ಆ್ಯಡಂ ಪಾಷ ಗಂಡೋ, ಹೆಣ್ಣೋ? ಜೈಲಾಧಿಕಾರಿಗಳನ್ನು ಕಾಡಿದ ‘ಲಿಂಗ’ ಸಮಸ್ಯೆ!

ಸ್ಯಾಂಡಲ್​ವುಡ್​ ಡ್ರಗ್ಸ್ ಕೇಸ್​ನಲ್ಲಿ ಬಂಧಿತ ಆರೋಪಿ ಆ್ಯಡಂ ಪಾಷ ಗಂಡೋ ಅಥವಾ ಹೆಣ್ಣೋ ಎಂಬುದರ ಬಗ್ಗೆ ಜೈಲಾಧಿಕಾರಿಗಳು ತಲೆಕೆಡಿಸಿಕೊಂಡಿರುವ ಪ್ರಸಂಗ ನಡೆದಿದೆ.

ಬೆಂಗಳೂರು: ಬಿಗ್‌ಬಾಸ್ ರಿಯಾಲಿಟಿ ಶೋ ಜನಪ್ರಿಯತೆಯ ಆ್ಯಡಂ ಪಾಷನನ್ನು ಸ್ಯಾಂಡಲ್​ವುಡ್​ ಡ್ರಗ್ಸ್ ಪ್ರಕರಣ ಸಂಬಂಧ ಬಂಧಿಸಲಾಗಿದ್ದು, ನಿನ್ನೆ ಜೈಲಿಗೆ ಕಳುಹಿಸಿದಾಗ ಹೈಡ್ರಾಮ ನಡೆದಿದೆ‌.

ಸ್ಯಾಂಡಲ್​ವುಡ್​ ಡ್ರಗ್​ ಪ್ರಕರಣ: ಆ್ಯಡಂ ಪಾಷಾ ಗಂಡೋ, ಹೆಣ್ಣೋ? ಜೈಲಾಧಿಕಾರಿಗಳಲ್ಲಿ ಗೊಂದಲ

ಆ್ಯಡಂ ಪಾಷನನ್ನು ಜೈಲಿಗೆ ಕರೆತಂದ ಅಧಿಕಾರಿಗಳು,‌ ಆತನನ್ನು ಪುರುಷ ಅಥವಾ ಮಹಿಳಾ ಸೆಲ್​ಗೆ ಹಾಕಬೇಕೋ ಎಂದು ಕೆಲಕಾಲ ತಲೆಕೆಡಿಸಿಕೊಂಡರಂತೆ. ಪಾಷ, ಗಂಡೋ ಅಥವಾ ಹೆಣ್ಣೋ ಎಂಬ ಕನ್​ಫ್ಯೂಶನ್ ಅಧಿಕಾರಿಗಳಲ್ಲಿತ್ತಂತೆ. ಆರೋಪಿ ಹೆಣ್ಣಿನ ವಸ್ತ್ರ ಧರಿಸುತ್ತಿದ್ದರಿಂದ ಅಧಿಕಾರಿಗಳು ಗೊಂದಲಕ್ಕೀಡಾಗಲು ಕಾರಣವಾಗಿತ್ತು.

ಈ ವೇಳೆ ಸ್ಪಷ್ಟನೆ ನೀಡಿದ ಆ್ಯಡಂ, 'ನಾನು ಗಂಡು, ಲಿಂಗ ಪರಿವರ್ತನೆಯಾಗಿಲ್ಲ. ಆದರೆ ಯುವತಿಯರ ವಸ್ತ್ರಗಳ ಧರಿಸುತ್ತೇನೆ ಅಷ್ಟೇ. ನಾನೊಬ್ಬ ಡ್ರ್ಯಾಗ್ ಕ್ವೀನ್ ಆಗಿರುವುದು ಇದಕ್ಕೆ ಕಾರಣ' ಎಂದಿದ್ದನಂತೆ. ಬಳಿಕ ಆ್ಯಡಂ ಪಾಷಾನನ್ನು ಜೈಲಾಧಿಕಾರಿಗಳು ಪ್ರತ್ಯೇಕ ಸೆಲ್​ಗೆ ಹಾಕಿರುವುದಾಗಿ ಮೂಲಗಳು ತಿಳಿಸಿವೆ.

ಎನ್‌ಸಿಬಿ ಅಧಿಕಾರಿಗಳಿಂದ ಬಂಧಿಸಲ್ಪಿಟ್ಟಿರುವ ಈತ ಡ್ರಗ್ಸ್ ಫೆಡ್ಲರ್​ಗಳಿಂದ ಹಲವು ಬಾರಿ ಡ್ರಗ್ಸ್ ಖರೀದಿಸಿ ಸೇವನೆ ಮಾಡಿರುವ ಬಗ್ಗೆ ವಿಚಾರಣೆ ವೇಳೆ ಒಪ್ಪಿಕೊಂಡಿದ್ದಾನೆ. ಇದೇ ಆರೋಪದಡಿ ಈತನನ್ನು ಮಂಗಳವಾರ ಅರೆಸ್ಟ್‌ ಮಾಡಲಾಗಿತ್ತು. ಆರೋಪಿಗೆ ನವೆಂಬರ್ 3 ರವರೆಗೆ ನ್ಯಾಯಾಂಗ ಬಂಧನ ವಿಧಿಸಿ ನ್ಯಾಯಾಲಯ ಆದೇಶ ನೀಡಿದೆ.