ಬಿಡಿಎ, ಬಿಎಂಆರ್ ಡಿಎ ಯಿಂದ ನಿಯಮ ಉಲ್ಲಂಘನೆ; ಪುಟ್ಟಸ್ವಾಮಿ ಗರಂ

ಬಿಡಿಎ ಮತ್ತು ಬಿಎಂಆರ್ ಡಿಎ ವ್ಯಾಪ್ತಿಯಲ್ಲಿನ ಅನಧಿಕೃತ ಬಡಾವಣೆಗಳ ಹಾಗೂ ಭೂ ಉಪಯೋಗ ಉಲ್ಲಂಘನೆ ಆಗುತ್ತಿರುವ ಬಗ್ಗೆ ಸೂಕ್ತ ಕ್ರಮ ತೆಗೆದುಕೊಳ್ಳುವ ಕುರಿತು ಸಿಎಂಗೆ ಮನವಿ ಮಾಡಲಾಗಿದೆ ಎಂದು ಕರ್ನಾಟಕ ರಾಜ್ಯ ಯೋಜನಾ ಮಂಡಳಿ ಉಪಾಧ್ಯಕ್ಷ ಬಿ.ಜೆ. ಪುಟ್ಟಸ್ವಾಮಿ ಹೇಳಿದ್ದಾರೆ.

ಬೆಂಗಳೂರು:ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಮತ್ತು ಬೆಂಗಳೂರು ಮಹಾನಗರ ಪ್ರದೇಶಾಭಿವೃದ್ಧಿ ಪ್ರಾಧಿಕಾರ (ಬಿಎಂಆರ್ ಡಿಎ) ವ್ಯಾಪ್ತಿಯಲ್ಲಿನ ಅನಧಿಕೃತ ಬಡಾವಣೆಗಳ ಹಾಗೂ ಭೂ ಉಪಯೋಗ ಉಲ್ಲಂಘನೆ ಆಗುತ್ತಿರುವ ಬಗ್ಗೆ ಸೂಕ್ತ ಕ್ರಮ ತೆಗೆದುಕೊಳ್ಳುವ ಕುರಿತು ಸಿಎಂಗೆ ಮನವಿ ಮಾಡಲಾಗಿದೆ ಎಂದು ಕರ್ನಾಟಕ ರಾಜ್ಯ ಯೋಜನಾ ಮಂಡಳಿ ಉಪಾಧ್ಯಕ್ಷ ಬಿ.ಜೆ. ಪುಟ್ಟಸ್ವಾಮಿ ಹೇಳಿದ್ದಾರೆ.

ವಿಕಾಸಸೌಧದಲ್ಲಿ ಇಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಪುಟ್ಟಸ್ವಾಮಿ, ಬೆಂಗಳೂರು ಮಹಾನಗರ ಪ್ರದೇಶಾಭಿವೃದ್ಧಿ ಪ್ರಾಧಿಕಾರ ವ್ಯಾಪ್ತಿಯಲ್ಲಿ ಭೂ ಪರಿವರ್ತನೆ ಹಾಗೂ ಭೂ ಉಪಯೋಗ ಬದಲಾವಣೆ ಮತ್ತು ಬೆಂಗಳೂರಿನ ಸಿಡಿಪಿ ಪ್ಲ್ಯಾನ್ ಉಲ್ಲಂಘಿಸಿ, ಅನಧಿಕೃತ ಬಡಾವಣೆಗಳು ಬರುತ್ತಿರುವುದನ್ನು ಗಮನಿಸಿ ಮುಖ್ಯಮಂತ್ರಿಗಳೊಡನೆ ಚರ್ಚಿಸಿದ್ದೇನೆ. ಅವರ ಆದೇಶದಂತೆ ಅಂತಹ ಅನಧಿಕೃತ ಬಡಾವಣೆಗಳ ವಿವರವನ್ನು ಬಿಡಿಎ ದಿಂದ ಮತ್ತು ಬಿಎಂಆರ್ ಡಿಎ ದಿಂದ ಪಡೆಯಲಾಗಿದೆ ಎಂದರು.

ಬೆಂಗಳೂರಲ್ಲಿ ಅಕ್ರಮ ಬಡಾವಣೆಗಳಿವೆ ಎಂದು ಬಿಡಿಎ ಹಾಗೂ ಬಿಎಂಆರ್ ಡಿ ಅಧಿಕಾರಿಗಳೇ ಒಪ್ಪಿಕೊಂಡಿದ್ದಾರೆ ಎಂದು ತಿಳಿಸಿದರು. ಬೆಂಗಳೂರು ನಗರವನ್ನು ಯೋಜನಾ ಬದ್ಧವಾಗಿ ನಿರ್ಮಿಸುವುದು, ಇಲ್ಲಿನ ನಾಗರಿಕರಿಗೆ ಮನೆಗಳನ್ನು ಹಂಚುವುದು, ನೂತನ ಬಡಾವಣೆ ನಕ್ಷೆ ತಯಾರಿಸುವುದು ಸೇರಿದಂತೆ ನಗರದ ಅಭಿವೃದ್ಧಿಗೆ ಸಂಬಂಧಿಸಿದ ಇತರೆ ವಿಚಾರಗಳು ಬಿಡಿಎ ಉದ್ದೇಶವಾಗಿದೆ. ಆದರೆ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ನೀಡಿರುವ ಮಾಹಿತಿಯಂತೆ 172 ಖಾಸಗಿಯವರಿಗೆ ಮತ್ತು ಸಂಸ್ಥೆಗಳಿಗೆ 3109 ಎಕರೆ 27 ಗುಂಟೆ ಜಮೀನಿನಲ್ಲಿ ಭೂ ಪರಿವರ್ತನೆ, ಭೂ ಬದಲಾವಣೆ ಮತ್ತು ಸಿಡಿಪಿ ನಕ್ಷೆಯನ್ನು ಉಲ್ಲಂಘಿಸಿ ಬಡಾವಣೆಗಳನ್ನು ನಿರ್ಮಿಸಿ, ನಿವೇಶನಗಳನ್ನು ಮಾರಾಟ ಮಾಡುತ್ತಿರುವುದು ಕಂಡು ಬಂದಿರುತ್ತದೆ. ಬಾಬ್ತು 352.72 ಕೋಟಿ ರೂ. ಸರ್ಕಾರಕ್ಕೆ ಕಟ್ಟಬೇಕಾದ ತೆರಿಗೆಯನ್ನು ವಂಚಿಸಲಾಗಿದೆ. ಈ ಮೊತ್ತದಲ್ಲಿ ಭೂ ಪರಿವರ್ತನೆ ಹಾಗೂ ಇತರೆ ತೆರಿಗೆಗಳು ಸೇರಿದರೆ ತೆರಿಗೆ ವಂಚನೆಯ ಅಂದಾಜು ಮೊತ್ತ ಸುಮಾರು 500 ಕೋಟಿ ರೂ. ಬರಬೇಕಿದೆ ಎಂದು ಹೇಳಿದರು.

ಬಿಎಂಆರ್ ಡಿಎ ಸಲ್ಲಿಸಿರುವ ಮಾಹಿತಿಯಂತೆ ಸುಮಾರು 800 ವೈಯಕ್ತಿಕ ಸಂಸ್ಥೆಗಳು 5,488 ಎಕರೆ 1 ಗುಂಟೆ ಜಮೀನಿನಲ್ಲಿ ಅನಧಿಕೃತ ಬಡಾವಣೆಗಳನ್ನು ನಿರ್ಮಿಸಿದ್ದಾರೆ.
ಪ್ರಾಧಿಕಾರ ಸಲ್ಲಿಸಿರುವ ಮಾಹಿತಿಯಂತೆ ರೂ. 185.67 ಕೋಟಿ ರೂ. ಸರ್ಕಾರಕ್ಕೆ ಸಲ್ಲಿಸಬೇಕಾದ ತೆರಿಗೆ ಕಟ್ಟಿಲ್ಲ. ಪ್ರಾಧಿಕಾರ ಅಧಿಕಾರಿಗಳಿಂದ ಪಡೆದ ಮಾಹಿತಿಯಂತೆ ಈ ಮೊತ್ತದಲ್ಲಿ ಭೂ ಪರಿವರ್ತನೆ ಮತ್ತು ಭೂ ಬದಲಾವಣೆ ಮೊತ್ತ ಸೇರಿರುವುದಿಲ್ಲ. ಇವೆಲ್ಲವನ್ನು ಸೇರಿಸಿದರೆ ಒಟ್ಟು ಅಂದಾಜು 350 ಕೋಟಿ ರೂ. ಗೂ ಹೆಚ್ಚು ತೆರಿಗೆ ವಂಚನೆಯಾಗಿದೆ. ಅಂದಾಜು ರೂ. 850 ಕೋಟಿ ಹಣ ಸರ್ಕಾರಕ್ಕೆ ವಂಚಿತವಾಗಿದೆ ಎಂದು ಮಾಹಿತಿ ನೀಡಿದರು.

ಅದೇ ರೀತಿ ರಾಜ್ಯದ ಇತರೆ ಮಹಾನಗರ ಪಾಲಿಕೆಗಳು ಹಾಗೂ ಜಿಲ್ಲೆಗಳಲ್ಲಿ ಸಹ ಅನಧಿಕೃತ ಬಡಾವಣೆಗಳು ಬರುತ್ತಿವೆ. ಇದರಿಂದ ಸಹ ನೂರಾರು ಕೋಟಿ ಸರ್ಕಾರಕ್ಕೆ ಬರಬೇಕಾದ ತೆರಿಗೆ ಹಣ ಬರುತ್ತಿಲ್ಲ. ವ್ಯವಸ್ಥಿತ ರೀತಿಯಲ್ಲಿ ನಾಗರಿಕರಿಗೆ ಮೂಲ ಸೌಕರ್ಯಗಳನ್ನು ಒದಗಿಸುವ ಬಡಾವಣೆ ನಿರ್ಮಿಸಲು ಸಾಧ್ಯವಾಗಿಲ್ಲ ಎಂದರು.

ಬಿಎಂಆರ್ ಡಿ ಮಾಸ್ಟರ್ ಪ್ಲಾನ್ ಬಿಡುಗಡೆ ಮಾಡಿದ ಮೇಲೆ ಯಾವುದೇ ಅನಧಿಕೃತ ಬಡಾವಣೆ ಬರಬಾರದು. ಆದರೆ, ಬಿಎಂಆರ್ ಡಿ ಮಾಹಿತಿ ಪ್ರಕಾರ 800 ಸಂಸ್ಥೆಗಳು 5488 ಎಕರೆಯಲ್ಲಿ ಅನಧಿಕೃತ ಬಡಾವಣೆ ನಿರ್ಮಾಣವಾಗಿವೆ. 185 ಕೋಟಿ ರೂ. ಸರ್ಕಾರಕ್ಕೆ ಬರಬೇಕಾದ ತೆರಿಗೆ ಬಂದಿಲ್ಲ.
ಅನಧಿಕೃತ ಬಡಾವಣೆಗಳ ನಿರ್ಮಾಣವನ್ನು ಬಿಡಿಎ ಯಾಕೆ ತಡೆಯಲಿಲ್ಲ ಎಂದು ಪ್ರಶ್ನಿಸಿದ ಅವರು, ಮುಖ್ಯಮಂತ್ರಿಗಳಿಗೆ ಪತ್ರ ಬರೆದಿದ್ದೇನೆ. ತಕ್ಷಣವೇ ಸಂಬಂಧಪಟ್ಟ ಅಧಿಕಾರಿಗಳು ಅಕ್ರಮ ಬಡಾವಣೆಗಳನ್ನು ಡೆಮಾಲಿಶ್ ಮಾಡಬೇಕು. ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.
ಬಿಡಿಎ ಹಾಗೂ ಬಿಎಂಆರ್ ಡಿ ಈ ಎರಡು ಸಂಸ್ಥೆಗಳಿಂದ 850 ಕೋಟಿ ರೂ. ಸರ್ಕಾರಕ್ಕೆ ನಷ್ಟವಾಗಿದೆ. ಕೋಟ್ಯಾಂತರ ಹಣ ಅಧಿಕಾರಿಗಳ ಜೇಬು ಸೇರಿದೆ. 15 ವರ್ಷದಿಂದ‌ ಒಂದೇ ಒಂದು ನಿವೇಶನ ಹಂಚಿಕೆಯಾಗಿಲ್ಲ ಎಂದು ಬಿಡಿಎ ಹಾಗೂ ಬಿಎಂಆರ್ ಡಿ ಅಧಿಕಾರಿ ಗಳ ವಿರುದ್ಧ ಗರಂ ಆದರು.