ನನ್ನಿಷ್ಟ ಎಂದಿದ್ದಾನೆ". ದರ್ಶನ್ ಮಾತನಾಡುತ್ತಿದ್ದಂತೆ ಬಿಯರ್ ಬಾಟಲಿಯಿಂದ ವೇದಾಂತ್ ಹಲ್ಲೆ ಮಾಡಿದ್ದಾನೆ ಎಂದು ಆರೋಪಿಸಲಾಗಿದೆ.
ಇದನ್ನೂ ಓದಿ :ಪಾರ್ಕಿಂಗ್ ವಿಚಾರಕ್ಕೆ ಗಲಾಟೆ : ಯಾದಗಿರಿಯಲ್ಲಿ ಜಗಳ ಬಿಡಿಸಲು ಬಂದ ವ್ಯಕ್ತಿಗೆ ಚೂರಿ ಇರಿದು ಕೊಲೆ
ಘಟನೆಯ ಬಳಿಕ ವೇದಾಂತ್ ಮುಂಬೈಗೆ ತೆರಳಿದ್ದಾನೆ ಎಂದು ತಿಳಿದು ಬಂದಿದೆ. ಸದ್ಯಕ್ಕೆ ಖಾಸಗಿ ಆಸ್ಪತ್ರೆಯಲ್ಲಿ ದರ್ಶನ್ ಚಿಕಿತ್ಸೆ ಪಡೆಯುತ್ತಿದ್ದು, ಆರ್.ಟಿ. ನಗರ ಠಾಣೆಯಲ್ಲಿ ವೇದಾಂತ್ ದುಗಾರ್ ವಿರುದ್ಧ ಕೊಲೆ ಯತ್ನ ಪ್ರಕರಣ ದಾಖಲಾಗಿದೆ.