ಬೆಂಗಳೂರು: ಬುಧವಾರ ರಾಜ್ಯಾದ್ಯಂತ 15 ಮಂದಿ ಭ್ರಷ್ಟ ಅಧಿಕಾರಿಗಳಿಗೆ ಚಳಿ ಬಿಡಿಸಿದ್ದ ಎಸಿಬಿ ಅಧಿಕಾರಿಗಳು, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ಕಚೇರಿ ಹಾಗೂ ಉಪ ಕಚೇರಿಗಳ ಮೇಲೆ ಇಂದು ಸಹ ದಾಳಿ ಮುಂದುವರೆಸಿದ್ದಾರೆ. ದಾಖಲಾತಿಗಳ ಪರಿಶೀಲನೆ ನಡೆಯುತ್ತಿದ್ದು, ಅಕ್ರಮ ವ್ಯವಹಾರಗಳ ಜಾಡನ್ನು ಭೇದಿಸುತ್ತಿದ್ದಾರೆ.
ಬಿಡಿಎ ಕಚೇರಿಗಳ ಮೇಲೆ ಎಸಿಬಿ ದಾಳಿ
ಕೆಲ ದಿನಗಳ ಹಿಂದೆ ಕೇಂದ್ರ ಕಚೇರಿ ಹಾಗೂ ಉಪ ಕಚೇರಿಗಳ ಮೇಲೆ ದಾಳಿ ಮಾಡಿ ಮಹತ್ವದ ದಾಖಲಾತಿಗಳನ್ನು ಎಸಿಬಿ ಅಧಿಕಾರಿಗಳು ವಶಕ್ಕೆ ಪಡೆದಿದ್ದರು. ಈ ವೇಳೆ ಹಲವು ಅಕ್ರಮ ಎಸಗಿರುವುದು ಪತ್ತೆಯಾಗಿತ್ತು. ಒಂದೇ ನಿವೇಶನವನ್ನ ಮೂರ್ನಾಲ್ಕು ಜನಕ್ಕೆ ಮಂಜೂರು ಮಾಡಿ ಮೂಲ ಮಾಲೀಕರಿಗೆ ನಿವೇಶನ ಹಂಚದೆ ವಂಚನೆ, ಕಾರ್ನರ್ ಸೈಟ್ ಹಂಚಿಕೆಯಲ್ಲಿ ಅಕ್ರಮ ಹೀಗೆ ಹಲವು ರೀತಿಯ ಹಗರಣ ನಡೆದಿರುವುದು ಬೆಳಕಿಗೆ ಬಂದಿತ್ತು.