ಚಾಮುಂಡಿ ಬೆಟ್ಟದ ನಂದಿ ವಿಗ್ರಹದಲ್ಲಿ‌ ಬಿರುಕು, ರಾಸಾಯನಿಕ ಬಳಸಿದ್ದೇ ಕಾರಣ?

400 ವರ್ಷ ಹಳೆಯ ಪಾರಂಪರಿಕ ಏಕಶಿಲಾ ನಂದಿ ವಿಗ್ರಹದಲ್ಲಿ‌ ಬಿರುಕು ಮೂಡಿದ್ದು, ಭಕ್ತರು ಆತಂಕದಿಂದಿದ್ದಾರೆ. ಆದರೆ, ಇದಕ್ಕೆ ಕಾರಣ ಬೇರೆಯೇ ಇದ್ದು, ಶೀಘ್ರವೆ ಅದನ್ನು ಖಚಿತಪಡಿಸುವಂತೆ ಜಿಲ್ಲಾಧಿಕಾರಿಗಳು ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.

ಮೈಸೂರು: ಚಾಮುಂಡಿ ಬೆಟ್ಟದ ಪ್ರಸಿದ್ಧ ಏಕಶಿಲಾ ನಂದಿ ವಿಗ್ರಹದಲ್ಲಿ‌ ಸಣ್ಣನೆಯ ಬಿರುಕು ಕಾಣಿಸಿಕೊಂಡಿದ್ದು, ಭಕ್ತರಲ್ಲಿ ಆತಂಕ ಮೂಡಿದೆ.

ಚಾಮುಂಡಿ ಬೆಟ್ಟದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾದ ಏಕಶಿಲಾ ನಂದಿ ವಿಗ್ರಹವು ಸುಮಾರು 400 ವರ್ಷ ಹಳೆಯ ಪಾರಂಪರಿಕ ವಿಗ್ರಹವಾಗಿದೆ. ಸದ್ಯ ಈ ನಂದಿ ವಿಗ್ರಹದ ಕಾಲಿನ ಭಾಗದಲ್ಲಿ ಸಣ್ಣಗೆ ಬಿರುಕು ಕಾಣಿಸಿಕೊಂಡಿದ್ದು, ಇದರಿಂದ ಪ್ರವಾಸಿಗರು ಮತ್ತು ಭಕ್ತರಲ್ಲಿ ಆತಂಕ ಉಂಟಾಗಿದೆ.

ಕಳೆದ ವರ್ಷ, ಕಪ್ಪಗಿದ್ದ ನಂದಿ ವಿಗ್ರಹವನ್ನು ಕೆಮಿಕಲ್ ಬಳಸಿ ಬಿಳಿಯ ಬಣ್ಣದ ರೂಪದಲ್ಲಿ ಬದಲಾವಣೆ ಮಾಡಲಾಗಿತ್ತು. ಈ ಸಂದರ್ಭದಲ್ಲಿ ಬಳಸಿದ ಕೆಮಿಕಲ್, ನಂದಿ ವಿಗ್ರಹ ಬಿರುಕು ಬಿಡಲು ಕಾರಣ ಎನ್ನಲಾಗಿದ್ದು, ಈ ಬಗ್ಗೆ ಮೈಸೂರು ಜಿಲ್ಲಾಧಿಕಾರಿಗಳು ಸಂಬಂಧಪಟ್ಟ ಅಧಿಕಾರಿಗಳಿಗೆ ಪರಿಶೀಲನೆ ನಡೆಸಿ ವರದಿ ಮಾಡುವಂತೆ ಸೂಚಿಸಿದ್ದಾರೆ.