ದೆಹಲಿ ಮೊಹಲ್ಲಾ ಕ್ಲಿನಿಕ್ ಮಾದರಿಯಲ್ಲೇ ಬೆಂಗಳೂರಲ್ಲಿ ಆಮ್ ಆದ್ಮಿ ಕ್ಲಿನಿಕ್!

ದೆಹಲಿಯಲ್ಲಿ ಆರಂಭ ಮಾಡಲಾಗಿರುವ ಮೊಹಲ್ಲಾ ಕ್ಲಿನಿಕ್​ ರೀತಿಯಲ್ಲಿ ಬೆಂಗಳೂರಿನಲ್ಲಿ ಆಮ್​ ಆದ್ಮಿ ಪಕ್ಷ ಕ್ಲಿನಿಕ್ ಆರಂಭ ಮಾಡಿದೆ.

ಬೆಂಗಳೂರು:ಬಡವರು, ಜನಸಾಮಾನ್ಯರ ಆರೋಗ್ಯ ಸೇವೆಗಾಗಿ ಗಲ್ಲಿ-ಗಲ್ಲಿಗಳಲ್ಲಿ ಉಚಿತವಾಗಿ ಚಿಕಿತ್ಸೆ ನೀಡುವ ದೆಹಲಿ ಸರ್ಕಾರ ಆರಂಭಿಸಿದ ಮೊಹಲ್ಲಾ ಕ್ಲಿನಿಕ್ ಮಾದರಿಯಲ್ಲೇ ಬೆಂಗಳೂರಲ್ಲೂ ಆಮ್ ಆದ್ಮಿ ಕ್ಲಿನಿಕ್ ಆರಂಭವಾಗಲಿದೆ.

ನವೆಂಬರ್ ಒಂದರಂದು, ಶಾಂತಿನಗರದ ಬಸಪ್ಪ ರಸ್ತೆಯಲ್ಲಿ ಆಮ್ ಆದ್ಮಿ ಪಕ್ಷ ಹಾಗೂ ಟ್ರಸ್ಟ್ ಜೊತೆಗೂಡಿ ಈ ಕ್ಲಿನಿಕ್ ನಡೆಸಲಿದೆ. ಕೋವಿಡ್ ಸೇರಿದಂತೆ 60 ವಿಧದ ಲ್ಯಾಬ್​ ಟೆಸ್ಟ್​ಗಳು ಉಚಿತವಾಗಿ ಮಾಡಿಕೊಡಲಿದ್ದಾರೆ. ಮೆಡಿಕಲ್ ಟೆಸ್ಟ್ ಗಳು, ಖಾಯಿಲೆಗಳಿಗೆ ಉಚಿತ ಔಷಧಿ, ಹೆಚ್ಚಿನ ಚಿಕಿತ್ಸೆ ಅಗತ್ಯವಿದ್ದರೆ ಬೇರೆ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಕೊಡಿಸುವ ಭರವಸೆಯನ್ನೂ ನೀಡಿದ್ದಾರೆ.

ಸೋಮವಾರದಿಂದ ಶನಿವಾರದವರೆಗೆ ಬೆಳಗ್ಗೆ 9 ರಿಂದ ಮಧ್ಯಾಹ್ನ 1 ರವರೆಗೆ ಈ ಕ್ಲಿನಿಕ್ ತೆರೆದಿರಲಿದೆ. ಸ್ವಯಂ ಪ್ರೇರಿತರಾಗಿ ಹತ್ತು ಜನ ವೈದ್ಯರು ಈ ಕ್ಲಿನಿಕ್​ಗೆ ಬರಲಿದ್ದು, ಜನ ಸಾಮಾನ್ಯರ ಆರೋಗ್ಯ ತಪಾಸಣೆ, ಚಿಕಿತ್ಸೆಗೆ ಸಲಹೆ, ಔಷಧಿ ನೀಡಲಿದ್ದಾರೆ. ಅಲ್ಲದೆ ತಜ್ಞ ವೈದ್ಯರ ಅಗತ್ಯವಿದ್ದರೂ ವ್ಯವಸ್ಥೆ ಮಾಡಲಾಗುವುದು. ಬೆಂಗಳೂರಿನಲ್ಲಿ ಪ್ರಥಮವಾಗಿ ವೈದ್ಯಕೀಯ ಸೇವೆ ನೀಡುವ ಕ್ಲಿನಿಕ್​ಗೆ ಚಾಲನೆ ನೀಡಲಾಗ್ತಿದೆ.

ಜನರು ಇದರ ಸದುಪಯೋಗ ಪಡಿಸಿಕೊಳ್ಳಬೇಕು ಎಂದು ಆಮ್ ‌ಆದ್ಮಿ ಪಕ್ಷದ ರಾಜ್ಯ ಮಾಧ್ಯಮ ಸಂಚಾಲಕರಾದ ಜಗದೀಶ್ ವಿ ಸದಮ್ ಈಟಿವಿ ಭಾರತ್​ಗೆ ತಿಳಿಸಿದ್ದಾರೆ.