ಕಲಿಕೆಯ ಜೊತೆ ಮಣ್ಣಿನ ನಂಟು ಬೆಳೆಸುತ್ತಿದೆ ಮೊರಾರ್ಜಿ ದೇಸಾಯಿ ವಸತಿ ಶಾಲೆ

ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಸಮಾಜ ಕಲ್ಯಾಣ ಇಲಾಖೆ ಉಪ ನಿರ್ದೇಶಕರಾದ ಹನುಮಂತರಾಯಪ್ಪ ಅವರ ಶ್ರಮದ ಫಲವಾಗಿ ವಸತಿ ಶಾಲೆಗಳು ಜೀವ ವೈವಿಧ್ಯಮಯ ತಾಣವಾಗಿ ಬದಲಾಗುತ್ತಿವೆ.

ದೇವನಹಳ್ಳಿ:ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ವಸತಿ ಶಾಲೆಗಳು ಹೊಸ ರೂಪ ಪಡೆಯುತ್ತಿವೆ. ಈ ಶಾಲೆಗಳು ಮಕ್ಕಳಿಗೆ ಕಲಿಕೆಯ ಜೊತೆಗೆ ಮಣ್ಣಿನ ನಂಟು ಬೆಳೆಸುವ ಜೀವ ವೈವಿಧ್ಯಮಯ ತಾಣವಾಗಿ ಬದಲಾಗುತ್ತಿದೆ. ಶಾಲೆಯ ವಿಶಾಲವಾದ ಜಾಗದಲ್ಲಿ ಮಕ್ಕಳ ಊಟಕ್ಕೆ ಬೇಕಾದ ತರಕಾರಿ, ಹಣ್ಣುಗಳನ್ನು ಮಕ್ಕಳೇ ಬೆಳೆಯುತ್ತಾರೆ. ಅಲ್ಲದೇ, ಮೀನು ಸಾಕಣಿಕೆ, ಜೇನು ಸಾಕಣಿಕೆಯ ಮೂಲಕ ಪೌಷ್ಠಿಕ ಆಹಾರವನ್ನು ಪಡೆಯುವ ವ್ಯವಸ್ಥೆಯನ್ನೂ ಮಾಡಿರುವುದು ವಿಶೇಷ.

ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ 10 ವಸತಿ ಶಾಲೆಗಳಿವೆ. ಇದರಲ್ಲಿ 7 ವಸತಿ ಶಾಲೆಗಳು ಸ್ವಂತ ಕಟ್ಟಡ ಮತ್ತು 10 ಎಕರೆಗೂ ಹೆಚ್ಚು ವಿಶಾಲ ಜಾಗ ಹೊಂದಿವೆ. ಇದರಲ್ಲಿ, ಕಟ್ಟಡ ಮತ್ತು ಆಟದ ಮೈದಾನದ ಜಾಗವನ್ನು ಹೊರತುಪಡಿಸಿ ಮತ್ತಷ್ಟು ಜಾಗ ವ್ಯರ್ಥವಾಗಿ ಉಳಿಯುತ್ತಿತ್ತು. ಈ ಜಾಗದಲ್ಲಿ ವಸತಿ ಶಾಲೆಯ ಮಕ್ಕಳ ಕೈಯಿಂದ ಕೃಷಿ ಮಾಡಿಸುವ ಮೂಲಕ ಮಕ್ಕಳಿಗೆ ಬೇಕಾದ ಪೌಷ್ಠಿಕ ಆಹಾರವನ್ನು ಬೆಳೆಯುವ ಯೋಜನೆಯನ್ನು ಸಾಕಾರಗೊಳಿಸಿದವರು ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಸಮಾಜ ಕಲ್ಯಾಣ ಇಲಾಖೆ ಉಪ ನಿರ್ದೇಶಕರಾದ ಹನುಮಂತರಾಯಪ್ಪ.

ಸಮಾಜ ಕಲ್ಯಾಣ ಇಲಾಖೆ ಉಪ ನಿರ್ದೇಶಕ ಹನುಮಂತರಾಯಪ್ಪ

ಪ್ರಾಯೋಗಿಕವಾಗಿ ದೇವನಹಳ್ಳಿ ತಾಲೂಕಿನ ಕುಂದಾಣದ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ತಮ್ಮ ಕನಸಿನ ಯೋಜನೆಯನ್ನು ಕಾರ್ಯರೂಪಕ್ಕೆ ತಂದಿರುವ ಅವರು, 16 ಎಕರೆ ವಿಸ್ತೀರ್ಣದ ಜಾಗದಲ್ಲಿ ಮಾವು, ಸೀಬೆ, ಸ್ಟಾರ್ ಫ್ರೂಟ್, ಹಲಸು ಸೇರಿದಂತೆ 13 ಜಾತಿಯ 1250 ಹಣ್ಣಿನ ಗಿಡಗಳನ್ನು ನೆಡಿಸಿದ್ದಾರೆ. ವಿಶೇಷವಾಗಿ ಕಸಿ ಮಾಡಲಾದ ಗಿಡಗಳನ್ನು ಇಲ್ಲಿ ನೆಡಲಾಗಿದ್ದು,ಮಕ್ಕಳಿಗೆ ಗಿಡಗಳನ್ನು ದತ್ತು ನೀಡುವ ಯೋಜನೆಯೂ ಇದೆ.

ಹೀಗೆ ನೆಡಲಾದ ಗಿಡಗಳ ಪೋಷಣೆಯನ್ನು ಮಕ್ಕಳೇ ಮಾಡ್ಬೇಕು, ಅವುಗಳಿಂದ ಬರುವ ಫಲವನ್ನು ಮಕ್ಕಳೇ ತಿನ್ನಬೇಕು, ಈ ಮೂಲಕ ಮಕ್ಕಳಿಗೆ ಮಣ್ಣಿನ ಸಂಪರ್ಕ ಕಲಿಸಲಾಗುತ್ತದೆ. ಹಣ್ಣಿನ ಗಿಡಗಳಿಗೆ ಬೋರ್ ವೇಲ್ ನಿಂದ ನೀರು ಒದಗಿಸುವುದು ದುಬಾರಿಯಾಗುವ ಕಾರಣಕ್ಕೆ ವಸತಿ ಶಾಲೆಯ ಆವರಣದಲ್ಲಿ ಬೀಳುವ ಮಳೆ ನೀರು ಸಂಗ್ರಹಕ್ಕಾಗಿ ಕೃಷಿ ಹೊಂಡ ನಿರ್ಮಾಣ ಮಾಡಲಾಗಿದೆ.

ಮೀನುಗಾರಿಕೆಯ ಸಹಯೋಗದಲ್ಲಿ ಕೃಷಿ ಹೊಂಡದಲ್ಲಿ ಮೀನು ಸಾಕಣಿಕೆ ಮಾಡಲಾಗುತ್ತಿದ್ದು, ದೊಡ್ಡದಾದ ಮೀನುಗಳನ್ನು ವಾರಕ್ಕೊಮ್ಮೆ ವಸತಿ ಶಾಲೆಯ ಮಕ್ಕಳಿಗೆ ಮೀನೂಟವಾಗಿ ಕೊಡಲಾಗುತ್ತಿದೆ.

ವಿವಿದೋದ್ದೇಶ ಯೋಜನೆ ಮೂಲಕ ಜೇನು ಸಾಕಣಿಕೆ, ಮೀನು ಸಾಕಣಿಕೆ ಸಹ ಮಾಡಲಾಗುತ್ತದೆ. ಜೇನು ಸಾಕಣಿಕೆಯಿಂದ ದೊರೆಯುವ ಜೇನಿನ ಜೊತೆ ನಿಂಬೆಹಣ್ಣನ್ನು ಬಿಸಿ ನೀರಿಗೆ ಹಾಕಿ ಕೊಡುವ ಮೂಲಕ ಮಕ್ಕಳಲ್ಲಿ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಲಾಗುತ್ತದೆ.

ಇದರ ಜೊತೆಗೆ ದೇಶಿ ತಳಿಯ ಹಸುಗಳನ್ನು ಸಾಕುವ ಮೂಲಕ ಜೀವಾಮೃತ ತಯಾರಿಸಿ ಗಿಡಗಳಿಗೆ ಹಾಕಲಾಗುತ್ತದೆ. ವಸತಿ ಶಾಲೆ ಅಂದರೆ ಕೇವಲ ನಾಲ್ಕು ಗೋಡೆಗಳ ಮಧ್ಯೆ ವಿದ್ಯೆ ಕಲಿಸುವುದಲ್ಲ, ಇದು ಜೀವ ವೈವಿಧ್ಯಮಯ ತಾಣವಾಗಬೇಕು ಎನ್ನುವುದು ಹನುಮಂತರಾಯಪ್ಪನವರ ಕನಸಾಗಿರುವುದರಿಂದ ಮುಂದೆ ಸೈನ್ಸ್ ಪಾರ್ಕ್ ನಿರ್ಮಿಸುವ ಚಿಂತನೆಯಲ್ಲಿದ್ದಾರೆ.