ಬೆಂಗಳೂರು ಶಾಸಕರ ಜೊತೆ ಸಿಎಂ ಸಭೆ... ಕೊಟ್ಟ ಸಲಹೆಗಳೇನು?

ಕೊರೊನಾ ನಿಯಂತ್ರಿಸುವ ಕ್ರಮಗಳಿಗೆ ಸಂಬಂಧಿಸಿದಂತೆ ಸಿಎಂ ಬಿಎಸ್​​ವೈ, ಶಾಸಕರು, ಎಂಎಲ್‌ಸಿಗಳ ಜೊತೆ ಸುದೀರ್ಘ ಚರ್ಚೆ ನಡೆಸಿದ್ದಾರೆ.

ಬೆಂಗಳೂರು:ರಾಜಧಾನಿಕೊರೊನಾ ವೈರಸ್​​ನ ಹಾಟ್ ಸ್ಪಾಟ್ ಆಗಿರುವುದರಿಂದ ಬೆಂಗಳೂರು ಶಾಸಕರು, ಎಂಎಲ್‌ಸಿಗಳ ಜೊತೆ ಸಿಎಂ ಸುದೀರ್ಘ ಚರ್ಚೆ ನಡೆಸಿದರು. ಪ್ರಮುಖವಾಗಿ ಬಡವರಿಗೆ ಆಹಾರ ವಿತರಣೆ, ಲಾಕ್‌ಡೌನ್​ನ ಕಠಿಣ ಅನುಷ್ಠಾನದ ಬಗ್ಗೆ ಶಾಸಕರು ಸಿಎಂಗೆ ಸಲಹೆ ಸೂಚನೆಗಳನ್ನು ನೀಡಿದರು.

ಸಭೆಯಲ್ಲಿ ಶಾಸಕರು ಲಾಕ್​​ಡೌನ್ ವೇಳೆ‌ ಜನರು ಬೇಕಾಬಿಟ್ಟಿ ಓಡಾಡುತ್ತಿರುವ ಬಗ್ಗೆ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದರು. ಸುಮ್ಮನೆ ಓಡಾಡುವ ಜನರ‌ ಮೇಲೆ ಪೊಲೀಸರಿಗೆ ಕಠಿಣ ಕ್ರಮ ಕೈಗೊಳ್ಳಲು ಸರ್ಕಾರ ಸೂಚನೆ ನೀಡಬೇಕು. ಲಾಕ್​​ಡೌನ್ ಮೊದಲ ನಾಲ್ಕು ದಿನ ಅಷ್ಟೇ ಪಾಲನೆ ಆಗಿದೆ. ಆದರೆ, ಈಗ ಜನರು ಸುಖಾಸುಮ್ಮನೆ ಓಡಾಡುತ್ತಿದ್ದಾರೆ. ಹೀಗಾಗಿ ಲಾಕ್​​ಡೌನ್ ಕಟ್ಟುನಿಟ್ಟಾಗಿ ಪಾಲಿಸುವಂತೆ ಮಾಡಬೇಕು ಎಂದು ಒತ್ತಾಯಿಸಿದ್ದಾರೆ.

ಇಂದಿರಾ ಕ್ಯಾಂಟೀನ್​​ನಲ್ಲಿ ಉಚಿತ ಆಹಾರ ನೀಡಿ:
ಇಂದಿರಾ ಕ್ಯಾಂಟೀನ್​ನಲ್ಲಿ ಉಚಿತವಾಗಿ ಆಹಾರ ನೀಡುತ್ತಿರುವುದನ್ನು ಮುಂದುವರೆಸುವಂತೆ ಹಲವರು ಮನವಿ ಮಾಡಿದರು. ಊಟ ಇಲ್ಲದೇ ಜನರು ಪರದಾಡುತ್ತಿದ್ದಾರೆ, ಊಟ ನೀಡಿ. ಬಡವರಿಗೆ ಮಾಸ್ಕ್​ಗಳನ್ನೂ ಕೊಡುವಂತೆ ಮನವಿ ಮಾಡಿದರು.

ಪ್ರತಿಯೊಂದು ವಿಧಾನಸಭಾ ಕ್ಷೇತ್ರದಲ್ಲಿ ಕೊರೊನಾ ವಾರ್ ರೂಂ ಓಪನ್ ಮಾಡುವಂತೆ ಹಲವರು ಸಲಹೆ ನೀಡಿದ್ದಾರೆ. ಕ್ವಾರಂಟೈನ್ ಸಮಯ ಮುಗಿದವರು ಹೊರಗೆ ಬರಲು ಅಧಿಕಾರಿಗಳ ಮೇಲೆ ಒತ್ತಡ ಹೇರುತ್ತಿದ್ದಾರೆ. ಏಪ್ರಿಲ್‌ 14ರವರೆಗೂ ಅವರ ಕ್ವಾರಂಟೈನ್ ಕಡ್ಡಾಯವಾಗಿ ಮುಂದುವರೆಸಬೇಕು ಎಂದು ತಿಳಿಸಿದರು. ಇದೇ ವೇಳೆ ಏಪ್ರಿಲ್ 14ರ ಬಳಿಕ ಹಂತ ಹಂತವಾಗಿ ಲಾಕ್​​ಡೌನ್ ಸಡಿಲಗೊಳ್ಳುವ ನಿರೀಕ್ಷೆ ಇದೆ ಎಂದು ಸಿಎಂ ವಿಶ್ವಾಸ ವ್ಯಕ್ತಪಡಿಸಿದರು.

ಸರಳ ಕರಗಕ್ಕೆ ಅನುಮತಿ:
ಯಾರ ಕಾಲದಲ್ಲಿಯೂ ಕರಗ ನಿಂತಿಲ್ಲ. ಟಿಪ್ಪು ಸುಲ್ತಾನನ ಕಾಲದಲ್ಲೂ ನಿಂತಿಲ್ಲ, ಪ್ಲೇಗ್ ಬಂದಾಗಲೂ ಕರಗ ನಿಂತಿಲ್ಲ. ಹೀಗಾಗಿ ಕರಗ ನಡೆಸಲು ಅನುಮತಿ ಕೊಡಿ ಎಂದು ಕೆಲ ಶಾಸಕರು ಮನವಿ ಮಾಡಿದರು. ನಾಲ್ಕು ಜನರಿಗೆ ಅವಕಾಶ ನೀಡಿ ಸರಳವಾಗಿ ಕರಗ ಆಚರಿಸುವಂತೆ ಮಾಡಿ ಎಂದು ಎಂಎಲ್‌ಸಿ ಪಿ.ಆರ್.ರಮೇಶ್ ಮನವಿ ಮಾಡಿದರು. ಸಚಿವರಾದ ಆರ್.ಅಶೋಕ್, ವಿ.ಸೋಮಣ್ಣನೂ ಇದಕ್ಕೆ ಒಪ್ಪಿಗೆ ಸೂಚಿಸಿದರು. ಬಳಿಕ ವಿಶ್ವವಿಖ್ಯಾತ ಬೆಂಗಳೂರು ಕರಗವನ್ನು ಸರಳವಾಗಿ ಆಚರಿಸಲು ಸಿಎಂ ಗ್ರೀನ್ ಸಿಗ್ನಲ್ ನೀಡಿದರು.