ನಾಳೆಯಿಂದ 45 ವರ್ಷ ಮೇಲ್ಪಟ್ಟವರಿಗೆ ಕೋವಿಡ್​ ಲಸಿಕೆ..

ಕೋವಿನ್ ಆ್ಯಪ್ ಅಥವಾ ಸ್ಥಳದಲ್ಲೇ ರಿಜಿಸ್ಟರ್ ಮಾಡಿಕೊಂಡು ವ್ಯಾಕ್ಸಿನ್ ಪಡೆಯಬಹುದು. ಆಧಾರ್ ಕಾರ್ಡ್ ಅಥವಾ ನಿಗದಿತ ಐಡಿ ಕಾರ್ಡ್ ತೋರಿಸಿ, 45 ವರ್ಷ ಮೇಲ್ಫಟ್ಟವರು ಲಸಿಕೆ ಪಡೆಯಬಹುದಾಗಿದೆ ಎಂದು ಬಿಬಿಎಂಪಿ ಸಾರ್ವಜನಿಕ ಆರೋಗ್ಯ ಅಧಿಕಾರಿ ವಿಜಯೇಂದ್ರ ತಿಳಿಸಿದರು..

ಬೆಂಗಳೂರು :ಕೇಂದ್ರ ಸರ್ಕಾರದ ಮಾರ್ಗಸೂಚಿಯಂತೆ ಏಪ್ರಿಲ್‌ 1ರಿಂದ 45 ವರ್ಷ ಮೇಲ್ಪಟ್ಟವರಿಗೆ ಕೋವಿಡ್ ಲಸಿಕೆ ವಿತರಣೆ ಆರಂಭವಾಗಲಿದೆ. ಈ ಹಿನ್ನೆಲೆ ಆರೋಗ್ಯ ಉಪ ಕೇಂದ್ರಗಳು, ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಸೇರಿ ವಿವಿಧೆಡೆ ಲಸಿಕೆ ವಿತರಣೆಗೆ ಆರೋಗ್ಯ ಇಲಾಖೆ ಸಿದ್ಧತೆ ಮಾಡಿಕೊಂಡಿದೆ.

ಕೋವಿಡ್ ಹೆಚ್ಚಳ ಹಿನ್ನೆಲೆ, ಲಸಿಕೆ ವಿತರಿಸಲು ಕೋವಿಡ್ ತಾಂತ್ರಿಕ ಸಲಹಾ ಸಮಿತಿ ಕೂಡ ಶಿಫಾರಸು ಮಾಡಿದೆ. ಹೀಗಾಗಿ, ಇಲಾಖೆಯು ದಿನವೊಂದಕ್ಕೆ 3 ಲಕ್ಷ ಲಸಿಕೆ ವಿತರಿಸುವ ಗುರಿ ಹೊಂದಿದೆ. ಸದ್ಯ 3500ಕ್ಕೂ ಅಧಿಕ ಕೇಂದ್ರಗಳಲ್ಲಿ ಲಸಿಕೆ ವಿತರಿಸಲಾಗ್ತಿದೆ. ರಾಜ್ಯದ 8,871 ಆರೋಗ್ಯ ಉಪಕೇಂದ್ರಗಳನ್ನು ಕೂಡ ಹಂತ ಹಂತವಾಗಿ ಲಸಿಕೆ ಕೇಂದ್ರವಾಗಿ ಪರಿವರ್ತಿಸಲು ಆರೋಗ್ಯ ಇಲಾಖೆ ನಿರ್ಧರಿಸಿದೆ.

ಈವರೆಗೆ ಕೋವಿಡ್ ಲಸಿಕೆ ಪಡೆದವರ ವಿವರ :

• ರಾಜ್ಯದಲ್ಲಿ ಮಂಗಳವಾರ 45-59 ವರ್ಷದವರೆಗಿನ ಇತರ ಕಾಯಿಲೆ ಇರುವ ಜನರು ಒಟ್ಟು 14,789 ಮಂದಿ ಮೊದಲ ಡೋಸ್ ಪಡೆದಿದ್ದು, 102 ಮಂದಿ 2ನೇ ಡೋಸ್ ಪಡೆದಿದ್ದಾರೆ.
• 60 ವರ್ಷ ಮೇಲ್ಪಟ್ಟ 29,314 ಮಂದಿ ಕೋವಿಡ್ ಮೊದಲನೇ ಡೋಸ್ ಹಾಗೂ 417 ಮಂದಿ 2ನೇ ಡೋಸ್ ಪಡೆದಿದ್ದಾರೆ.
• ಒಟ್ಟಿನಲ್ಲಿ 35,90,581 ಮಂದಿ ರಾಜ್ಯದಲ್ಲಿ ಈವರೆಗೆ ಕೋವಿಡ್ ಲಸಿಕೆ ಪಡೆದಿದ್ದಾರೆ.

ಬೆಂಗಳೂರಲ್ಲಿ ಸಿದ್ಧತೆ :ಬಿಬಿಎಂಪಿ ಲಸಿಕಾ ದಾಸ್ತಾನು ಕೇಂದ್ರದಲ್ಲಿ ಸಾಕಷ್ಟು ವ್ಯಾಕ್ಸಿನ್ ದಾಸ್ತಾನಿದೆ. ಅಗತ್ಯ ಹಾಗೂ ಬೇಡಿಕೆಗೆ ತಕ್ಕಂತೆ ಪೂರೈಕೆ ಮಾಡಲಾಗುವುದು. 450 ರಿಂದ 480 ರವರೆಗೆ ಲಸಿಕಾ ಕೇಂದ್ರಗಳಿವೆ.

ಕೋವಿನ್ ಆ್ಯಪ್ ಅಥವಾ ಸ್ಥಳದಲ್ಲೇ ರಿಜಿಸ್ಟರ್ ಮಾಡಿಕೊಂಡು ವ್ಯಾಕ್ಸಿನ್ ಪಡೆಯಬಹುದು. ಆಧಾರ್ ಕಾರ್ಡ್ ಅಥವಾ ನಿಗದಿತ ಐಡಿ ಕಾರ್ಡ್ ತೋರಿಸಿ, 45 ವರ್ಷ ಮೇಲ್ಫಟ್ಟವರು ಲಸಿಕೆ ಪಡೆಯಬಹುದಾಗಿದೆ ಎಂದು ಬಿಬಿಎಂಪಿ ಸಾರ್ವಜನಿಕ ಆರೋಗ್ಯ ಅಧಿಕಾರಿ ವಿಜಯೇಂದ್ರ ತಿಳಿಸಿದರು.

ಓದಿ:ರಾಜ್ಯದಲ್ಲಿಂದು 4,225 ಸೋಂಕಿತರು ಪತ್ತೆ, 26 ಬಲಿ