ಗಲಭೆ ಪ್ರಕರಣ: ಡಿ.ಜೆ. ಹಳ್ಳಿ ಠಾಣೆ ಮುಂದೆ ಬಂಧಿತರ ಮಕ್ಕಳ ಕಣ್ಣೀರು

ಕೆ ಜಿ ಹಳ್ಳಿ, ಡಿ ಜೆ ಹಳ್ಳಿ ಗಲಭೆ ಪ್ರಕರಣದಲ್ಲಿ ಬಂಧಿತರಾಗಿರುವ ಆರೋಪಿಗಳ ಮಕ್ಕಳು ತಮ್ಮ ಅಪ್ಪಂದಿರನ್ನು ಬಿಡುಗಡೆ ಮಾಡುವಂತೆ ಠಾಣೆಯ ಮುಂದೆ ಬಂದು ಅಳಲನ್ನು ತೋಡಿಕೊಂಡಿದ್ದಾರೆ.

ಬೆಂಗಳೂರು: ಡಿ.ಜೆ. ಹಳ್ಳಿ ಗಲಭೆ ಪ್ರಕರಣ ಸಂಬಂಧ ಬಂಧಿತರ ಕುಟುಂಬಸ್ಥರ ಮಕ್ಕಳು ಠಾಣೆ ಬಳಿ ಬಂದು ತಮ್ಮ ಅಪ್ಪಂದಿರನ್ನು ಬಿಡಿ ಎಂದು ಕಣ್ಣೀರು ಹಾಕಿದ್ದಾರೆ.

ಡಿ.ಜೆ. ಹಳ್ಳಿ ಪೊಲೀಸ್ ಠಾಣೆ ಮುಂದೆ ಮಕ್ಕಳು ರೋಧಿಸುವ ದೃಶ್ಯ ಎಲ್ಲರ ಮನಕಲಕುವಂತಿತ್ತು. ಗಲಭೆ ಕೇಸ್​​ನಲ್ಲಿ ಈಗಾಗಲೇ ಆರೋಪಿಗಳು ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಇನ್ನೂ ಕೆಲವರು ಸಿಸಿಬಿ ಪೊಲೀಸರ ವಶದಲ್ಲಿದ್ದಾರೆ.

ಠಾಣೆ ಮುಂದೆ ಆರೋಪಿಗಳ ಮಕ್ಕಳು ಅಪ್ಪ ಬೇಕು ಎಂದು ಸ್ಟೇಷನ್ ಮುಂದೆ ಹಠ ಹಿಡಿದರು. ಅಪ್ಪಂದಿರನ್ನು ಕಳುಹಿಸಿಕೊಡಿ‌ ಎಂದು ಮಕ್ಕಳು ಗೋಗೆರೆದು ಠಾಣೆಯೊಳಗೆ ಹೋಗಲು ಯತ್ನಿಸಿದರು.

ಈ ವೇಳೆ ಮಹಿಳಾ ಪೊಲೀಸರು ಮಕ್ಕಳು ಮತ್ತು ತಾಯಂದಿರಿಗೆ ಸಾಂತ್ವನ ಹೇಳಿ ಕಳುಹಿಸಿದರು. ಪ್ರತಿದಿನ ಬೀದಿಯಲ್ಲಿ ಕುಳಿತು ಬಂಧನಕ್ಕೊಳಗಾದ ತಮ್ಮವರಿಗಾಗಿ ಹಲವು ದಿನಗಳಿಂದ ಕುಟುಂಬಸ್ಥರು ಕಾದು ಕುಳಿತಿದ್ದಾರೆ.