ಬೆಂಗಳೂರು: ಬಾಬಿನ್​​ನೊಳಗೆ ಸುತ್ತಿಟ್ಟಿದ್ದ ವಿಶ್ವದ ಅಪಾಯಕಾರಿ ಡ್ರಗ್ಸ್​ ವಶಕ್ಕೆ, ಏರ್​ಪೋರ್ಟ್​​ನಲ್ಲಿ ವ್ಯಕ್ತಿ ಸರೆ

ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಕಸ್ಟಮ್ಸ್​ ಅಧಿಕಾರಿಗಳು 5 ಕೋಟಿ ಮೌಲ್ಯದ 5.115 ಕೆ.ಜಿ ಎಫೆಡ್ರೈನ್ ಡ್ರಗ್ಸ್ ವಶಕ್ಕೆ ಪಡೆದಿದ್ದಾರೆ.

ದೇವನಹಳ್ಳಿ:ವಿಶ್ವದ ಅತ್ಯಂತ ಅಪಾಯಕಾರಿಯಾದ ಎಫೆಡ್ರೈನ್ ಡ್ರಗ್ಸ್​ ಸಾಗಣೆ ಮಾಡುತ್ತಿದ್ದ ಜಾಲವನ್ನು ಪತ್ತೆ ಮಾಡುವ ಮೂಲಕ ಬೆಂಗಳೂರು ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಕಸ್ಟಮ್ಸ್​ ಅಧಿಕಾರಿಗಳು 5 ಕೋಟಿ ಮೌಲ್ಯದ 5.115 ಕೆ.ಜಿ. ಎಫೆಡ್ರೈನ್ ಡ್ರಗ್ಸ್ ವಶಕ್ಕೆ ಪಡೆದಿದ್ದಾರೆ.

ಬಾಬಿನ್​ಗಳ ಮೂಲಕ ಡಗ್ಸ್​ ಸಾಗಿಸಲು ಯತ್ನ

ವಿಶ್ವದ ಅತ್ಯಂತ ಅಪಾಯಕಾರಿಯಾದ ಎಫೆಡ್ರೈನ್ ಡ್ರಗ್ಸ್ ವಿವಿಧ ದೇಶಗಳಲ್ಲಿ ನಿಷೇಧ ಮಾಡಲಾಗಿದೆ. ಎಫೆಡ್ರೈನ್ ಡ್ರಗ್ಸ್ ಕೆಲ ರೋಗಗಳ ಚಿಕಿತ್ಸೆಗಾಗಿ ಕ್ಯಾಪ್ಸೂಲ್, ಟ್ಯಾಬ್ಲೆಟ್, ಚುಚ್ಚುಮದ್ದುಗಳ ರೂಪದಲ್ಲಿ ಬಳಕೆ ಮಾಡಲಾಗುತ್ತಿದೆ. ಚೆನ್ನೈ ಮೂಲದ ವ್ಯಕ್ತಿ ಸುಮಾರು 5 ಕೋಟಿ ಮೌಲ್ಯದ 5.115 ಕೆ.ಜಿ. ಎಫೆಡ್ರೈನ್ ಡ್ರಗ್ಸ್ ಅನ್ನು ಬಟ್ಟೆ ಹೊಲಿಗೆ ಯಂತ್ರದಲ್ಲಿ ಬಳಸುವ ಬಾಬಿನ್​ಗಳೊಳಗೆ ಇರಿಸಿ ಆಸ್ಟ್ರೇಲಿಯಾಗೆ ಸಾಗಿಸುತ್ತಿದ್ದ.

5 ಕೋಟಿ ಮೌಲ್ಯದ ಎಫೆಡ್ರೈನ್ ಡ್ರಗ್ಸ್

ಸುಮಾರು 45 ಬಾಬಿನ್​ಗಳೊಳಗೆ ಸುರುಳಿ ರೂಪದಲ್ಲಿ ಎಫೆಡ್ರೈನ್ ಡ್ರಗ್ಸ್​ ಇಡಲಾಗಿತ್ತು. ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಕಾರ್ಗೋ ಮೂಲಕ ಆಸ್ಟ್ರೇಲಿಯಾಗೆ ಕಳಿಸಲಾಗುತ್ತಿತ್ತು. ಈ ಸಂಬಂಧ NDPS ಆಕ್ಟ್ 1985 ಪ್ರಕಾರ ಪ್ರಕರಣ ದಾಖಲಾಗಿದೆ.

ಏನಿದು ಎಫೆಡ್ರೈನ್​ ಡ್ರಗ್?

ಎಫೆಡ್ರೈನ್ ಒಂದು ಉತ್ತೇಜಕ ಮತ್ತು ಥರ್ಮೋಜೆನಿಕ್(ಶಾಖ ಉತ್ಪಾದಕ) ಡ್ರಗ್. ಇದನ್ನು ಎಫೆಡ್ರಾ ಎಂದು ಕರೆಯಲ್ಪಡುವ ಮೂಲಿಕೆಯಿಂದ ತಯಾರು ಮಾಡಲಾಗುತ್ತದೆ. ಇದನ್ನು ಸಾಮಾನ್ಯವಾಗಿ ಉತ್ತೇಜಕ, ಹಸಿವು ನಿವಾರಕ, ಏಕಾಗ್ರತೆಗೆ ನೆರವು, ಮತ್ತು ಅರಿವಳಿಕೆಗೆ ಸಂಬಂಧಿಸಿದ ಹೈಪೊಟೆನ್ಷನ್ ಚಿಕಿತ್ಸೆಗಾಗಿ ಬಳಸಲಾಗುತ್ತದೆ. ಎಫೆಡ್ರೈನ್ ಉತ್ತೇಜಕಕಾರಿಯಾಗಿರುವುದರಿಂದ ಈ ಡ್ರಗ್​ ಅನ್ನು ಸಾಮಾನ್ಯವಾಗಿ ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆಯೇ ಹೆಚ್ಚು.

ಅಪಾಯಕಾರಿ ಎಫೆಡ್ರೈನ್:

ಎಫೆಡ್ರಾ ತ್ವರಿತವಾಗಿ ಹೃದಯ ಬಡಿತ ಮತ್ತು ರಕ್ತದೊತ್ತಡವನ್ನು ಹೆಚ್ಚಿಸುತ್ತದೆ. ಇದರ ಅಡ್ಡ ಪರಿಣಾಮಗಳೆಂದರೆ ಹೃದಯ ಬಡಿತ, ವಾಕರಿಕೆ ಮತ್ತು ವಾಂತಿ. ಗಿಡಮೂಲಿಕೆಗಳ ಬಳಕೆಯಿಂದ 800ಕ್ಕೂ ಹೆಚ್ಚು ಅಪಾಯಕಾರಿ ಪ್ರತಿಕ್ರಿಯೆಗಳು ವರದಿಯಾಗಿವೆ. ಇವುಗಳಲ್ಲಿ ಹೃದಯಾಘಾತ, ಪಾರ್ಶ್ವವಾಯು, ರೋಗಗ್ರಸ್ತವಾಗುವಿಕೆಗಳು ಮತ್ತು ಹಠಾತ್ ಸಾವುಗಳು ಸೇರಿವೆ.