ಬಟ್ಟೆ ವ್ಯಾಪಾರಿ ಕೊಲೆ ಪ್ರಕರಣ: ಆರೋಪಿ ಮಗಳಿಂದ ಸ್ಫೋಟಕ ಮಾಹಿತಿ ಬಹಿರಂಗ

ನಗರದ ರಾಜಾಜಿ ನಗರದಲ್ಲಿ ನಡೆದ ಬಟ್ಟೆ ವ್ಯಾಪಾರಿಯ ಕೊಲೆ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮೃತ ಜೈಕುಮಾರ್ ಮಗಳು ಸೇರಿದಂತೆ ಇಬ್ಬರು ಆರೋಪಿಗಳನ್ನು ಪೊಲಿಸರು ಬಂಧಿಸಿದ್ದು, ಬಂಧಿತರಿಂದ ಕೊಲೆಯ ಬಗ್ಗೆ ಸ್ಫೋಟಕ ಮಾಹಿತಿಗಳನ್ನು ಪೊಲೀಸರು ಬಾಯಿಬಿಡಿಸಿದ್ದಾರೆ.

ಬೆಂಗಳೂರು: ಬಟ್ಟೆ ವ್ಯಾಪಾರಿಯನ್ನು ಸ್ನಾನದ ಕೊಣೆಯಲ್ಲಿ ಬೆಂಕಿ ಹಾಕಿ ಸುಟ್ಟ ಪ್ರಕರಣ ಇದೀಗ ರೋಚಕ ತಿರುವು ಪಡೆದಿದ್ದು, ಅಪ್ಪನನ್ನು ಮಗಳೇ ಸುಪಾರಿ ಕೊಟ್ಟು ಕೊಲ್ಲಿಸಿರುವ ಸ್ಫೋಟಕ ವಿಚಾರ ಬಯಲಾಗಿದೆ.

ನಗರದ ರಾಜಾಜಿನಗರ 5ನೇ ಬ್ಲಾಕ್ ನಿವಾಸಿ ಬಟ್ಟೆ ವ್ಯಾಪಾರಿ ಜಯಕುಮಾರ್ ತನ್ನ ಪತ್ನಿ ಪೂಜಾ ದೇವಿ ಹಾಗೂ ಮಕ್ಕಳ ಜೊತೆ ವಾಸವಿದ್ದರು. ಮನೆಯ ಸ್ನಾನದ ಕೊಠಡಿಯಲ್ಲಿ ಅನುಮಾನಾಸ್ಪದವಾಗಿ ಜಯಕುಮಾರ್ ಕೊಲೆಯಾಗಿದ್ದರು. ಈ ಬಗ್ಗೆ ರಾಜಾಜಿನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣದ ತನಿಖೆ ಕೈಗೆತ್ತಿಗೊಂಡ ಪೊಲೀಸರು ವಿಚಾರಣೆ ವೇಳೆ ಅನುಮಾನಗೊಂಡು ಕೊಲೆಯಾದ ಜಯಕುಮಾರ್ ಮಗಳು ಹಾಗೂ ಆಕೆಯ ಸ್ನೇಹಿತನನ್ನು ವಶಕ್ಕೆ ಪಡೆದು ತನಿಖೆಗೆ ಒಳಪಡಿಸಿದ್ದರು. ಆಗ ಮಗಳು ಬಾಯ್ಬಿಟ್ಟ ವಿಚಾರ ಕೇಳಿ ಪೊಲೀಸರೇ ಒಂದು ಕ್ಷಣ ದಂಗಾಗಿ ಹೋಗಿದ್ದಾರೆ.

ಹೆಚ್ಚಿನ ಓದಿಗಾಗಿ: ಡ್ರಗ್ಸ್‌ ಸೇವಿಸಬೇಡ ಎಂದ ಅಪ್ಪನಿಗೆ ಮಧ್ಯೆರಾತ್ರಿ ಕೊಳ್ಳಿ ಇಟ್ಟಳಾ ಪುತ್ರಿ?!

ವಿಚಾರಣೆ ವೇಳೆ ಸ್ಫೋಟಕ‌ ಮಾಹಿತಿ ಬಹಿರಂಗ:

ಕೊಲೆಯಾದ ಜಯಕುಮಾರ್ ಮಗಳು 9ನೇ ತರಗತಿ ವಿದ್ಯಾರ್ಥಿನಿ. ಪ್ರವೀಣ್ ಎಂಬಾತನ ಜೊತೆ ಹೆಚ್ಚು ಸುತ್ತಾಡುತ್ತಿದ್ದಳು. ಮತ್ತು ಕೆಲ ಗೆಳೆಯರ ಸಹವಾಸದಿಂದ ಮಾದಕ ವಸ್ತುಗಳ ದಾಸಿಯಾಗಿದ್ದಳು ಎನ್ನಲಾಗಿದೆ. ಮಗಳು ದಾರಿ ತಪ್ಪಿರುವುದನ್ನು ಗಮನಿಸಿದ ಅಪ್ಪ, ಮೊಬೈಲ್ ಸೇರಿದಂತೆ ಇತರ ವಿಚಾರದಲ್ಲಿ ಸ್ಟ್ರಿಕ್ಟ್ ಮಾಡಿದ್ದರಂತೆ. ಶಿಸ್ತಿನಿಂದ ಇರುವಂತೆ ಬುದ್ಧಿವಾದ ಹೇಳಿದ್ದರು. ಇದೇ ವಿಚಾರಕ್ಕೆ ಮನೆಯಲ್ಲಿ ಕಳೆದ ಆರು ತಿಂಗಳಿಂದ ಅಪ್ಪ ಮಗಳ ನಡುವೆ ಗಲಾಟೆಯಾಗಿತ್ತು. ಸರಿಯಾದ ಸಮಯಕ್ಕೆ ಮನೆಗೆ ಬಾ‌, ಗೆಳೆಯರ ಸಹವಾಸ ಕಡಿಮೆ ಮಾಡುವಂತೆ ಸೂಚನೆ ನೀಡಿದ ಕಾರಣಕ್ಕೆ ಅಪ್ಪನ ಹತ್ಯೆ ಮಾಡಲು ಚಾಲಾಕಿ ಮಗಳು ಸ್ಕೆಚ್​ ಹಾಕಿದ್ದಳಂತೆ.

ಹತ್ಯೆಗೆ ಸಹಾಯ ಮಾಡಿದ ಖತರ್ನಾಕ್ ಸ್ನೇಹಿತ:

ಕಳೆದ ಆರು ತಿಂಗಳಿಂದ ಅಪ್ಪನ ಹತ್ಯೆಯ ಬಗ್ಗೆ ಸ್ನೇಹಿತನ ಜೊತೆ ಸೇರಿ ಮಗಳು ಸ್ಕೆಚ್ ಹಾಕಿದ್ದಳು. ಹೀಗಾಗಿ ಅಮ್ಮ‌ ಮನೆಯಲ್ಲಿ ಇಲ್ಲಾದಾಗ, ಯಾವುದೇ ಅನುಮಾನ ಬಾರದ ರೀತಿ ಕೊಲೆ ಮಾಡಲು ಪ್ಲಾನ್‌ ಮಾಡಿ ಪ್ರಿಯಕರ ಪ್ರವೀಣ್ ಜೊತೆ ಮಾತುಕತೆ ನಡೆಸಿದ್ದಳು. ಕಳೆದ ಎರಡು ದಿನ ಹಿಂದೆ ಜಯಕುಮಾರ್ ಪತ್ನಿ ಪುದುಚೇರಿಗೆ ಹೋಗಿದ್ದರು. ಅಮ್ಮ ಪುದುಚೇರಿಗೆ ಹೋಗಿದ್ದಾರೆ, ಅಪ್ಪ ಒಬ್ಬರೇ ಇರುವುದಾಗಿ ಸ್ನೇಹಿತನಿಗೆ ಹೇಳಿ ಟ್ಯೂಷನ್ ನೆಪದಲ್ಲಿ ಹೊರ ಹೋಗಿದ್ದಳು. ಇನ್ನು‌ ಮಗಳು ಎಷ್ಟೊತ್ತಾದ್ರು ಬಾರದೆ ಇರುವುದನ್ನು ನೋಡಿದ ಜಯಕುಮಾರ್, ಮಗಳಿಗೆ ಏನೇ ಬುದ್ಧಿವಾದ ಹೇಳಿದ್ರು ಬದಲಾಗಲಿಲ್ಲ ಎಂದುಕೊಂಡು ಮಲಗಿದ್ದರು.

ರಾತ್ರಿ ಒಂದು ಗಂಟೆಗೆ ಸುಮಾರಿಗೆ ಮಾದಕ ವಸ್ತುವಿನ ಅಮಲಿನಲ್ಲಿ ತೇಲಿಕೊಂಡು‌ ಮನೆಗೆ ಬಂದ ಮಗಳು ಹಾಗೂ ಆಕೆಯ ಸ್ನೇಹಿತ, ಜಯಕುಮಾರ್​ ಮಲಗಿರುವುದ ಖಚಿತಪಡಿಸಿಕೊಂಡಿದ್ದಾರೆ. ಹತ್ಯೆಗೆಂದು ಖರೀದಿಸಿ ತಂದಿದ್ದ ಚಾಕುವಿನಿಂದ ಗಾಢ ನಿದ್ರೆಯಲ್ಲಿದ್ದ ಜಯಕುಮಾರ್​ಗೆ ಬರ್ಬರವಾಗಿ ಆರು ಬಾರಿ ಕುತ್ತಿಗೆಗೆ ಇರಿದು ಹತ್ಯೆ ಮಾಡಿದ್ದಾರೆ. ಬೆಡ್ ಸಂಪೂರ್ಣ ರಕ್ತಸಿಕ್ತವಾದ ಕಾರಣ ಹೆದರಿದ ಆರೋಪಿ ಪ್ರವೀಣ್ ಮತ್ತು ಮಗಳು, ಜಯಕುಮಾರ್​​ನ ದೇಹವನ್ನು ಬಚ್ಚಿಡಲು ಪ್ರಯತ್ನ ಪಟ್ಟಿದ್ದಾರೆ. ಅದಕ್ಕೂ ಮೊದಲು ಸಂಪೂರ್ಣ ರೂಮ್ ಸ್ವಚ್ಛ ಮಾಡಲು ಯತ್ನ ಮಾಡಿದ್ದಾರೆ. ಆದರೆ ಅವರ ಯಾವುದೇ ಪ್ರಯತ್ನಗಳು ಫಲಿಸುವುದಿಲ್ಲ ಎಂದು ಗೊತ್ತಾಗಿ ಹೊಸ ಸ್ಕೆಚ್ ಮಾಡಿ ತಡರಾತ್ರಿ ಮೃತದೇಹ ಸುಡಲು ಪ್ಲಾನ್ ಮಾಡಿ ಪೆಟ್ರೋಲ್ ತಂದು ಮನೆಯ ಸ್ನಾನದ ಕೊಠಡಿಯಲ್ಲಿ ದೇಹ ಸುಡಲು ವ್ಯವಸ್ಥೆ ಮಾಡಿದ್ದಾರೆ.

ನಂತರ ದೇಹವನ್ನು ಸ್ನಾನದ ಕೊಠಡಿಗೆ ಶಿಪ್ಟ್ ಮಾಡಿ ಪೆಟ್ರೊಲ್ ಸುರಿದು ಬೆಂಕಿ ಇಟ್ಟಿದ್ದಾರೆ. ಪೆಟ್ರೋಲ್ ಹಾಕುವಾಗ ಆರೋಪಿಗಳಿಬ್ಬರಿಗೂ ಬೆಂಕಿ ತಗುಲಿ ಸಣ್ಣಪುಟ್ಟ ಗಾಯಗಳಾಗಿವೆ. ಸ್ಥಳೀಯರು ಮನೆಯಲ್ಲಿ ಬರ್ತಿದ್ದ ಹೊಗೆ ನೋಡಿ ಅಗ್ನಿಶಾಮಕ ಸಿಬ್ಬಂದಿಗೆ ಮಾಹಿತಿ ನೀಡಿದ್ದಾರೆ. ಆಗ ಕೊಲೆ ವಿಚಾರ ಬೆಳಕಿಗೆ ಬಂದಿದೆ. ಸದ್ಯ ಆರೋಪಿಗಳನ್ನು ವಶಕ್ಕೆ ಪಡೆದ ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.