ಬೆಂಗಳೂರು: ದಕ್ಷಿಣ ಲೋಕಸಭಾ ಕ್ಷೇತ್ರಕ್ಕೆ ನೀವೇ ಕಮಲದ ಅಭ್ಯರ್ಥಿ..., ಚುನಾವಣೆಗೆ ಸಕಲ ಸಿದ್ಧತೆ ಮಾಡಿಕೊಳ್ಳಿ..., ತಳಮಟ್ಟದಲ್ಲಿ ಪ್ರಚಾರವನ್ನೂ ಆರಂಭಿಸಿ... ದೆಹಲಿಯಲ್ಲಿ ನಿಮ್ಮ ಪತಿ ಕೇಂದ್ರ ಸಚಿವ ಅನಂತಕುಮಾರ್ ತಂಗಿದ್ದ ಸರ್ಕಾರಿ ಬಂಗಲೆ ಖಾಲಿ ಮಾಡಬೇಡಿ ಸಂಸದರಾಗಿ ನೀವೇ ಅಲ್ಲಿ ವಾಸಿಸುವಿರಂತೆ...!!
ಹೌದು, ಹೀಗೆ ಹತ್ತು ಹಲವು ಆಸೆಗಳನ್ನು ಕೇಂದ್ರ ಸಚಿವರಾಗಿದ್ದ ದಿವಂಗತ ಅನಂತಕುಮಾರ್ ಅವರ ಪತ್ನಿ ತೇಜಸ್ವಿನಿ ಅನಂತಕುಮಾರ್ ಅವರಿಗೆ ಹುಟ್ಟಿಸಿ ಬಿಜೆಪಿ ಕೊನೇ ಘಳಿಗೆಯಲ್ಲಿ ಟಿಕೆಟ್ ನೀಡದೇ ಅವರಿಗೆ ಕೈಕೊಟ್ಟಿದೆ.
ಬಿಜೆಪಿ ಟಿಕೆಟ್ ತನಗೆ ಸಿಕ್ಕೇ ಸಿಗುತ್ತದೆ ಎಂದು ಬೆಟ್ಟದಷ್ಟು ಭರವಸೆಗಳನ್ನು ಇಟ್ಟುಕೊಂಡಿದ್ದ ತೇಜಸ್ವಿನಿ ಅನಂತಕುಮಾರ್ ಅವರಿಗೆ ಈಗ ಅನಿರೀಕ್ಷಿತ ರಾಜಕೀಯ ವಿದ್ಯಮಾನದಿಂದ ಭ್ರಮನಿರಸನವಾಗಿದೆ. ಕ್ಯಾನ್ಸರ್ಗೆ ತುತ್ತಾಗಿ ಅಕಾಲಿಕ ಮರಣವನ್ನಪ್ಪಿದ ಕೇಂದ್ರ ಸಚಿವರಾಗಿದ್ದ ಅನಂತಕುಮಾರ್ ಅವರ ಪತ್ನಿ ತೇಜಸ್ವಿನಿ ಅನಂತಕುಮಾರ್ ಪಕ್ಷದಲ್ಲಿ ಈಗ ಅಕ್ಷರಶಃ ತಬ್ಬಲಿಯಾಗಿದ್ದಾರೆ.
ಆರಂಭದಲ್ಲಿ ಚುನಾವಣೆ ರಾಜಕೀಯಕ್ಕೆ ಒಲವು ತೋರದ ತೇಜಸ್ವಿನಿ ಅವರಿಗೆ ಪಕ್ಷದ ಮುಖಂಡರೇ ಒತ್ತಡ ಹೇರಿ, ಉತ್ಸಾಹ ತುಂಬಿ ಚುನಾವಣೆಗೆ ಸ್ಪರ್ಧಿಸಲು ಮಾನಸಿಕವಾಗಿ ಸಿದ್ಧಪಡಿಸಿದ್ದರು. ಅದರಂತೆ ತೇಜಸ್ವಿನಿ ಅವರೂ ಬೆಂಗಳೂರು ದಕ್ಷಿಣದಲ್ಲಿ ತಾವು ಅಭ್ಯರ್ಥಿಯಾಗುತ್ತೇನೆಂದು ಭಾವಿಸಿ ಕ್ಷೇತ್ರದಲ್ಲಿ ಒಂದು ರೀತಿ ಅನಂತ ನಮನ ಕಾರ್ಯಕ್ರಮ ನಡೆಸುತ್ತ ಪ್ರಚಾರವನ್ನೂ ಮಾಡುತ್ತಾ ಬಂದಿದ್ದರು. ಟಿಕೆಟ್ ಘೋಷಣೆಯಾದಾಗಲೂ ಸಹ ಮೊದಲ ಪಟ್ಟಿಯಲ್ಲೇ ತಮ್ಮ ಹೆಸರು ಪ್ರಕಟವಾಗುತ್ತದೆ ಎಂದು ಭಾವಿಸಿದ್ದರು. ಆದರೆ ನಿರೀಕ್ಷೆ ಹುಸಿಯಾಗಿತ್ತು. ಎರಡನೇ ಪಟ್ಟಿಯಲ್ಲಿ ಹೆಸರು ಬಂದೇ ಬರುತ್ತದೆ ಅಂದುಕೊಂಡಿದ್ದರು. ಆಗಲೂ ಬರದಿದ್ದಾಗ ತೇಜಸ್ವಿನಿ ಅವರಿಗೆ ಬಹಳ ನಿರಾಸೆಯಾಗಿದೆ.
ತಮ್ಮ ಬದಲಿಗೆ ಬೆಂಗಳೂರು ದಕ್ಷಿಣದಲ್ಲಿ ಪ್ರಧಾನಿ ಮೋದಿಯೇ ಸ್ಪರ್ಧಿಸಲಿದ್ದಾರೆನ್ನುವ ಸುದ್ದಿ ಬಿಜೆಪಿ ಪಡಸಾಲೆಯಿಂದಲೇ ದಟ್ಟವಾಗಿ ಹಬ್ಬಿತ್ತು. ಪ್ರಧಾನಿ ಅಭ್ಯರ್ಥಿಯಾಗುವುದಾದರೆ ಪ್ರಶ್ನಿಸಲಾದೀತೆ? ಎಂದು ಬೇಸರದಿಂದ ಮೌನವಾಗಿದ್ದರು. ಯಾವಾಗ ಕೊನೆಯ ಕ್ಷಣದಲ್ಲಿ ಮೂರನೇ ವ್ಯಕ್ತಿಯ ಹೆಸರು ತೇಜಸ್ವಿ ಸೂರ್ಯ ಅಭ್ಯರ್ಥಿ ಎಂದು ಘೋಷಣೆಯಾಯಿತೋ ಆಗ ತೇಜಸ್ವಿನಿಯವರಿಗೆ ಟಿಕೆಟ್ ನೀಡುವಲ್ಲಿ ತಮಗಾದ ಮೋಸದ ಅರಿವಾಗತೊಡಗಿತು. ಟಿಕೆಟ್ ಕೊಡದಿರುವುದಕ್ಕೆ ಬಂಡಾಯವೆದ್ದು ಪ್ರತಿಭಟಿಸಲೂ ಸಹ ಅವಕಾಶ ನೀಡದೆ ಬಿಜೆಪಿ ವರಿಷ್ಠರು ಅಂತಿಮ ಕ್ಷಣದಲ್ಲಿ ಬೇರೆ ವ್ಯಕ್ತಿಗೆ ಟಿಕೆಟ್ ಹಂಚಿಕೆ ಮಾಡಿರುವುದನ್ನು ಖಚಿತಪಡಿಸಿದೆ. 'ಬಲಿ ಕಾ ಬಕರಾ' ಎನ್ನುವಂತೆ ತಮ್ಮ ಸ್ಥಿತಿ ಆಯಿತಲ್ಲಾ ಎಂದು ಪತಿ ಅನಂತಕುಮಾರ್ ಇದ್ದಿದ್ದರೆ ಹೀಗೆ ಅನ್ಯಾಯ ಆಗುತ್ತಿತ್ತಾ ಎಂದು ಮರಗುವಂತಾಗಿದೆ.
ಹೀಗೆ ಬಿಜೆಪಿ ಟಿಕೆಟ್ ಕೈತಪ್ಪಿದ್ದಕ್ಕೆ ಈಗ ಕೊನೆಯ ಕ್ಷಣದಲ್ಲಿ ಏನು ಮಾಡಬೇಕು. ಯಾರಲ್ಲಿ ಮೊರೆ ಇಡಬೇಕು ಎನ್ನುವುದು ತಿಳಿಯದೇ, ಅನಂತ ಅಭಿಮಾನಿ ಪಡೆ ಹೊಂದಿದ್ದ ಅನಂತಕುಮಾರ್ ಪತ್ನಿಗೆ ಯಾರ ಬೆಂಬಲವೂ ಇಲ್ಲದೇ ಏಕಾಂಗಿಯಾಗುವಂತಾಗಿದೆ.
