ಬೆಂಗಳೂರು: ನಗರ ಪೊಲೀಸ್ ಆಯುಕ್ತ ಭಾಸ್ಕರ್ ರಾವ್, ಪಿಜ್ಜಾ ಡೆಲಿವರಿ ವ್ಯವಸ್ಥೆಯ ವಿರುದ್ಧ ಹರಿಹಾಯ್ದಿದ್ದಾರೆ. ಬೇಗ ಪಿಜ್ಜಾ ಡೆಲಿವರಿ ಮಾಡುವ ಉದ್ದೇಶದಿಂದ ಡೆಲಿವರಿ ಬಾಯ್ಸ್ ರಸ್ತೆ ನಿಯಮ ಉಲ್ಲಂಘಿಸುತ್ತಿದ್ದಾರೆ ಎಂದು ಟ್ವೀಟ್ರನಲ್ಲಿ ತಿಳಿಸಿದ್ದಾರೆ.
ಆರ್ಡರ್ ಮಾಡಿದ 30 ನಿಮಿಷದ ಒಳಗಾಗಿ ಪಿಜ್ಜಾ ನಿಮ್ಮ ಮನೆಗೆ ತಲುಪಿಸುತ್ತೇವೆ. ಒಂದು ವೇಳೆ 30 ನಿಮಿಷ ಮೀರಿದ್ರೆ ಆ ಪಿಜ್ಜಾ ಫ್ರೀ ಅನ್ನೋ ಆಫರ್ ನೀಡ್ತಾರೆ. ನಿರ್ದಿಷ್ಟ ಸಮಯದೊಳಗೆ ಡೆಲಿವರಿ ತಲುಪಿಸಬೇಕು ಅನ್ನೋ ಕಂಪನಿಯ ಒತ್ತಡದಿಂದ ಡೆಲಿವರಿ ಬಾಯ್ಸ್ ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟು ಟ್ರಾಫಿಕ್ ನಿಯಮಗಳನ್ನ ಉಲ್ಲಂಘಿಸುತ್ತಿದ್ದಾರೆ. ಹೀಗಾಗಿ ಈ ಟೈಮ್ ಅನ್ನು 40 ನಿಮಿಷಕ್ಕೆ ಕಂಪನಿ ಹೆಚ್ಚಿಸಬೇಕು ಎಂದು ಭಾಸ್ಕರ್ ರಾವ್ ಟ್ವಿಟ್ಟರ್ ಮೂಲಕ ಸೂಚಿಸಿದ್ದಾರೆ.
ಈ ಟ್ವೀಟ್ ನೋಡಿದ ಸ್ವಿಗ್ಗಿ ಕಂಪನಿ, ನಮ್ಮ ಡೆಲಿವರಿ ಬಾಯ್ಸ್ ಟ್ರಾಫಿಕ್ ನಿಯಮ ಉಲ್ಲಂಘನೆ ಮಾಡ್ತಿಲ್ಲ, ಹಾಗೇನಾದ್ರು ಕಂಡುಬಂದರೆ ನಮ್ಮ ಗಮನಕ್ಕೆ ತನ್ನಿ ಎಂದಿದೆ. ಇದಕ್ಕೆ ಗರಂ ಆಗಿರುವ ಭಾಸ್ಕರ್ ರಾವ್ ಅವರು ಹೆಚ್ಚು ಬಾರಿ ಟ್ರಾಫಿಕ್ ನಿಯಮ ಉಲ್ಲಂಘಿಸುತ್ತೀರಿ. ಹಾಗಿದ್ದೂ ಕಾನೂನು ಪಾಲನೆ ಮಾಡ್ತಿದ್ದೇವೆ ಅಂತಿರಾ. ಒಂದು ವೇಳೆ ಡೆಲಿವರಿ ಬಾಯ್ಸ್ಗೆ ಅಪಘಾತವಾದರೆ ನೀವೇ ಹೊಣೆ ಎಂದು ಎಚ್ಚರಿಕೆ ರವಾನಿಸಿದ್ದಾರೆ.