ಕಳೆದ ವರ್ಷಕ್ಕಿಂತ ಈ ವರ್ಷ ಮರಣ ಪ್ರಮಾಣದಲ್ಲಿ ಇಳಿಕೆ; ಬಿಬಿಎಂಪಿ ಸ್ಪಷ್ಟನೆ

ಕೋವಿಡ್​ ವೈರಸ್ ತಗುಲಿ ಸತ್ತವರನ್ನು ಹೊರತುಪಡಿಸಿಯೂ ಬೆಂಗಳೂರಿನಲ್ಲಿ ಮಾಮೂಲಿಗಿಂತ 10 ಸಾವಿರ ಜನರು ಹೆಚ್ಚಾಗಿ ಸಾವನ್ನಪ್ಪಿದ್ದಾರೆ. ಈ ಸಾವುಗಳು ಹೇಗಾದವು ಎಂಬ ಬಗ್ಗೆ ರಾಜ್ಯ ಸರ್ಕಾರ ಸಮಗ್ರ ಮಾಹಿತಿ ನೀಡಬೇಕು ಎಂದಿದ್ದ ಕೈ ಶಾಸಕರ ಮಾತಿಗೆ ಬಿಬಿಎಂಪಿ ಸ್ಪಷ್ಟನೆ ನೀಡಿದೆ.

ಬೆಂಗಳೂರು:2020ರ ಜನವರಿ ತಿಂಗಳಿನಿಂದ ಜುಲೈ ತಿಂಗಳ ವರೆಗೆ 35,307 ಜನ ಮೃತಪಟ್ಟಿದ್ದಾರೆ ಎಂದು ಬಿಬಿಎಂಪಿಯ ಸಾಂಖ್ಯಿಕ ವಿಭಾಗ ತಿಳಿಸಿದೆ.

ಬಿಬಿಎಂಪಿ ಸ್ಪಷ್ಟನೆ

ಮಾಜಿ ಸಚಿವ ಹೆಚ್​.ಕೆ. ಪಾಟೀಲ್​ ಇತ್ತೀಚೆಗೆ ಬಿಡುಗಡೆ ಮಾಡಿದ್ದ ಪತ್ರಿಕಾ ಹೇಳಿಕೆಯಲ್ಲಿ ಬೆಂಗಳೂರು ನಗರದಲ್ಲಿ ಜನವರಿಯಿಂದ - ಜುಲೈ ವರೆಗೆ 49,135 ಜನರ ಸಾವಿನ ಪ್ರಕರಣ ವರದಿಯಾಗಿದೆ ಎಂದು ಹೇಳಲಾಗಿತ್ತು. ಕಳೆದ ವರ್ಷ ಇದೇ ಅವಧಿಯಲ್ಲಿ 37,001 ಸಾವು ಸಂಭವಿಸಿದೆ. ಒಟ್ಟಿನಲ್ಲಿ ಈ ವರ್ಷ 12,134 ಸಾವು ಪ್ರಕರಣ ಹೆಚ್ಚಾಗಿದೆ ಎಂದು ಉಲ್ಲೇಖಿಸಿದ್ದರು.

ಬಿಬಿಎಂಪಿ ಸ್ಪಷ್ಟನೆ

ಇದಕ್ಕೆ ಸ್ಪಷ್ಟನೆ ನೀಡಿರುವ ಬಿಬಿಎಂಪಿ, ಕಳೆದ ವರ್ಷ ಜನವರಿಯಿಂದ - ಜುಲೈ ವರೆಗೆ 37,004, ಈ ವರ್ಷ ಇದೇ ಅವಧಿಯಲ್ಲಿ 35,307 ಸಾವಿನ ಪ್ರಕರಣ ವರದಿಯಾಗಿದೆ ಎಂದು ತಿಳಿಸಿದೆ. ಒಟ್ಟಿನಲ್ಲಿ ಶಾಸಕ ಹೆಚ್​.ಕೆ. ಪಾಟೀಲ್ ನೀಡಿರುವ ಅಂಕಿ-ಅಂಶಗಳು ಯಾವ ಮೂಲಗಳಿಂದ ಸಿಕ್ಕಿವೆ ಎಂಬ ಮಾಹಿತಿ ಇಲ್ಲ.

ಸದ್ಯ ಪಾಲಿಕೆ ನೀಡಿರುವ ಅಂಕಿ-ಅಂಶ ರಾಜ್ಯ ಸರ್ಕಾರದ ಜನನ ಮತ್ತು ಮರಣ ಮುಖ್ಯನೋಂದಣಾಧಿಕಾರಿಯ ಕಚೇರಿಯ ಅಧಿಕೃತ ಜಾಲತಾಣದ ಮಾಹಿತಿಯಾಗಿದ್ದು ಸತ್ಯತೆಯಿಂದ ಕೂಡಿದೆ ಎಂದು ಜಂಟಿ ಆಯುಕ್ತರು ತಿಳಿಸಿದ್ದಾರೆ.

ಬಿಬಿಎಂಪಿ ನೀಡಿರುವ ಮರಣ ಪ್ರಕರಣಗಳ ಮಾಹಿತಿ

ತಿಂಗಳು	2019	2020
ಜನವರಿ	5,168	5,983
ಫೆಬ್ರವರಿ	5,766	5,454
ಮಾರ್ಚ್	5,400	4,716
ಏಪ್ರಿಲ್	4,806	3,327
ಮೇ	4,687	4,881
ಜೂನ್	4,687	4,881
ಜುಲೈ	5,278	6,477
ಒಟ್ಟು	37,004	35,307

ಕೋವಿಡ್​ ವೈರಸ್ ತಗುಲಿ ಸತ್ತವರನ್ನು ಹೊರತುಪಡಿಸಿಯೂ ಬೆಂಗಳೂರಿನಲ್ಲಿ ಮಾಮೂಲಿಗಿಂತ ಹತ್ತು ಸಾವಿರ ಜನರು ಹೆಚ್ಚಾಗಿ ಸಾವನ್ನಪ್ಪಿದ್ದಾರೆ. ಈ ಸಾವುಗಳು ಹೇಗಾದವು ಎಂಬ ಬಗ್ಗೆ ರಾಜ್ಯ ಸರ್ಕಾರ ಸಮಗ್ರ ಮಾಹಿತಿ ನೀಡಬೇಕು ಎಂದು ಮಾಜಿ ಸಚಿವ ಹೆಚ್.ಕೆ. ಪಾಟೀಲ್ ಒತ್ತಾಯಿಸಿದ್ದರು.