ಬೆಂಗಳೂರು: ಕೊರೊನಾ ವೈರಸ್ ಹಬ್ಬುವುದನ್ನು ತಡೆಯಲು ವಿಧಿಸಲಾದ ಲಾಕ್ಡೌನ್ ಬಳಿಕ ರಾಜ್ಯದಲ್ಲಿ ಮರು ಮದ್ಯ ಮಾರಾಟಕ್ಕೆ ಅನುಮತಿ ನೀಡಿದ 25 ದಿನಗಳಲ್ಲಿ 2,000 ಕೋಟಿ ರೂ. ಬೊಕ್ಕಸಕ್ಕೆ ಹರಿದುಬಂದಿದೆ. ಆದಾಯದ ಮೂಲವಿಲ್ಲದೇ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದ ಸರ್ಕಾರಕ್ಕೆ ಸ್ವಲ್ಪ ಮಟ್ಟಿನ ಸಮಾಧಾನ ಸಿಕ್ಕಂತಾಗಿದೆ.
ರಾಜ್ಯದಲ್ಲಿ ಕೊರೊನಾ ಲಾಕ್ಡೌನ್ನಿಂದಾಗಿ ಮದ್ಯ ಮಾರಾಟ ನಿಷೇಧಿಸಲಾಗಿತ್ತು. ಎರಡು ಹಂತದ ಲಾಕ್ಡೌನ್ ಬಳಿಕ ಅಳೆದು ತೂಗಿ ಕಡೆಗೂ ಮೇ 4ರಿಂದ ಮದ್ಯ ಮಾರಾಟಕ್ಕೆ ರಾಜ್ಯ ಸರ್ಕಾರ ಹಸಿರು ನಿಶಾನೆ ತೋರಿತು. ಮೇ 4ರಿಂದ ಮೇ 27ರ ತನಕ ಒಟ್ಟು 1,924.36 ಕೋಟಿ ರೂ. ಅಬಕಾರಿ ತೆರಿಗೆ ರೂಪದಲ್ಲಿ ಸರ್ಕಾರದ ಬೊಕ್ಕಸಕ್ಕೆ ಹರಿದುಬಂದಿದೆ. ಮತ್ತೆರಡು ದಿನದ ಆದಾಯ ಸೇರಿ 2,000 ಕೋಟಿ ರೂ. ಗಡಿ ದಾಟಿದೆ.
ರಾಜ್ಯ ಸರ್ಕಾರ ಬಜೆಟ್ ಮಂಡಿಸಿದ್ದರೂ ಯಾವುದೇ ರೀತಿಯ ರಾಜಸ್ವ ಸಂಗ್ರಹ ಸರಿಯಾಗಿ ಆರಂಭಗೊಳ್ಳುವ ಮೊದಲೇ ಕೊರೊನಾ ಮಾಹಾಮಾರಿ ಕಾಲಿಟ್ಟು ಆರ್ಥಿಕ ಚಟುವಟಿಕೆ ಸ್ತಬ್ಧವಾಗುವಂತೆ ಮಾಡಿತು. ಸರ್ಕಾರಕ್ಕೆ ಆದಾಯವಿಲ್ಲದೇ ಇದ್ದರೂ ಕೊರೊನಾ ನಿಯಂತ್ರಣಕ್ಕಾಗಿ ಕೋಟಿ ಕೋಟಿ ಹಣ ವ್ಯಯಿಸುತ್ತಿದೆ. ವಿಪತ್ತು ನಿಧಿ, ಕೋವಿಡ್ ಪರಿಹಾರ ಇತ್ಯಾದಿಗಳನ್ನು ಬಳಸಿಕೊಂಡು ಪರಿಸ್ಥಿತಿ ನಿಭಾಯಿಸುತ್ತಿದೆ.
ಕೊರೊನಾ ತಪಾಸಣೆ, ಚಿಕಿತ್ಸೆ, ಕ್ವಾರಂಟೈನ್, ಊಟ ಎಲ್ಲಾ ಖರ್ಚನ್ನೂ ಸರ್ಕಾರವೇ ಭರಿಸುತ್ತಿದೆ. ಇದರ ಜೊತೆ ವಲಸೆ ಕಾರ್ಮಿಕರಿಗೆ ಸಾರಿಗೆ ಸೇವೆಯನ್ನೂ ಉಚಿತವಾಗಿ ಕಲ್ಪಿಸಿದೆ. ಸಂಕಷ್ಟದಲ್ಲಿ ಸಿಲುಕಿರುವ ವರ್ಗಗಳಿಗೆ ನೆರವಾಗಲು 1,610 ಕೋಟಿ ರೂ.,137 ಕೋಟಿ ರೂ. ಮತ್ತು 500 ಕೋಟಿ ರೂ.ಯಂತೆ ಮೂರು ವಿಶೇಷ ಪ್ಯಾಕೇಜ್ ಘೋಷಣೆ ಮಾಡಿದೆ. ಆದರೆ ಸರ್ಕಾರದ ಬೊಕ್ಕಸಕ್ಕೆ ಹರಿದುಬರುತ್ತಿರುವ ಹಣದ ಪ್ರಮಾಣ ತೀರಾ ಕಡಿಮೆಯಾಗಿತ್ತು. ಇದೀಗ ಅಬಕಾರಿ ತೆರಿಗೆ 2,000 ಕೋಟಿ ರೂ. ಹರಿದುಬಂದಿದ್ದು ಸರ್ಕಾರಕ್ಕೆ ಸ್ವಲ್ಪ ಮಟ್ಟಿನ ನೆಮ್ಮದಿ ತರುವಂತೆ ಮಾಡಿದೆ.
ಪ್ರತಿ ದಿನದ ಆದಾಯದ ವಿವರ (ರೂ):
- ಮೇ-04: 2.44 ಕೋಟಿ
- ಮೇ-05: 200.41 ಕೋಟಿ
- ಮೇ-06: 231.41 ಕೋಟಿ
- ಮೇ-07: 167.99 ಕೋಟಿ
- ಮೇ-08: 151.26 ಕೋಟಿ
- ಮೇ-09: 1.34 ಕೋಟಿ
- ಮೇ-10:
- ಮೇ-11: 165.84 ಕೋಟಿ
- ಮೇ-12: 87.57 ಕೋಟಿ
- ಮೇ-13: 80.44 ಕೋಟಿ
- ಮೇ-14: 70.37 ಕೋಟಿ
- ಮೇ-15: 62.14 ಕೋಟಿ
- ಮೇ-16: 81.86 ಕೋಟಿ
- ಮೇ-17:
- ಮೇ-18: 86.05 ಕೋಟಿ
- ಮೇ-19: 69.02 ಕೋಟಿ
- ಮೇ-20: 69.08 ಕೋಟಿ
- ಮೇ-21: 60.15 ಕೋಟಿ
- ಮೇ-22:113.18 ಕೋಟಿ
- ಮೇ-23:
- ಮೇ-24:
- ಮೇ-25:
- ಮೇ-26: 149.79 ಕೋಟಿ
- ಮೇ-27: 73.74 ಕೋಟಿ
