ಬೆಂಗಳೂರು: ಬೆನ್ನುಮೂಳೆ ಸಮಸ್ಯೆಯಿಂದ ಬಳಲುತ್ತಿರುವ ರೋಗಿಗಳಿಗೆ ಚಿಕಿತ್ಸೆ ನೀಡುವ ವೇಳೆ ಅತ್ಯಂತ ತೀಕ್ಷ್ಣವಾದ ಚಿತ್ರಗಳನ್ನು ಪಡೆಯುವಲ್ಲಿ ವೈದ್ಯರಿಗೆ ಸಹಕಾರಿಯಾಗುವ ಇಂಟ್ರಾಆಪರೇಟಿವ್ 3ಡಿ ತಂತ್ರಜ್ಞಾನವನ್ನು ಬಿಆರ್ ಲೈಫ್, ಎಸ್.ಎಸ್.ಎನ್.ಎಂ.ಸಿ ಆಸ್ಪತ್ರೆ ಹಾಗೂ ಬ್ರೈನ್ಸ್ ನ್ಯೂರೊ ಸ್ಪೈನ್ ಸೆಂಟರ್ ಪರಿಚಯಿಸಲಾಗುತ್ತಿದೆ.
ಆರೋಗ್ಯ ಕ್ಷೇತ್ರದಲ್ಲಿ ಹೊಸ ಹೊಸ ತಂತ್ರಜ್ಞಾನಗಳು ಬರುತ್ತಲೇ ಇರುತ್ತವೆ. ಸದ್ಯ ನರ ಶಸ್ತ್ರಚಿಕಿತ್ಸಕರಿಗೆ ಸಹಾಯ ಮಾಡುವ ಈ ತಂತ್ರಜ್ಞಾನವೂ ಕೇವಲ 60 ಸೆಕೆಂಡ್ನಲ್ಲಿ 3ಡಿ ಚಿತ್ರವಾಗಿ ಪರಿವರ್ತಿಸಬಹುದಾಗಿದೆ. ರೋಗಿಗಳಿಗೆ ಹಾಗೂ ವೈದ್ಯರಿಗೂ ಈ ತಂತ್ರಜ್ಞಾನ ವರದಾನವಾಗಿದೆ. ಈ ತಂತ್ರಜ್ಞಾನವೂ ಡಿಜಿಟಲ್ ಚಿತ್ರಗಳನ್ನು ಸ್ಪಷ್ಟವಾಗಿ ತೋರಿಸುವುದರಿಂದ ಶಸ್ತ್ರಚಿಕಿತ್ಸೆಯನ್ನ ನಿಖರವಾಗಿ ನಡೆಸಲು ಸಹಕಾರಿಯಾಗಲಿದೆ.
ಈ ಕುರಿತು ಮಾತಾನಾಡಿರುವ ನರ ಶಸ್ತ್ರಚಿಕಿತ್ಸಕ ಡಾ. ವೆಂಕಟರಮಣ, ಪ್ರಸ್ತುತ ಬೆನ್ನು ಮೂಳೆಯ ಶಸ್ತ್ರಚಿಕಿತ್ಸೆಗೆ ಬಳಸುತ್ತಿರುವ ಸಿ-ಆರ್ಮ್ ತಂತ್ರಜ್ಞಾನವು ಇಂಟ್ರಾಆಪರೇಟಿವ್ ಎಕ್ಸ್- ರೇ ಇಮೇಜಿಂಗ್ ತಂತ್ರಜ್ಞಾನವಾಗಿದ್ದು, ಡಿಜಿಟಲ್ ಇಮೇಜ್ ಕೇವಲ 60 ಸೆಕೆಂಡ್ನಲ್ಲಿ ಸಿಗಲಿದೆ. ಲೋ ರೆಡಿಯೇಷನ್ ಇರುವ ತಂತ್ರಜ್ಞಾನವನ್ನ ಜರ್ಮನ್ನಿಂದ ತರಿಸಿಕೊಳ್ಳಲಾಗಿದೆ. ಇಂಟ್ರಾಆಪರೇಟಿವ್ 3ಡಿ ತಂತ್ರಜ್ಞಾನಕ್ಕೆ ಸುಮಾರು1.8ಕೋಟಿ ರೂಪಾಯಿ ವೆಚ್ಚ ತಗುಲಿದ್ದು, ಭಾರತದಲ್ಲೇ ಮೊದಲ ಬಾರಿಗೆ ಈ ತಂತ್ರಜ್ಞಾನವನ್ನ ಬಳಸಲಾಗುತ್ತಿದೆ. ಈಗಾಗಲೇ 20ಕ್ಕೂ ಹೆಚ್ಚು ಸರ್ಜರಿಯನ್ನು ಮಾಡಲಾಗಿದೆ ಎಂದು ಮಾಹಿತಿ ನೀಡಿದರು.