ಬೆಂಗಳೂರು: ಕೋವಿಡ್ ವ್ಯಾಪಕವಾಗಿ ಹರಡಿದ್ರೂ ನಗರದ ಪೌರಕಾರ್ಮಿಕರಿಗಿಲ್ಲ ರಕ್ಷಣೆ

ಬೆಂಗಳೂರಿನಲ್ಲಿ ಕೋವಿಡ್ ಎರಡನೇ ಅಲೆ ಅಬ್ಬರಿಸುತ್ತಿದ್ದರೂ ಪೌರಕಾರ್ಮಿಕರು ಮಾತ್ರ ಯಾವುದೇ ಸುರಕ್ಷತೆ ಇಲ್ಲದೇ ಪ್ರಾಣ ಪಣಕ್ಕಿಟ್ಟು ಕೆಲಸ ಮಾಡುತ್ತಿದ್ದಾರೆ.

ಬೆಂಗಳೂರು: ನಗರದಲ್ಲಿ ನಿತ್ಯ ಕೋವಿಡ್ ಉಲ್ಬಣಗೊಳ್ಳುತ್ತಿದ್ದು, 35,789 ಸೋಂಕಿತರು ಆಸ್ಪತ್ರೆ ಹಾಗೂ ಮನೆಗಳಲ್ಲಿ ಐಸೋಲೇಟ್ ಆಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ನಡುವೆ ನಿತ್ಯ ಮನೆಯಿಂದ ಕಸ ತೆಗೆದುಕೊಳ್ಳುತ್ತಿರುವ ಪೌರಕಾರ್ಮಿಕರಿಗೆ ರಕ್ಷಣೆ ಇಲ್ಲದಂತಾಗಿದೆ.

ಕಳೆದ ವರ್ಷ ಕಂಟೇನ್​ಮೆಂಟ್​ ಝೋನ್​ಗಳ ಕಸ ತಗೆದುಕೊಳ್ಳುವ ಪೌರಕಾರ್ಮಿಕರಿಗೆ ಪಿಪಿಇ ಕಿಟ್ ನೀಡಲಾಗಿತ್ತು. ಆದರೆ, ಈ ಬಾರಿ 48 ಕಂಟೇನ್​ಮೆಂಟ್​ ಝೋನ್​​ಗಳಿದ್ದರೂ ಪೌರಕಾರ್ಮಿಕರಿಗೆ ಯಾವುದೇ ಸುರಕ್ಷತಾ ವ್ಯವಸ್ಥೆ ಮಾಡಿಲ್ಲ. ಕಳೆದ ಎರಡು ಮೂರು ದಿನಗಳಿಂದ ಧರ್ಮರಾಯ ಟೆಂಪಲ್ ವಾರ್ಡ್​ನಲ್ಲಿ 95 ಪಾಸಿಟಿವ್ ಪ್ರಕರಣಗಳು ದಾಖಲಾಗಿದ್ದು, ಹೆಚ್ಚಿನ ಜನ ಹೋಂ ಕ್ವಾರಂಟೈನ್​ನಲ್ಲೇ ಇದ್ದಾರೆ. ಆದರೆ, ಈ ಮನೆಗಳಿಂದ ಕಸ ತೆಗೆದುಕೊಳ್ಳುತ್ತಿರುವ ಪೌರಕಾರ್ಮಿಕರಿಗೆ ಯಾವುದೇ ರೀತಿಯ ರಕ್ಷಣೆ ನೀಡಿಲ್ಲ. ಕೋವಿಡ್ ಎರಡನೇ ಅಲೆ ವೇಗವಾಗಿ ಹರಡುತ್ತಿರುವುದರಿಂದ ಜೀವ ಭಯದಲ್ಲೇ ಕೆಲಸ ಮಾಡುವ ಅನಿವಾರ್ಯತೆ ಎದುರಾಗಿದೆ.

ಕಳೆದ ಬಾರಿಯ ಹಾಗೆ ಬ್ಯಾರಿಕೇಡ್ ಹಾಕಿ ಕಂಟೇನ್​ಮೆಂಟ್​ ಮಾಡಿದರೆ ಪೌರಕಾರ್ಮಿಕರಿಗೆ ಕಸ ಸ್ವೀಕರಿಸಲು ಪಿಪಿಇ ಕಿಟ್ ಕೊಡಲಾಗುವುದು. ಆದರೆ, ನಗರದಲ್ಲಿ ಆ ರೀತಿ ಕಂಟೇನ್​ಮೆಂಟ್​ ಮಾಡಲಾಗುತ್ತಿಲ್ಲ ಎಂದು ಘನತ್ಯಾಜ್ಯ ವಿಭಾಗದ ವಿಶೇಷ ಆಯುಕ್ತರಾದ ರಂದೀಪ್ ತಿಳಿಸಿದ್ದಾರೆ.

ಪೌರಕಾರ್ಮಿಕ ಮುಖಂಡರಾದ ಅಶೋಕ್ ಸಾಲಪ್ಪ ಮಾತನಾಡಿ, ನೇರ ವೇತನ ಪೌರಕಾರ್ಮಿಕರು, ಕಾಯಂ ಪೌರಕಾರ್ಮಿಕರು ಪ್ರಾಣ ಒತ್ತೆ ಇಟ್ಟು ಕೆಲಸ ಮಾಡ್ತಿದ್ದಾರೆ. ಕಳೆದ ಬಾರಿ ಮೃತಪಟ್ಟವರಿಗೂ ಕೋವಿಡ್ ವಿಮೆ ಪರಿಹಾರ ಕೊಟ್ಟಿಲ್ಲ. ಬಿಬಿಎಂಪಿಗೆ ಜೊತೆ ಎಷ್ಟೇ ಬಾರಿ ಮನವಿ ಮಾಡಿದ್ರೂ ಪ್ರಯೋಜನವಾಗಿಲ್ಲ ಎಂದಿದ್ದಾರೆ.