ಬೆಂಗಳೂರು: ಸಹಪಾಠಿಯ ಜನ್ಮದಿನಾಂಕವನ್ನ ಹೇಳಲು ನಿರಾಕರಿಸಿದ ಎಂಬ ಕಾರಣಕ್ಕೆ ಗುಂಪು‌ಕಟ್ಟಿಕೊಂಡು ಆತನ ಸ್ನೇಹಿತನ ಮೇಲೆ ಹಲ್ಲೆ ಮಾಡಿರುವ ಘಟನೆ ಜೆ.ಪಿ.ನಗರ ಮೂರನೇ ಹಂತದ ಖಾಸಗಿ ಕಾಲೇಜು ಬಳಿ ನಡೆದಿದೆ. ದ್ವಿತೀಯ ಪಿಯು ವಿದ್ಯಾರ್ಥಿ ಮೇಲೆ ಹಲ್ಲೆ ಮಾಡಿದ ಆರೋಪದಡಿ ಆತನ ಕಿರಿಯ ವಿದ್ಯಾರ್ಥಿನಿ, ಆಕೆಯ ಸಹೋದರ ಮತ್ತು ಆತನ ಸ್ನೇಹಿತರು ಸೇರಿದಂತೆ ಆರು ಜನರ ವಿರುದ್ಧ ಪ್ರಕರಣ ದಾಖಲಾಗಿದೆ.
ದೂರುದಾರ ವಿದ್ಯಾರ್ಥಿ ದ್ವಿತೀಯ ಪಿಯುಸಿ ವ್ಯಾಸಂಗ ಮಾಡುತ್ತಿದ್ದ. ಅದೇ ಕಾಲೇಜಿಗೆ ಪ್ರಥಮ ಪಿಯುಸಿಗೆ ದೂರುದಾರನ ಸ್ನೇಹಿತ ಸಹ ಪ್ರವೇಶ ಪಡೆದಿದ್ದ. ಜುಲೈ 22ನೇ ತಾರೀಖು ಕಾಲೇಜಿನಲ್ಲಿ ನಡೆದ ಹೊಸ ವಿದ್ಯಾರ್ಥಿಗಳ ಆಹ್ವಾನ ಸಮಾರಂಭದಲ್ಲಿ ಆರೋಪಿ ವಿದ್ಯಾರ್ಥಿನಿಯ ಪರಿಚಯವಾಗಿತ್ತು. ಜುಲೈ 24ರಂದು ದೂರುದಾರ ವಿದ್ಯಾರ್ಥಿಯನ್ನ ಕರೆದೊಯ್ದಿದ್ದ. ಈ ವೇಳೆ, ಆರೋಪಿ ವಿದ್ಯಾರ್ಥಿನಿ ದೂರುದಾರನ ಸ್ನೇಹಿತನ ಜನ್ಮ ದಿನಾಂಕದ ಬಗ್ಗೆ ಕೇಳಿದ್ದರು. ಆದರೆ 'ತನಗೆ ಗೊತ್ತಿಲ್ಲ' ಎಂದು ದೂರುದಾರ ವಿದ್ಯಾರ್ಥಿ ಆಕೆಗೆ ತಿಳಿಸಿದ್ದ. ಈ ವೇಳೆ, 'ನಿನ್ನ ಸ್ನೇಹಿತನ ಜನ್ಮ ದಿನಾಂಕ ಹೇಳಲಿಲ್ವಲ್ಲಾ, ನಾನು ಯಾರು ಅಂತಾ ತೋರಿಸ್ತೀನಿ' ಅಂತಾ ಆರೋಪಿ ವಿದ್ಯಾರ್ಥಿನಿ ಬೆದರಿಸಿದ್ದಳು. ಮಾರನೇ ದಿನ ತನ್ನ ಸಹೋದರ ಸೇರಿದಂತೆ ಐವರನ್ನ ಕಾಲೇಜು ಬಳಿ ಕರೆಸಿ ಹಿರಿಯ ವಿದ್ಯಾರ್ಥಿಯ ಮೇಲೆ ಹಲ್ಲೆ ಮಾಡಿಸಿದ್ದಾಳೆ. ಬಳಿಕ ಈ ಬಗ್ಗೆ ಯಾರಿಗೂ ಹೇಳದಂತೆ ಬೆದರಿಸಿ ತೆರಳಿದ್ದಾರೆ ಎಂದು ಹಲ್ಲೆಗೊಳಗಾದ ವಿದ್ಯಾರ್ಥಿ ದೂರಿದ್ದಾನೆ.
ಸದ್ಯ ಘಟನೆ ಸಂಬಂಧ ಗಾಯಾಳು ವಿದ್ಯಾರ್ಥಿ ನೀಡಿರುವ ದೂರಿನನ್ವಯ ಜೆ.ಪಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ವಿಚಾರಣೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.