ಗೃಹ ಪ್ರವೇಶಕ್ಕೂ ಮುನ್ನ ಕಳ್ಳರ ಪ್ರವೇಶ:1.5 ಲಕ್ಷ ಮೌಲ್ಯದ ವೈರಿಂಗ್ ಕೇಬಲ್ ಕಳ್ಳತನ

ನಿರ್ಮಾಣ ಹಂತದಲ್ಲಿದ್ದ ಮನೆಯಲ್ಲಿ 1.5 ಲಕ್ಷ ರೂ ಮೌಲ್ಯದ ವೈರಿಂಗ್ ಕೇಬಲ್ ಕಳ್ಳತನ ಮಾಡಿರುವ ಘಟನೆ ತಾಲೂಕಿನ ತಿರುಮಗೊಂಡನಹಳ್ಳಿ ಹೊರವಲಯದಲ್ಲಿ ನಡೆದಿದೆ.

ದೊಡ್ಡಬಳ್ಳಾಪುರ: ನಿರ್ಮಾಣ ಹಂತದಲ್ಲಿದ್ದ ಮನೆಗೆ ರಾತ್ರಿ ನುಗ್ಗಿದ ಕಳ್ಳರು ಸ್ವಿಚ್ ಬೋರ್ಡ್​ನಿಂದ ವೈರಿಂಗ್ ಕೇಬಲ್ ಎಳೆದು 1.5 ಲಕ್ಷ ರೂ ಮೌಲ್ಯದ ವೈರಿಂಗ್ ಕೇಬಲ್ ಕಳ್ಳತನ ಮಾಡಿರುವ ಘಟನೆ ತಾಲೂಕಿನ ತಿರುಮಗೊಂಡನಹಳ್ಳಿ ಹೊರವಲಯದ ನಟರಾಜ್ ಎಂಬವರ ಮನೆಯಲ್ಲಿ ನಡೆದಿದೆ.

ವಡ್ಡರಹಳ್ಳಿಯ ನಿವಾಸಿಯಾದ ನಟರಾಜ್ ತಿರುಮಗೊಂಡನಹಳ್ಳಿಯಲ್ಲಿ ಮನೆ ಕಟ್ಟಿಸುತ್ತಿದ್ದರು. ಈ ಮನೆ ನಿರ್ಮಾಣ ಹಂತದಲ್ಲಿದ್ದು ಕಟ್ಟಡಕ್ಕೆ ವೈರಿಂಗ್ ಮಾಡಲಾಗುತ್ತಿತ್ತು. ಸಂಬಂಧಿಕರ ಮದುವೆಗಾಗಿ ಮನೆ ಮಾಲೀಕ ನಟರಾಜ್ ಕುಟುಂಬ ಸಮೇತರಾಗಿ ಹೋಗಿದ್ದರು. ಮದುವೆ ಕಾರ್ಯಕ್ರಮದಿಂದ ಹಿಂದಿರುಗಿ ನಿರ್ಮಾಣ ಹಂತದಲ್ಲಿರುವ ಮನೆ ಬಳಿ ಬಂದಾಗ ಕಳ್ಳತನ ಪ್ರಕರಣ ಬೆಳಕಿಗೆ ಬಂದಿದೆ.

ಈ ಕುರಿತು ದೊಡ್ಡಬಳ್ಳಾಪುರ ಗ್ರಾಮಾಂತರ ಪೊಲೀಸ್ ಠಾಣೆಗೆ ಮನೆ ಮಾಲೀಕ ದೂರು ನೀಡಿದ್ದು, ಪೊಲೀಸರು ತನಿಖೆ ನಡೆಸಿದ್ದಾರೆ.