ಬಾಲಕ ರಾಜಕಾಲುವೆಗೆ ಬಿದ್ದ ಪ್ರಕರಣಕ್ಕೆ ಟ್ವಿಸ್ಟ್​: ದೃಶ್ಯ ಸಿಸಿಟಿವಿಯಲ್ಲಿ ಕೊನೆಕ್ಷಣದ ದೃಶ್ಯ ಸೆರೆ

ಗುಡ್ಡದಹಳ್ಳಿಯಲ್ಲಿ ಬಾಲಕ ರಾಜಕಾಲುವೆಗೆ ಬಿದ್ದು ನಾಪತ್ತೆಯಾದ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ತನಿಖೆ ಕೈಗೊಂಡಿರುವ ಪೊಲೀಸರು ನಾಪತ್ತೆಯಾದ ಬಾಲಕ, ಪಕ್ಕದ ಮನೆಯ ಬಾಲಕಿವೋರ್ವಳೊಂದಿಗೆ ಕಸ ಎಸೆಯಲು ತೆರಳಿದ್ದ ದೃಶ್ಯ ಸಿಸಿಟಿವಿ ಪತ್ತೆಯಾಗಿದೆ.

ಬೆಂಗಳೂರು: ರಾಜಕಾಲುವೆಗೆ ಬಿದ್ದು ಮಗು ಕೊಚ್ಚಿ ಹೋದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ. ಈ ಮಧ್ಯೆ ಕಾಲುವೆಗೆ ಬಿದ್ದ ಬಾಲಕ ಮಹಮ್ಮದ್​ನನ್ನು ಪಕ್ಕದ ಮನೆಯ ಬಾಲಕಿವೋರ್ವಳು ಕಸ ಬಿಸಾಡಲು ಕರೆದೊಯ್ಯುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಕಳೆದ ಶುಕ್ರವಾರ ಬಾಲಕ ಮಹಮ್ಮದ್ ತನ್ನ ಪಕ್ಕದ ಮನೆ ಹುಡುಗಿ ಜೊತೆ ಕಸ ಎಸೆಯಲು ತೆರಳಿದ್ದ. ಈ ವೇಳೆ ಆಯತಪ್ಪಿ ಗುಡ್ಡದಹಳ್ಳಿಯ ದೊಡ್ಡ ಮೊರಿಯೊಳಗೆ ಬಿದ್ದಿದ್ದ. ಆತ ಬಿದ್ದಿದ್ದನ್ನು ನೋಡಿದ ಬಾಲಕಿ ಸ್ಥಳದಿಂದ ಓಡಿ ಬಂದಿದ್ದಳು. ಆದ್ರೆ ಮಹಮ್ಮದ್​ ಕಾಲುವೆಯಲ್ಲಿ ಬಿದ್ದಿರುವ ಬಗ್ಗೆ ವಿಚಾರವನ್ನು ಯಾರಿಗೂ ಹೇಳಿರಲಿಲ್ಲ ಎನ್ನಲಾಗ್ತಿದೆ.

ಇನ್ನು ಮಹಮ್ಮದ್​ ಕಾಣೆಯಾಗಿರುವ ವಿಚಾರ ತಿಳಿದ ಆತನ ತಾಯಿ ಗುಲ್ಶಾನ್, ಮಗನನ್ನು ಹುಡುಕಿದ್ದಾಳೆ. ಮಗು ಎಲ್ಲೂ ಪತ್ತೆಯಾಗದಿದ್ದರಿಂದ ಮರುದಿನ ಬೆಳಗ್ಗೆ ಜೆಜೆ ನಗರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಳು. ಪೊಲೀಸರು ಬಾಲಕನಿಗಾಗಿ ಶೋಧಕಾರ್ಯ ಆರಂಭಿಸಿದ್ದರು. ಈ ವೇಳೆ ಸಿಸಿಟಿವಿ ಪರಿಶೀಲಿಸಿದಾಗ ಮಹಮ್ಮದ್ ನ್​ನ್ನು ಬಾಲಕಿ ಕರೆದೊಯ್ದಿರುವ ವಿಚಾರ ಬೆಳಕಿಗೆ ಬಂದಿದೆ. ಸದ್ಯ ಬಾಲಕಿಯನ್ನು ಪೋಷಕರು ವಿಚಾರಣೆ ನಡೆಸುತ್ತಿದ್ದು, ಆಕೆ ಹೆದರಿಕೊಂಡಿದ್ದು ಸರಿಯಾದ ಉತ್ತರ ನೀಡದ್ದಕ್ಕೆ ಪೋಷಕರು ಕಂಗಾಲಾಗಿದ್ದಾರೆ.