ಭಲೇ ಅಜ್ಜಿ... ಕೋವಿಡ್ ವಿರುದ್ಧ ಹೋರಾಡಿ ಗೆದ್ದ 99 ವರ್ಷದ ಬೆಂಗಳೂರು ವೃದ್ಧೆ!

ಕೊರೊನಾ ಭಯದಿಂದಲೇ ಕೆಲವರು ಪ್ರಾಣಕ್ಕೆ ಕುತ್ತು ತಂದುಕೊಂಡವರಿದ್ದಾರೆ. ಆದ್ರೆ ಅಂಜದೆ, ಅಳುಕದೇ ಬೆಂಗಳೂರಿನ 99 ವರ್ಷದ ವೃದ್ಧೆವೋರ್ವರು ಕೋವಿಡ್​ ವಿರುದ್ಧ ಹೋರಾಟ ನಡೆಸಿ ಸಂಪೂರ್ಣ ಗುಣಮುಖರಾಗಿದ್ದಾರೆ.

ಬೆಂಗಳೂರು: ಕೊರೊನಾ ವಿರುದ್ಧ ಹೋರಾಡಲು ದೈಹಿಕ ಸಾಮರ್ಥ್ಯ ಮಾತ್ರವಲ್ಲದೆ, ಮಾನಸಿಕ ಸ್ಥೈರ್ಯ ಕೂಡ ಅಗತ್ಯ. ಹೀಗೆ ಕೊರೊನಾ ಸೋಂಕು ತಗುಲಿದ್ದರೂ ಸಹ, ವೈರಸ್ ವಿರುದ್ಧ ಹೋರಾಡಿದ 99 ವರ್ಷದ ವೃದ್ಧೆ ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್​ ಆಗಿದ್ದಾರೆ.

ಕೊರೊನಾ ವಿರುದ್ಧ ಗೆದ್ದು ಬಂದಿರುವ 99 ವರ್ಷದ ವೃದ್ಧೆಯ ಹೆಸರು ಪಾರ್ವತಿಬಾಯಿ. ಕೆಮ್ಮು ಜ್ವರದಿಂದ ಬಳಲುತ್ತಿದ್ದ ಇವರು ಮಲ್ಲೇಶ್ವರಂನಲ್ಲಿರುವ ಮಣಿಪಾಲ್​ ಆಸ್ಪತ್ರೆಗೆ ಆಗಸ್ಟ್​ 1ರಂದು ದಾಖಲಾಗಿದ್ದರು. ಇದೀಗ ಆ.11ರಂದು ಸಂಪೂರ್ಣ ಗುಣಮುಖರಾಗಿ ಡಿಸ್ಚಾರ್ಜ್​ ಆಗಿದ್ದಾರೆ.

ಕೊರೊನಾ ಬಂದ ತಕ್ಷಣ ಗಾಬರಿಯಾಗುವ ಅಗತ್ಯವಿಲ್ಲ. ಹೆದರಿ ಮಾನಸಿಕ ಖಿನ್ನತೆಗೆ ಒಳಗಾಗುವ ಬದಲು ಧೈರ್ಯದಿಂದ ಚಿಕಿತ್ಸೆ ಪಡೆದುಕೊಳ್ಳಬೇಕಿದೆ. ಹಿರಿಯರಿಗೆ ಕೊರೊನಾ ತೀವ್ರತೆ ಹೆಚ್ಚಾಗಿದ್ದರೂ, ಮಾನಸಿಕ ಸ್ಥೈರ್ಯದಿಂದ ಜಯ ಗಳಿಸಬಹುದು ಅನ್ನೋದಕ್ಕೆ ಇವರೇ ಸಾಕ್ಷಿಯಾಗಿದ್ದಾರೆ.