ಶೃತಿ ಮಾಜಿ ಕಾರು ಚಾಲಕ ಅನುಮಾನಾಸ್ಪದ ಸಾವು

ಸ್ಯಾಂಡಲ್​ವುಡ್​ ನಟಿ ಶೃತಿ ಅವರ ಮಾಜಿ ಕಾರು ಚಾಲಕ ಅನುಮಾನಾಸ್ಪದ ರೀತಿಯಲ್ಲಿ ಸಾವಿಗೀಡಾಗಿದ್ದು, ಸಂಶಯಗಳಿಗೆ ಎಡೆಮಾಡಿಕೊಟ್ಟಿದೆ.

ನೆಲಮಂಗಲ: ಸ್ಯಾಂಡಲ್​ವುಡ್​ ನಟಿ ಶೃತಿ ಅವರ ಮಾಜಿ ಕಾರು ಚಾಲಕ ಅನುಮಾನಾಸ್ಪದ ರೀತಿಯಲ್ಲಿ ಸಾವಿಗೀಡಾಗಿದ್ದು, ಹಲವು ಸಂಶಯಗಳಿಗೆ ಎಡೆಮಾಡಿಕೊಟ್ಟಿದೆ.

25 ವರ್ಷದ ಮಂಜುನಾಥ್ ಸಿಂಗ್ ನೇಣಿಗೆ ಶರಣಾದಾತ. ಬೆಂಗಳೂರು ಹೊರವಲಯ ಮಾಗಡಿ ರಸ್ತೆಯ ಮಾಚೋಹಳ್ಳಿ ಅರಣ್ಯ ಪ್ರದೇಶದಲ್ಲಿ ಈತ ನೇಣಿಗೆ ಶರಣಾಗಿದ್ದಾನೆ. ಈತ ಆರು ತಿಂಗಳ ಹಿಂದೆಯಷ್ಟೇ ಶೃತಿ ಅವರ ಕಾರು ಚಾಲನೆ ಕೆಲಸ ಬಿಟ್ಟಿದ್ದನಂತೆ. ಮಂಗಳವಾರ ಮನೆಯಿಂದ ಹೊರಹೋದಾತ ಬುಧವಾರ ಹೆಣವಾಗಿ ಪತ್ತೆಯಾಗಿದ್ದು, ಇದು ಆತ್ಮಹತ್ಯೆಯಲ್ಲ ಕೊಲೆ ಎಂದು ಸಂಬಂಧಿಕರು ಆರೋಪ ಮಾಡುತ್ತಿದ್ದಾರೆ.

ಮಂಗಳವಾರ ರಾತ್ರಿ ಮಂಜುನಾಥ್​ ಸ್ನೇಹಿತರೊಂದಿಗೆ ಕಡಬಗೆರೆಗೆ ಪಾರ್ಟಿಗೆ ಹೋಗಿದ್ದ ಎನ್ನಲಾಗ್ತಿದೆ. ಪಾರ್ಟಿಯಲ್ಲಿ ಸ್ನೇಹಿತರ ನಡುವೆ ನಡೆದಿರುವ ವಿಷಯ ನಿಗೂಢವಾಗಿದೆ. ಅಲ್ಲದೆ ಟವಲ್ ನಲ್ಲಿ ಮರಕ್ಕೆ ನೇಣು ಹಾಕಿಕೊಂಡ ಸ್ಥಿತಿಯಲ್ಲಿ ಮಂಜುನಾಥ್ ಪತ್ತೆಯಾಗಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.

ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾದನಾಯಕನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಸಾವಿನ ಅಸಲಿ ಸತ್ಯವನ್ನ ಪೊಲೀಸರು ಬಯಲು ಮಾಡಬೇಕಿದೆ.