ಪಂಚರತ್ನ ಯಾತ್ರೆಯಲ್ಲಿ ಜನರ ಸುನಾಮಿ ಅಲೆ ಎದ್ದಿದೆ; ವಿರೋಧಿಗಳಿಗಿದು ನುಂಗಲಾರದ ತುತ್ತು: ಹೆಚ್‌ಡಿಕೆ

ಮಂಡ್ಯದಲ್ಲಿ ಆತ್ಮಹತ್ಯೆ ಹೆಚ್ಚಾಗಿದ್ದು ಕಾಂಗ್ರೆಸ್​ ಸರ್ಕಾರದ ಆಡಳಿತದಲ್ಲಿ. ನಾನು ಜಿಲ್ಲೆಯ ಅಭಿವೃದ್ಧಿಗೆ 9 ಸಾವಿರ ಕೋಟಿ ರೂ ಕೊಟ್ಟಿದ್ದೆ. ಆದರೆ ಆ ಹಣವನ್ನು ಬಿಜೆಪಿ ಬೇರೆ ಕಡೆ ವರ್ಗಾವಣೆ ಮಾಡಿತ್ತು. ಆಗ ಇಲ್ಲದ ಅಭಿಮಾನ ಈಗ ಮಂಡ್ಯದ ಮೇಲೆ ಅಶ್ವಥ್ ನಾರಾಯಣ್​ಗೆ ಯಾಕೆ ಎಂದು ಹೆಚ್‌ಡಿಕೆ ಟಾಂಗ್​ ನೀಡಿದ್ದಾರೆ.

ದೇವನಹಳ್ಳಿ:ರಕ್ತ ಹೀರುವವರನ್ನು ನಿಮ್ಮ ನಾಯಕರಾಗಿ ಮಾಡುತ್ತೀರಾ ಎಂಬ ಸಚಿವ ಅಶ್ವಥ್ ನಾರಾಯಣ್ ಹೇಳಿಕೆಗೆ ಹೆಚ್ ಡಿ ಕುಮಾರಸ್ವಾಮಿ ತಿರುಗೇಟು‌ ನೀಡಿದ್ದಾರೆ. ದೇವನಹಳ್ಳಿಯಲ್ಲಿ ಪಂಚರತ್ನ ರಥಯಾತ್ರೆ ಕೈಗೊಂಡ ಹೆಚ್​ ಡಿ ಕೆ, ಮಾಧ್ಯಮದೊಂದಿಗೆ ಮಾತನಾಡಿ, ಬಿಜೆಪಿ ಮತ್ತು ಕಾಂಗ್ರೆಸ್​ ಪಕ್ಷದ ವಿರುದ್ಧ ಟೀಕಾಪ್ರಹಾರ ನಡೆಸಿದರು.

ಮಂಡ್ಯದಲ್ಲಿ ಆತ್ಮಹತ್ಯೆ ಹೆಚ್ಚಾಗಿದ್ದು ಕಾಂಗ್ರೆಸ್​ ಸರ್ಕಾರದ ಆಡಳಿತದಲ್ಲಿ. ನಾನು ಜಿಲ್ಲೆಯ ಅಭಿವೃದ್ಧಿಗೆ 9 ಸಾವಿರ ಕೋಟಿ ರೂ ಕೊಟ್ಟಿದ್ದೆ. ಆದರೆ ಆ ಹಣವನ್ನು ಬಿಜೆಪಿ ಬೇರೆ ಕಡೆ ವರ್ಗಾವಣೆ ಮಾಡಿತ್ತು. ಆಗ ಇಲ್ಲದ ಅಭಿಮಾನ ಈಗ ಮಂಡ್ಯದ ಮೇಲೆ ಅಶ್ವಥ್ ನಾರಾಯಣ್​ಗೆ ಯಾಕೆ ಎಂದು ಟಾಂಗ್​ ನೀಡಿದ್ದಾರೆ. ಜೊತೆಗೆ ದೇಶದಲ್ಲಿ ನರ ಬಲಿ ಪಡೆದದ್ದು, ಅಧಿಕಾರಕ್ಕಾಗಿ ರಕ್ತದೋಕುಳಿ ಹರಿಸಿದ್ದು ಯಾರು ಎಂದು ಪ್ರಶ್ನಿಸಿ, ಹುಬ್ಬಳ್ಳಿ ಈದ್ಗಾ ಮೈದಾನ ವಿಚಾರದಲ್ಲಿ ಜೀವಗಳನ್ನು ಬಲಿ ಪಡೆದದ್ದು ಬಿಜೆಪಿ ಅಲ್ಲವೇ ಎಂದು ಸರ್ಕಾರದ ಕಾಲೆಳೆದಿದ್ದಾರೆ.

ಮುಂದುವರೆದು, ಮೈಶುಗರ್ ಅಭಿವೃದ್ದಿಗೆ ನಾನು ನೂರು ಕೋಟಿ ರೂ ಹಣವನ್ನು ಬಜೆಟ್‌ನಲ್ಲಿ ಕೊಟ್ಟಿದ್ದೇನೆ. ಇದೇ ಕಾರ್ಖಾನೆಗೆ ಯಡಿಯೂರಪ್ಪ ಕಾಲದಲ್ಲಿ ನಾಗರಾಜಪ್ಪ ಎಂಬುವವರನ್ನು ನೇಮಕ ಮಾಡಿದ್ದರು, ಆ ಹಣ ಯಾರ ಮನೆ ಸೇರಿದೆ? ಯಾಕೆ ಹಾಳು ಮಾಡಿದಿರಿ ಎಂದು ಪ್ರಶ್ನೆ ಮಾಡಿದರು. ಹಾಗೆ ತಮ್ಮ ಪಂಚರತ್ನ ರಥ ಯಾತ್ರೆ ಕುರಿತು ಮಾತನಾಡಿದ ಹೆಚ್​ ಡಿ ಕೆ, ನನ್ನ ಪಂಚರತ್ನ ಯಾತ್ರೆಯಲ್ಲಿ ಜನರ ಸುನಾಮಿ ಅಲೆ ಎದ್ದಿದೆ. ಇದು ವಿರೋಧಿಗಳಿಗೆ ನುಂಗಲಾರದ ತುತ್ತಾಗಿದೆ. ಅಲ್ಲದೆ ನನ್ನ ಬಗ್ಗೆ ಮಾತನಾಡುವ ನೈತಿಕತೆಯನ್ನು ಯಾರೂ ಉಳಿಸಿಕೊಂಡಿಲ್ಲ. ಇನ್ನು ಮುಂದೆ ನಾನೇ ಎಲ್ಲರ ಟಾರ್ಗೆಟ್ ಅಂತ ಗೊತ್ತಿದೆ ಎಂದರು.

ಇದನ್ನೂ ಓದಿ:'ಸೈಲೆಂಟ್ ಸುನೀಲ್ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದು, ಫೈಟರ್ ರವಿ ಬಿಜೆಪಿ ಸೇರಿದ್ದು ತಪ್ಪಲ್ಲ'