ರಾಜ್ಯದಲ್ಲಿಂದು ದ್ವಿಶತಕ ಬಾರಿಸಿದ ಕೊರೊನಾ: ಮೂವರು ಸಾವು, 114 ಮಂದಿ ಡಿಸ್ಚಾರ್ಜ್​!

ರಾಜ್ಯದಲ್ಲಿ ಇಂದು ಕೂಡ ಕೊರೊನಾ ವೈರಸ್​ ದ್ವಿಶತಕ ಬಾರಿಸಿದ್ದು, 204 ಕೇಸ್​ ಪತ್ತೆಯಾಗಿವೆ. ಕಳೆದ ಕೆಲ ದಿನಗಳಿಂದ ಸೋಂಕು ಕಾಣಿಸಿಕೊಳ್ಳದ ಉಡುಪಿಯಲ್ಲಿಂದು 22 ಹೊಸ ಪ್ರಕರಣಗಳು ಕಾಣಿಸಿಕೊಂಡಿವೆ.

ಬೆಂಗಳೂರು: ರಾಜ್ಯದಲ್ಲಿ ಕೊರೊನಾ ಅಬ್ಬರ ಇಂದು ಜೋರಾಗಿದ್ದು, ಒಂದೇ ದಿನ ಸೋಂಕಿತರ ಸಂಖ್ಯೆ ದ್ವಿಶತಕ ದಾಟಿದೆ. ಯಾದಗಿರಿಯಲ್ಲಿ 66 ಜನರಲ್ಲಿ ಸೋಂಕು ಪತ್ತೆಯಾಗಿದೆ.

ಆರೋಗ್ಯ ಇಲಾಖೆ ಹೆಲ್ತ್​ ಬುಲೆಟಿನ್​ ಬಿಡುಗಡೆ ಮಾಡಿದ್ದು, ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ 6,245ಕ್ಕೆ ಏರಿಕೆಯಾಗಿದೆ. ಒಟ್ಟು 2976 ಜನರು ಗುಣಮುಖರಾಗಿದ್ದು, ಸದ್ಯ 3195 ಜನರು ಚಿಕಿತ್ಸೆ ಪಡೆದುಕೊಳ್ಳುತ್ತಿದ್ದಾರೆ. ಒಟ್ಟು 72 ಜನರು ಮಹಾಮಾರಿಗೆ ಬಲಿಯಾಗಿದ್ದಾರೆ.

ರಾಜ್ಯದಲ್ಲಿ ಇಂದು ಒಟ್ಟು 114 ಮಂದಿ ಸೋಂಕಿತರು ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್​ ಆಗಿದ್ದಾರೆ. ಯಾದಗಿರಿಯಲ್ಲಿ ಇಂದು 66 ಜನರಲ್ಲಿ ಸೋಂಕು ಕಾಣಿಸಿಕೊಂಡಿದೆ. ಉಳಿದಂತೆ ಉಡುಪಿ 22, ಬೆಂಗಳೂರು 17, ರಾಯಚೂರು 15, ಬೀದರ್​ 14, ಕೋಲಾರ​ 06, ಮೈಸೂರು 05, ಬಾಗಲಕೋಟೆ ಹಾಗೂ ಉತ್ತರ ಕನ್ನಡ ತಲಾ 3 ಜನರಿಗೆ ಸೋಂಕು ತಗುಲಿದೆ. ಇಂದು ಸೋಂಕು ತಗುಲಿರುವವರಲ್ಲಿ 157 ಜನರು ಹೊರ ರಾಜ್ಯದ ಸಂಪರ್ಕ ಹೊಂದಿದವರಾಗಿದ್ದಾರೆ.