ಪ್ಲಾಸ್ಟಿಕ್ ಮುಕ್ತ ಅಭಿಯಾನ: ರಸ್ತೆಗಿಳಿದು ಸ್ವಚ್ಚತಾ ಕಾರ್ಯ ಮಾಡಿದ ಹೋಟೆಲ್ ಸಿಬ್ಬಂದಿಗಳು

ಇಂದಿರಾ ನಗರದಲ್ಲಿರುವ ಬಹುತೇಕ ಎಲ್ಲಾ ಪಬ್ ಮತ್ತು ಹೋಟೆಲ್​ಗಳ ಸಿಬ್ಬಂದಿವರ್ಗದವರು ಇಂದಿರಾನಗರದ, ಪಾಪರೆಡ್ಡಿಪಾಳ್ಯ, ಎಚ್ಎಎಲ್ ಎರಡನೇ ಹಂತದ ಸಂಪೂರ್ಣ ರಸ್ತೆ ಚರಂಡಿಗಳನ್ನು ಸ್ವಚ್ಛ ಮಾಡಿ ಜನಸಾಮಾನ್ಯರಲ್ಲಿ ಪ್ಲಾಸ್ಟಿಕ್ ಬಳಸದಂತೆ ಅರಿವು ಮೂಡಿಸಿದರು.

ಬೆಂಗಳೂರು : ಗಾಂಧೀಜಿ ಅವರ 150ನೇ ವರ್ಷಾಚರಣೆ ಪ್ರಯುಕ್ತ, ದೇಶದೆಲ್ಲೆಡೆ ಪ್ಲಾಸ್ಟಿಕ್ ಮುಕ್ತ ಅಭಿಯಾನಕ್ಕೆ ಚಾಲನೆ ಸಿಕ್ಕ ಹಿನ್ನೆಲೆಯಲ್ಲಿ, ಭಾನುವಾರ ಇಂದಿರಾನಗರದ ಹೋಟೆಲ್​ಗಳ ಸಿಬ್ಬಂದಿಗಳು ರಸ್ತೆಗಿಳಿದು ಸ್ವಚ್ಛತಾ ಕಾರ್ಯ ಮಾಡಿದ್ದಾರೆ.

ಭಾನುವಾರ ಮುಂಜಾನೆ 7 ಗಂಟೆಯಿಂದ, ಇಂದಿರಾ ನಗರದಲ್ಲಿರುವ ಬಹುತೇಕ ಎಲ್ಲಾ ಪಬ್ ಮತ್ತು ಹೋಟೆಲ್​ಗಳ ಸಿಬ್ಬಂದಿವರ್ಗದವರು ಇಂದಿರಾನಗರದ, ಪಾಪರೆಡ್ಡಿಪಾಳ್ಯ, ಎಚ್ಎಎಲ್ ಎರಡನೇ ಹಂತದ ಸಂಪೂರ್ಣ ರಸ್ತೆ ಚರಂಡಿಗಳನ್ನು ಸ್ವಚ್ಛ ಮಾಡಿ ಜನಸಾಮಾನ್ಯರಲ್ಲಿ ಪ್ಲಾಸ್ಟಿಕ್ ಬಳಸದಂತೆ ಅರಿವು ಮೂಡಿಸಿದರು. ಕಾರ್ಯಕ್ರಮಕ್ಕೆ ಇಂದಿರಾ ನಗರದ ನಿವಾಸಿಗಳು ಮತ್ತು ಮಕ್ಕಳು ಸಹ ಕೈಜೋಡಿಸಿದ್ದರು.

ಈಗಾಗಲೇ ಬಿಬಿಎಂಪಿ ನಗರದ ಅನೇಕ ಸ್ಟಾರ್ ಹೋಟೆಲ್​​ಗಳು ಸೇರಿದಂತೆ ಮಳಿಗೆಗಳಿಗೆ ಪ್ಲಾಸ್ಟಿಕ್ ಬಳಕೆ ಮಾಡಿದಕ್ಕೆ ದಂಡವನ್ನು ವಿಧಿಸಿದ್ದು, ಕಸಗಳನ್ನು ಸರಿಯಾದ ರೀತಿಯಲ್ಲಿ ವಿಂಗಡಣೆ ಮಾಡದ ಕಾರಣಕ್ಕೆ ಎಚ್ಚರಿಕೆ ನೀಡುತ್ತಿರುವ ಈ ಸಂದರ್ಭದಲ್ಲಿ, ಹೋಟೆಲ್ ಮತ್ತು ಪಬ್​​​ಗಳು ಸ್ವಯಂಪ್ರೇರಿತವಾಗಿ ರಸ್ತೆಗಿಳಿದು ಪ್ಲಾಸ್ಟಿಕ್ ಮುಕ್ತ ಬಡಾವಣೆ ಮಾಡಲು ಪಣ ತೊಟ್ಟಿರುವುದು ನಿವಾಸಿಗಳ ಪ್ರಶಂಸೆಗೆ ಪಾತ್ರವಾಗಿದೆ.