ಬೆಂಗಳೂರು:ನಗರದ ಮೇಯೋ ಹಾಲ್ನ ನಗರ ಸಿವಿಲ್ ನ್ಯಾಯಾಲಯಕ್ಕೆ ಪೊಲೀಸರು ಹಾಜರುಪಡಿಸಿದ್ದ, ಆರೋಪಿಗೆ ಕೊರೊನಾ ಪತ್ತೆಯಾದ ಹಿನ್ನೆಲೆ ನ್ಯಾಯಾಧೀಶರು ಹಾಗೂ ಕೋರ್ಟ್ ಸಿಬ್ಬಂದಿಯನ್ನು ಕ್ವಾರಂಟೈನ್ಗೆ ಒಳಪಡಿಸಲಾಗಿದೆ.
ಜೂನ್. 1ರಂದು ನ್ಯಾಯಾಲಯಕ್ಕೆ ಕೊರೊನಾ ಪೀಡಿತ ಆರೋಪಿ ಆಗಮಿಸಿದ್ದ ಹಿನ್ನೆಲೆ ಮೇಯೋ ಹಾಲ್ ಕೋರ್ಟ್ನ 10ನೇ ಎಸಿಎಂಎಂ ನ್ಯಾಯಾಧೀಶರು, ಬೆಂಚ್ ಕ್ಲರ್ಕ್ಗಳು, ಕೇಸ್ ವರ್ಕಸ್ ಹಾಗೂ ಇಬ್ಬರು ವಕೀಲರನ್ನು ಕಡ್ಡಾಯ ಕ್ವಾರಂಟೈನ್ಗೆ ಒಳಪಡಿಸಲಾಗಿದೆ.
ಈ ಕುರಿತು ಬೆಂಗಳೂರು ವಕೀಲರ ಸಂಘ ತನ್ನ ಸದಸ್ಯ ವಕೀಲರಿಗೆ ಎಚ್ಚರಿಕೆಯಿಂದ ಮತ್ತು ಸುರಕ್ಷತೆಯಿಂದ ಕೆಲಸ ಮಾಡುವಂತೆ ಸೂಚನೆ ನೀಡಿದೆ. ಜೂನ್. 1 ರಂದು ಬೆಂಗಳೂರಿನ ಮೇಯೋ ಹಾಲ್ ನ್ಯಾಯಾಲಯಗಳ ಸಂಕೀರ್ಣದಲ್ಲಿರುವ 10ನೇ ಎಸಿಎಂಎಂ ಕೋರ್ಟ್ಗೆ ಲೈಂಗಿಕ ಕಿರುಕುಳ ಪ್ರಕರಣದಲ್ಲಿ ಬಂಧಿತನಾಗಿದ್ದ ಆರೋಪಿಯನ್ನು ಜೀವನ್‌ ಭೀಮಾ ನಗರ ಠಾಣೆ ಪೊಲೀಸರು ಹಾಜರುಪಡಿಸಿದ್ದರು.
ಕೆಲ ಕಾಲ ಅಲ್ಲಿಯೇ ಇದ್ದ ಆರೋಪಿಯನ್ನು ಕೋರ್ಟ್ ಅಂತಿಮವಾಗಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿತ್ತು. ಇದಕ್ಕೂ ಮುನ್ನ ಆರೋಪಿಗೆ ವೈದ್ಯಕೀಯ ತಪಾಸಣೆ ನಡೆಸಲಾಗಿತ್ತು. ಆರೋಪಿಯ ಈ ವೈದ್ಯಕೀಯ ವರದಿ ಹೊರಬಂದಾಗ ಆತನಿಗೆ ಸೋಂಕು ಇರುವುದು ದೃಢಪಟ್ಟಿತ್ತು.