ಕೋವಿಡ್ ಅಕ್ರಮ ಆರೋಪ-ಪ್ರತ್ಯಾರೋಪ.. ವಾಕ್ಸಮರದ ಕಂಪ್ಲೀಟ್​ ಮಾಹಿತಿ

ಕೊರೊನಾ ಉಪಕರಣ ಖರೀದಿಯಲ್ಲಿ ಅಕ್ರಮ ಎಸಗಲಾಗಿದೆ ಎಂಬ ಕಾಂಗ್ರೆಸ್​​ನ ಆರೋಪ ರಾಜ್ಯ ರಾಜಕಾರಣದಲ್ಲಿ ಸಂಚಲನ ಸೃಷ್ಟಿಸಿದೆ. ಈ ಹಿನ್ನೆಲೆ ಬಿಜೆಪಿ ಸರ್ಕಾರ ತಿರುಗೇಟು ನೀಡಲು ಸನ್ನದ್ಧವಾಗಿ ದಾಖಲೆ ಸಹಿತ ಸ್ಪಷ್ಟನೆ ನೀಡುತ್ತಿದೆ. ಈವರೆಗಿನ ಆರೋಪ-ಪ್ರತ್ಯಾರೋಪದ ಕಂಪ್ಲೀಟ್ ಡೀಟೈಲ್ಸ್ ಇಲ್ಲಿದೆ...

ಬೆಂಗಳೂರು:ಇದೀಗ ಕೋವಿಡ್-19 ಸಂಬಂಧ ರಾಜ್ಯ ರಾಜಕಾರಣದಲ್ಲಿ ಆರೋಪ-ಪ್ರತ್ಯಾರೋಪದ ಅಬ್ಬರ ಜೋರಾಗಿದೆ. ರಾಜ್ಯ ಕಾಂಗ್ರೆಸ್ ನಾಯಕರು ಕೋವಿಡ್ ಪರಿಕರ ಖರೀದಿ ಸೇರಿ ಒಟ್ಟು 2 ಸಾವಿರ ಕೋಟಿ ರೂ. ಭ್ರಷ್ಟಾಚಾರದ ಆರೋಪ ಮಾಡಿದ್ದರೆ, ಇತ್ತ ಬಿಜೆಪಿ ಸರ್ಕಾರ ಕಾಂಗ್ರೆಸ್ ಆರೋಪಕ್ಕೆ ದಾಖಲೆ ಸಮೇತ ಕೋವಿಡ್​ಗಾಗಿ ಒಟ್ಟು ಖರ್ಚಾಗಿದ್ದು 2,118 ಕೋಟಿ ರೂ. ಮಾತ್ರ ಎಂಬ ಕೌಂಟರ್ ನೀಡಿದೆ.

ಕೊರೊನಾ ಹಾವಳಿ ರಾಜ್ಯದಲ್ಲಿ ದಿನೆ ದಿನೆ ಹೆಚ್ಚಾಗುತ್ತಿದ್ದರೆ, ಇತ್ತ ಸರ್ಕಾರ ಮತ್ತು ಪ್ರತಿಪಕ್ಷ ಕಾಂಗ್ರೆಸ್ ಮಧ್ಯೆ ಭ್ರಷ್ಟಾಚಾರದ ಆರೋಪ-ಪ್ರತ್ಯಾರೋಪದ ಸದ್ದು ಹೆಚ್ಚಾಗುತ್ತಿದೆ. ಕೋವಿಡ್-19 ಉಪಕರಣ ಖರೀದಿಯಲ್ಲಿ ಕೋಟ್ಯಂತರ ರೂ. ಅವ್ಯವಹಾರ ನಡೆದಿರುವ ಬಗ್ಗೆ ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ದಾಖಲೆ ಸಮೇತ ಆರೋಪ ಮಾಡುತ್ತಿದ್ದಾರೆ.

ಪ್ರತಿಪಕ್ಷ ಕಾಂಗ್ರೆಸ್​ನ ಆರೋಪವನ್ನು ಗಂಭೀರವಾಗಿ ತೆಗೆದುಕೊಂಡಿರುವ ಬಿಜೆಪಿ ಸರ್ಕಾರ, ಅವರ ಆರೋಪಕ್ಕೆ ಇಂಚಿಂಚಾಗಿ ಕೌಂಟರ್ ನೀಡಲು ತಮ್ಮ ಸಚಿವರನ್ನು ಕಣಕ್ಕಿಳಿಸಿದೆ. ಅಷ್ಟಕ್ಕೂ ಕಾಂಗ್ರೆಸ್ ಮಾಡುತ್ತಿರುವ ಆರೋಪ ಏನು? ಅದಕ್ಕೆ ಸರ್ಕಾರ ನೀಡುತ್ತಿರುವ ಸ್ಪಷ್ಟೀಕರಣ ಏನು ಎಂಬದರ ಸಂಪೂರ್ಣ ವರದಿ ಇಲ್ಲಿದೆ.

ಕಾಂಗ್ರೆಸ್ ಆರೋಪ ಏನು..?

ಕೋವಿಡ್ ಸಂಬಂಧ ಸರ್ಕಾರದ ವಿರುದ್ಧ ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ಹಾಗೂ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ ಭ್ರಷ್ಟಾಚಾರದ ಆರೋಪ ಮಾಡುತ್ತಿದ್ದಾರೆ. ಜಂಟಿ ಸುದ್ದಿಗೋಷ್ಠಿ ನಡೆಸಿ, ತಮಗೆ ಸಿಕ್ಕಿರುವ ದಾಖಲೆಯೊಂದಿಗೆ ಕೋವಿಡ್-19 ಪರಿಕರ ಖರೀದಿ ಸೇರಿದಂತೆ ಒಟ್ಟು 2,000 ಕೋಟಿ ರೂ. ಭ್ರಷ್ಟಾಚಾರ ನಡೆದಿದೆ ಎಂದು ಗಂಭೀರ ಆರೋಪ ಮಾಡಿದ್ದರು.

ಕೊರೊನಾಗಾಗಿ ಬಿಬಿಎಂಪಿಗೆ 200 ಕೋಟಿ ರೂ., ಆರೋಗ್ಯ ಇಲಾಖೆಗೆ 750 ಕೋಟಿ ರೂ., ಜಿಲ್ಲಾಡಳಿತಕ್ಕೆ ಎಸ್​​ಡಿಆರ್​ಎಫ್ ಮೂಲಕ 340 ಕೋಟಿ ರೂ., ಕಾರ್ಮಿಕ ಇಲಾಖೆ ಮೂಲಕ 1,000 ಕೋಟಿ ರೂ., ಶಿಕ್ಷಣ ಇಲಾಖೆಗೆ 815 ಕೋಟಿ. ರೂ., ಸಮಾಜ ಕಲ್ಯಾಣ, ಆಹಾರ, ಪೊಲೀಸ್, ಗೃಹ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ 500 ಕೋಟಿ ರೂ., ಹಾಸಿಗೆ ದಿಂಬು‌ ಖರೀದಿಗೆ 150 ಕೋಟಿ ರೂ., ಸೇರಿ ಒಟ್ಟು 4,167 ಕೋಟಿ ರೂ. ಮೊತ್ತದ ಖರೀದಿ ಮಾಡಲಾಗಿದೆ. ಆ ಮೂಲಕ ಸುಮಾರು 2 ಸಾವಿರ ಕೋಟಿ ರೂ. ಅಕ್ರಮ ಎಸಗಲಾಗಿದೆ ಎಂದು ಕಾಂಗ್ರೆಸ್​ ಗಂಭೀರ ಆರೋಪ ಮಾಡಿದೆ.

ಆರೋಗ್ಯ ಇಲಾಖೆ 9.65 ಲಕ್ಷ ಪಿಪಿಇ ಕಿಟ್ ಖರೀದಿ ಮಾಡಿದೆ. ಮಾರುಕಟ್ಟೆಯಲ್ಲಿ ಒಂದು ಕಿಟ್​​​​ ಬೆಲೆ 330 ರೂ.ಇದೆ. ಇದರಲ್ಲಿ ಮಹಾರಾಷ್ಟ್ರದ ಖಾಸಗಿ ಸಂಸ್ಥೆಯೊಂದರಿಂದ 3.5 ಲಕ್ಷ ಕಿಟ್ ಖರೀದಿಸಿದ್ದರು. ಇದು ಕಳಪೆ ಎಂದು ಆರೋಪಿಸಿದ ಮೇಲೆ 1.20 ಲಕ್ಷ ಕಿಟ್ ವಾಪಸ್ ಮಾಡಲಾಯಿತು. ಇವು ಒಂದಕ್ಕೆ 2,117 ರೂ. ಕೊಟ್ಟು ಕೊಳ್ಳಲಾಗಿತ್ತು ಎಂದು ಆರೋಪಿಸಲಾಗಿದೆ.

10 ಲಕ್ಷ ಮಾಸ್ಕ್ ಖರೀದಿ ಆಗಿದ್ದು, ಎನ್ 95 ಮಾಸ್ಕ್ ಮಾರುಕಟ್ಟೆ ಬೆಲೆ 50-60 ರೂ. ಆದರೆ ಸರ್ಕಾರ 120 ರಿಂದ 160 ರೂ. ನೀಡಿ ಮಾಸ್ಕ್ ಖರೀದಿಸಿದೆ. ಅದೇ ರೀತಿ ಥರ್ಮಲ್ ಸ್ಕ್ಯಾನರ್ ಬೆಲೆ 1,500 -2000 ರೂ. ಇದ್ದು, ಅದಕ್ಕೆ 5,945 ರೂ. ನೀಡಿ ಖರೀದಿಸಲಾಗಿದೆ.

ಇದಲ್ಲದೆ 500 ಎಂ.ಎಲ್. ಸ್ಯಾನಿಟೈಸರ್ ಅನ್ನು ಆರೋಗ್ಯ ಇಲಾಖೆ 250 ರೂ. ನೀಡಿ ಖರೀದಿಸಿದೆ. ಸಮಾಜ ಕಲ್ಯಾಣ ಇಲಾಖೆ 600 ರೂ. ಕೊಟ್ಟು ಸ್ಯಾನಿಟೈಸರ್ ಖರೀದಿಸಿದೆ ಎಂದು ಆರೋಪಿಸಿದ್ದಾರೆ. ಈ ಅಕ್ರಮ ಸಂಬಂಧ ಸರ್ಕಾರ ನ್ಯಾಯಾಂಗ ತನಿಖೆ ನಡೆಸಬೇಕೆಂದು ಆಗ್ರಹಿಸಿದ್ದಾರೆ.

ಸರ್ಕಾರದ ಸ್ಪಷ್ಟನೆ ಏನು..?

ಕಾಂಗ್ರೆಸ್ ಭ್ರಷ್ಟಾಚಾರ ಆರೋಪಕ್ಕೆ ಪ್ರತಿಯಾಗಿ ಸಿಎಂ ಯಡಿಯೂರಪ್ಪ ತಮ್ಮ ಸಪ್ತ ಸಚಿವರನ್ನು ಕಣಕ್ಕಿಳಿಸಿ, ಕೌಂಟರ್ ನೀಡುತ್ತಿದ್ದಾರೆ.

ಒಂದೆಡೆ ಪಂಚ ಸಚಿವರು ನಿನ್ನೆ ಸುದ್ದಿಗೋಷ್ಠಿ ನಡೆಸಿ ದಾಖಲೆ ಸಮೇತ ಕೋವಿಡ್ ಖರ್ಚು-ವೆಚ್ಚಗಳ ಬಗ್ಗೆ ಲೆಕ್ಕ ಕೊಟ್ಟರು. ಇತ್ತ ಸಮಾಜ‌ ಕಲ್ಯಾಣ ಇಲಾಖೆ ಸಚಿವ ಗೋವಿಂದ ಕಾರಜೋಳ ಇಂದು ದಾಖಲೆ ಸಮೇತ ಕಾಂಗ್ರೆಸ್ ಆರೋಪಕ್ಕೆ ಸ್ಪಷ್ಟೀಕರಣ ನೀಡಿದರು.

ಕೋವಿಡ್ ಸಂಬಂಧ ಸರ್ಕಾರ ಒಟ್ಟು 4,167 ಕೋಟಿ ರೂ. ಖರ್ಚು ಮಾಡಿದೆ ಎಂದು ಕಾಂಗ್ರೆಸ್ ಆರೋಪಿಸಿದೆ. ಆದರೆ ಎಲ್ಲಾ ಇಲಾಖೆಗಳಿಗೆ ಒಟ್ಟು 506 ಕೋಟಿ ರೂ. ಮೊತ್ತವನ್ನು ಕೋವಿಡ್ ನಿಯಂತ್ರಣ ಸಂಬಂಧ ಬಿಡುಗಡೆ ಮಾಡಲಾಗಿದೆ. ಪರಿಹಾರ ಕ್ರಮಗಳಿಗೆ 1611.7 ಕೋಟಿ ರೂ. ಬಿಡುಗಡೆ ಮಾಡಲಾಗಿದೆ. ಒಟ್ಟು 2,118 ಕೋಟಿ ರೂ. ಮಾತ್ರ ಖರ್ಚಾಗಿದೆ ಎಂದು ದಾಖಲೆ ಸಮೇತರಾಗಿ ತಿರುಗೇಟು ನೀಡಿದ್ದಾರೆ.

ವೈದ್ಯಕೀಯ ಸಲಕರಣೆ ಖರೀದಿಗಾಗಿ ಆರೋಗ್ಯ ಇಲಾಖೆ 366.70 ಕೋಟಿ ರೂ., ವೈದ್ಯಕೀಯ ಶಿಕ್ಷಣ ಇಲಾಖೆ 33 ಕೋಟಿ ರೂ‌‌., ಎಲ್ಲಾ ಡಿಸಿಗಳಿಗೆ 68.02 ಕೋಟಿ ರೂ., ಜಿಲ್ಲಾ ಮಿನರಲ್ ಫಂಡ್​ಗೆ 23.97 ಕೋಟಿ ರೂ., ಕಾರ್ಮಿಕ ಇಲಾಖೆಗೆ 4.25 ಕೋಟಿ ರೂ., ಗೃಹ ಇಲಾಖೆಗೆ 5.62 ಕೋಟಿ ರೂ., ಕಾರಾಗೃಹ ಇಲಾಖೆಗೆ 1.05 ಕೋಟಿ ರೂ., ಸಾರಿಗೆ ಇಲಾಖೆಗೆ 2.36 ಕೋಟಿ ರೂ., ಬಿಬಿಎಂಪಿಗೆ 86 ಲಕ್ಷ ರೂ., ಸಮಾಜ ಕಲ್ಯಾಣ ಇಲಾಖೆಗೆ 65 ಲಕ್ಷ ರೂ. ಸೇರಿ ಒಟ್ಟು 506 ಕೋಟಿ ರೂ. ವೆಚ್ಚ ಮಾಡಲಾಗಿದೆ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.

ಕಾಂಗ್ರೆಸ್ ಸುಳ್ಳು ಆರೋಪ ಮಾಡುವ ಮೂಲಕ ಜನರ ದಾರಿ ತಪ್ಪಿಸುತ್ತಿದೆ. ಕೋವಿಡ್​ನಂಥಹ ಈ ಸಂದರ್ಭದಲ್ಲಿ ಆಧಾರ ರಹಿತ ಆರೋಪ ಮಾಡಿ ಅಧಿಕಾರಿಗಳ ಮನೋಬಲ ಕುಗ್ಗಿಸುವ ಕೆಲಸ‌ ಮಾಡುತ್ತಿದೆ. ಸುಳ್ಳು ಆರೋಪಗಳಿಗೆ ತನಿಖೆ ಮದ್ದಲ್ಲ ಎಂದು ಹೇಳುವ ಮೂಲಕ ಸರ್ಕಾರ ಆರೋಪಗಳನ್ನು ಸಾರಾಸಗಟಾಗಿ ಅಲ್ಲಗಳೆದಿದೆ.