ಸಂಪತ್​ರಾಜ್ ಮೆಡಿಕಲ್ ರಿಪೋರ್ಟ್ ನೋಡಿ ದಂಗಾದ ಸಿಸಿಬಿ: 2 ತಿಂಗಳಲ್ಲಿ 4 ಬಾರಿ ಅಡ್ಮಿಟ್ & ಡಿಸ್ಚಾರ್ಜ್

ಶಾಸಕ ಅಖಂಡ ಶ್ರೀನಿವಾಸಮೂರ್ತಿ ಮನೆಗೆ ಬೆಂಕಿ ಇಟ್ಟ ಪ್ರಕರಣದಲ್ಲಿ ಆರೋಪಿಯಾಗಿರುವ ಸಂಪತ್ ರಾಜ್ ರಕ್ಷಣೆ ಮಾಡಲು ಹೋಗಿ ಆಸ್ಪತ್ರೆಯವರೇ ಸಿಕ್ಕಿ ಬಿದ್ದಿದ್ದಾರೆ. 2 ತಿಂಗಳಲ್ಲಿ 4 ಬಾರಿ ಅಡ್ಮಿಟ್, 4 ಬಾರಿ ಡಿಸ್ಚಾರ್ಜ್ ಮಾಡಿ ನಕಲಿ ರಿಪೋರ್ಟ್ ಅನ್ನು ಆಸ್ಪತ್ರೆ ಆಡಳಿತ ಮಂಡಳಿ ಸೃಷ್ಟಿ ಮಾಡಿರುವ ವಿಚಾರ ಬೆಳಕಿಗೆ ಬಂದಿದೆ.

ಬೆಂಗಳೂರು: ಶಾಸಕ ಅಖಂಡ ಶ್ರೀನಿವಾಸಮೂರ್ತಿ ಮನೆಗೆ ಬೆಂಕಿ‌ಯಿಟ್ಟ ಪ್ರಕರಣ ಸಂಬಂಧ ಹೆಬ್ಬಾಳದ ಬ್ಯಾಪ್ಟಿಸ್ಟ್ ಆಸ್ಪತ್ರೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ಸಿಸಿಬಿಗೆ ಶಾಕ್ ಕಾದಿತ್ತು. ಹೌದು, ಸಂಪತ್ ರಾಜ್​​​ ರಕ್ಷಣೆ ಮಾಡಲು ಬ್ಯಾಪ್ಟಿಸ್ಟ್ ಆಸ್ಪತ್ರೆ ನಾಟಕವಾಡಿರುವ ವಿಚಾರ ಬಯಲಾಗಿದೆ.

ಸಂಪತ್​​ ರಾಜ್​​ ತಾನು ಬಂಧನಕ್ಕೊಳಗಾಗುತ್ತೇನೆ ಎಂದು ಹೆದರಿ ಮೊದಲು ಸೆಪ್ಟಂಬರ್ 14 ರಂದು ಆಸ್ಪತ್ರೆಗೆ ದಾಖಲಾಗಿದ್ದರು. ಈ ವೇಳೆ ಸಿಸಿಬಿ ಅಧಿಕಾರಿಗಳು ಆಸ್ಪತ್ರೆಗೆ ಭೇಟಿ ನೀಡಿದಾಗ ಆಸ್ಪತ್ರೆ ಅಧಿಕಾರಿಗಳ ಭೇಟಿಗೆ ಅವಕಾಶ ನೀಡಿರಲಿಲ್ಲ. ಮೊದಲ ಬಾರಿ ಚಿಕಿತ್ಸೆ ಅವಧಿ ಮುಗಿದ ಮೇಲೆ ಮತ್ತೊಮ್ಮೆ ಕೋವಿಡ್​​​ ತಗುಲಿರುವ ನೆಪ ಹೇಳಿ ಆಸ್ಪತ್ರೆಗೆ ದಾಖಲಾದರು. ತನಿಖೆಯ ವೇಳೆ ಸಿಸಿಬಿ ನಡೆಗೆ ಹೆದರಿದ್ದ ಬ್ಯಾಪ್ಟಿಸ್ಟ್ ಪ್ರಕರಣದಿಂದ ತಪ್ಪಿಸಿಕೊಳ್ಳಲು ಮಾಸ್ಟರ್ ಪ್ಲ್ಯಾನ್​​ ಮಾಡಿತ್ತು. ಆದರೆ, ಸಿಸಿಬಿ ಆಸ್ಪತ್ರೆ ನಡೆಯ ಬಗ್ಗೆ ಕೆಎಂಸಿಗೆ ದೂರು ನೀಡಲು ಮುಂದಾಗಿತ್ತು.

ಹೀಗಾಗಿ ಸಂಪತ್​​ ರಾಜ್ ನಕಲಿ ರಿಪೋರ್ಟ್ ಸೃಷ್ಟಿ ಮಾಡಿದ ಆಡಳಿತ ಮಂಡಳಿ 2 ತಿಂಗಳಲ್ಲಿ 4 ಬಾರಿ ಅಡ್ಮಿಟ್, 4 ಬಾರಿ ಡಿಸ್ಚಾರ್ಜ್ ಮಾಡಿದ್ದಾರೆ. ಸಂಪತ್ ರಾಜ್ 2 ತಿಂಗಳ ಅವಧಿಯನ್ನು ನಾಲ್ಕು ಬಾರಿ ಡಿವೈಡ್ ಮಾಡಿ 15ನೇ ದಿನ ಡಿಸ್ಚಾರ್ಜ್ ಹಾಗೂ 17 ನೇ ದಿನ ಅಡ್ಮಿಟ್ ಮಾಡಿಕೊಂಡಿದ್ದರು. ಈ ರೀತಿ ದಾಖಲೆಗಳನ್ನ ರೆಡಿ ಮಾಡಿಕೊಂಡಿರುವ ವಿಚಾರ ನಿನ್ನೆ ಸಿಸಿಬಿ ಭೇಟಿ ಕೊಟ್ಟ ವೇಳೆ ಬೆಳಕಿಗೆ ಬಂದಿದೆ.

ಈಗಾಗಲೇ ಆಸ್ಪತ್ರೆಯವರನ್ನು ವಿಚಾರಣೆಗೆ ಒಳಪಡಿಸಿದ್ದು, ಮುಂದಿನ ದಿನ ಯಾವ ಕ್ರಮ ಕೈಗೊಳ್ಳುತ್ತಾರೆ ಎಂಬುದನ್ನು ಕಾದು ನೋಡಬೇಕು. ಸದ್ಯ ಮೆಡಿಕಲ್ ರಿಪೋರ್ಟ್ ಸೀಜ್ ಮಾಡಿ ಸಂಪತ್​​​​ ಪತ್ತೆಗೆ ಶೋಧ ಕಾರ್ಯವನ್ನು ಸಿಸಿಬಿ ಪೊಲೀಸರು ಮುಂದುವರೆಸಿದ್ದಾರೆ.