ಲಾಠಿ ಬಿಟ್ಟು ರಸ್ತೆಗಿಳಿದ ಖಾಕಿ ಪಡೆ: ಅನಗತ್ಯವಾಗಿ ಓಡಾಡಿದ್ರೆ ವಾಹನ ಸೀಜ್​​

ಲಾಕ್​ಡೌನ್​ನ ಎರಡನೇ ದಿನವಾದ ಇಂದು ಸಿಲಿಕಾನ್ ಸಿಟಿಯಲ್ಲಿ ಪರಿಸ್ಥಿತಿ ಕೊಂಚ ಭಿನ್ನವಾಗಿತ್ತು. ಮೊದಲ ದಿನ ಸಿಕ್ಕಿದವರಿಗೆಲ್ಲ ಲಾಠಿ ಬೀಸುತ್ತಿದ್ದ ಖಾಕಿ ಪಡೆ, ಇಂದು ಶಸ್ತ್ರ ತ್ಯಾಗ ಮಾಡಿ ಬೀದಿಗಿಳಿದಿತ್ತು.

ಬೆಂಗಳೂರು: ಲಾಕ್​​ಡೌನ್​ನ​ ಎರಡನೇ ದಿನವಾದ ಇಂದು 10 ಗಂಟೆಯಾಗುತ್ತಿದ್ದಂತೆ ನಗರ ಪೊಲೀಸರು ಪೀಲ್ಡಿಗಿಳಿದು ಕರ್ತವ್ಯದಲ್ಲಿ ತೊಡಗಿದ್ದು, ಖುದ್ದು ಡಿಸಿಪಿ ಸಂಜೀವ್ ಪಾಟೀಲ್ ಸಿಟಿ ರೌಂಡ್ಸ್​ ಹೊಡೆದು ಪರಿಸ್ಥಿತಿ ಪರಿಶೀಲನೆ ಮಾಡಿದರು.

ಸುಖಾಸುಮ್ಮನೆ ರಸ್ತೆಗಿಳಿದವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲು ನಗರ ಪೊಲೀಸ್ ಆಯಕ್ತರು ಸಿಬ್ಬಂದಿಗೆ ಸೂಚನೆ ನೀಡಿದ್ದಾರೆ. ಅನಗತ್ಯವಾಗಿ ಓಡಾಡುತಿದ್ದರೆ ವಾಹನ ಸೀಜ್ ಮಾಡುವಂತೆ ಆದೇಶಿಸಿದ್ದಾರೆ.

ಅವಶ್ಯಕತೆ ಇದ್ದರೆ ಮಾತ್ರ ಲಾಠಿ ಬೀಸಿ: ಸುಖಾಸುಮ್ಮನೆ ಜನರಿಗೆ ಹೊಡೆಯಬೇಡಿ. ಅವಶ್ಯಕತೆ ಇದ್ದರೆ ಮಾತ್ರ ಬೆತ್ತದ ರುಚಿ ತೋರಿಸಿ ಎಂದು ಪೊಲೀಸ್ ಆಯುಕ್ತರು ಸಿಬ್ಬಂದಿಗೆ ಸೂಚನೆ ನೀಡಿದ್ದಾರೆ. ಹಾಗಾಗಿ, ಲಾಠಿ ಬಿಟ್ಟು ಕೇವಲ ವಾಹನ ಸೀಜ್ ಮಾಡುವ ಸಲುವಾಗಿ ಪೊಲೀಸರು ಒನ್​ ವೇ ಮಾಡಿ ತಪಾಸಣೆಯಲ್ಲಿ ತೊಡಗಿದ್ದಾರೆ.

ಲಾಠಿ ಬಿಟ್ಟ ಖಾಕಿ:ಲಾಕ್​​ಡೌನ್​ನ ಮೊದಲ ದಿನ ರಸ್ತೆಗಿಳಿದವರ ಕಾರಣ ಕೇಳದೆ ಪೊಲೀಸರು ಪ್ರಾಣಿಗಳಿಗೆ ಹೊಡೆದಂತೆ ಹೊಡೆದಿದ್ದರು. ಈ ಬಗ್ಗೆ ಪ್ರತಿಪಕ್ಷ ನಾಯಕರು ಸೇರಿದಂತೆ ರಾಜ್ಯಾದ್ಯಂತ ಸಾರ್ವಜನಿಕರಿಂದ ಭಾರೀ ಆಕ್ರೋಶ ವ್ಯಕ್ತವಾಗಿತ್ತು. ಈ ಬಗ್ಗೆ ಎಚ್ಚೆತ್ತುಕೊಂಡ ಪೊಲೀಸ್ ಇಲಾಖೆ ಇಂದಿನಿಂದ ಲಾಠಿ ಬೀಸದೆ, ನಿಯಮ ಮೀರಿದವರ ವಿರುದ್ಧ ಕ್ರಮ ಜರುಗಿಸಲು ತೀರ್ಮಾನಿಸಿದೆ. ಹಾಗಾಗಿ, ನಗರದಸಿಟಿ ಮಾರುಕಟ್ಟೆಯಲ್ಲಿ ಪೊಲೀಸರು ಲಾಠಿ ಚಾರ್ಜ್​ ಮಾಡದೆ ಜನರನ್ನು ಎಚ್ಚರಿಸುತ್ತಿರುವುದು ಕಂಡು ಬಂತು.