ಯಾರೂ ಬರ್ತಿಲ್ಲ, ಎಲ್ಲಿಗೂ ಹೋಗುವಂತಿಲ್ಲ: ವೃತ್ತಿ ಆಯ್ಕೆ‌ ಬಗ್ಗೆ ಲೈಂಗಿಕ ಕಾರ್ಯಕರ್ತೆಯ ನೋವಿನ ಮಾತು

ಲಾಕ್​​​ಡೌನ್​​ನಿಂದ ಲೈಂಗಿಕ ಕಾರ್ಯಕರ್ತೆಯರಿಗೆ ಒಂದೊತ್ತು ಊಟಕ್ಕೂ ಪರದಾಡುವಂತ ಪರಿಸ್ಥಿತಿ ನಿರ್ಮಾಣವಾಗಿದೆ. ಹೆಚ್​​ಐವಿ ಸೋಂಕಿನಿಂದ ಬಳಲುತ್ತಿದ್ದವರಿಗೆ ಚಿಕಿತ್ಸೆಗೆ ಹಣವಿಲ್ಲದೇ, ಕಣ್ಣೀರಲ್ಲಿ‌ ದಿನ ಕಳೆಯುವಂತಾಗಿದೆ.

ಬೆಂಗಳೂರು:ಕೊರೊನಾ ವೈರಸ್​​​ ಲೈಂಗಿಕ ಕಾರ್ಯಕರ್ತೆಯರ ಬದುಕಿನ ಜೊತೆ ಆಟವಾಡುತ್ತಿದ್ದು, ಒಂದೊತ್ತಿನ ಊಟಕ್ಕೂ ಪರದಾಡುವಂತಾಗಿದೆ. ಜೀವನ ಸಾಗಿಸುವುದಕ್ಕೆ ಹಾಗೂ ಹೆಚ್​​ಐವಿ ಸೋಂಕಿನಿಂದ ಬಳಲುತ್ತಿದ್ದವರಿಗೆ ಚಿಕಿತ್ಸೆ ಹಣವಿಲ್ಲದೇ, ಕಣ್ಣೀರಲ್ಲಿ‌ ದಿನ ಕಳೆಯುವಂತೆ ಆಗಿದೆ.

ರಾಜ್ಯದ ಕೆಸಾಫ್ಟ್​ ಅಡಿಯಲ್ಲಿ‌ ಸುಮಾರು 96,878 ಮಂದಿ ತಮ್ಮ ಹೆಸರನ್ನ ನೋಂದಾಯಿಸಿದ್ದು, ಇವರೆಲ್ಲಾ‌ ಸದ್ಯ ಲೈಂಗಿಕ ಚಟುವಟಿಕೆಯಲ್ಲಿ ಭಾಗಿಯಾಗದೆ ಮನೆಯಲ್ಲಿದ್ದಾರೆ. ಬಡತನ, ಹೃದಯ ರೋಗ, ಬಾಲ್ಯ ವಿವಾಹ, ‌ಅನಕ್ಷರತೆ ಹಾಗೂ ಮಾನವ ಕಳ್ಳಸಾಗಣೆ, ಹೀಗೆ‌ ಬೇರೆ ಬೇರೆ ಕಾರಣಗಳಿಂದ ಇವರು ಈ ವೃತ್ತಿ ಆಯ್ಕೆ ‌‌ಮಾಡಿಕೊಂಡು ಅದರಲ್ಲೇ ಜೀವನ ಕಟ್ಟಿಕೊಂಡವರು. ಆದ್ರೆ ಮಹಾಮಾರಿ ಕೊರೊನಾ ಇವರಿಗೂ ಸಂಕಷ್ಟ ತಂದೊಡ್ಡಿದೆ.

ಲಾಕ್​ಡೌನ್​​​ನಿಂದ ಲೈಂಗಿಕ ಕಾರ್ಯಕರ್ತೆಯರು ತೊಂದರೆಗೀಡಾಗಿದ್ದು, ಯಾವುದಾದರೂ ಉದ್ಯೋಗ ಕೊಡಿ ಎಂದು‌ ಅಂಗಲಾಚುತ್ತಿದ್ದಾರೆ. ಹೆಸರು ಹೇಳಲು ಇಷ್ಟ ಪಡದ ಲೈಂಗಿಕ ಕಾರ್ಯಕರ್ತೆಯೊಬ್ಬರು ಈಟಿವಿ ಭಾರತ ಜೊತೆ‌ ಮಾತನಾಡಿ,‌ ಸರ್ಕಾರ ಅಥವಾ ಯಾರಾದರೂ ಸಹೃದಯಿಗಳು ತಮಗೆ ಸಹಾಯ ‌ಮಾಡಿ ಎಂದು ಅಂಗಲಾಚಿದ್ದಾರೆ.