9ರ ಬಾಲಕನಿಗೆ 4 ಎಕರೆ ಗೋಮಾಳ ಮಂಜೂರು.. ಸರ್ಕಾರಿ ಜಾಗವನ್ನೇ ಗುಳುಂ ಮಾಡಿದ್ಹೇಗೆ?

9 ವರ್ಷದ ಬಾಲಕನಿಗೆ 4 ಎಕರೆ ಜಮೀನು ಮಂಜೂರು ಮಾಡಿಸಿದ್ದಾರೆ ಖತರ್ನಾಕ್​ ಖದೀಮರು. ಅಂದಹಾಗೆ ದೇವನಹಳ್ಳಿ ತಾಲೂಕಿನ ಇಲ್​ತೊರೆ ಗ್ರಾಮದಲ್ಲಿ ಮುನಿಯಪ್ಪ ಎಂಬುವರಿಗೆ 1965ರಲ್ಲಿ ಸರ್ವೇ ನಂ. 159ರಲ್ಲಿ 4 ಎಕರೆ ಗೋಮಾಳ ಜಮೀನು ಮಂಜೂರಾಗಿದ್ದು, ಬಳಿಕ ಈ ಜಮೀನನ್ನು 2007 ರಲ್ಲಿ ಅದೇ ಗ್ರಾಮದ ಅಂಬುಜಾ ಎಂಬುವರಿಗೆ ಮಾರಾಟ ಮಾಡಿದ್ದಾರೆ.

ಬೆಂಗಳೂರು:ದೇವನಹಳ್ಳಿ ಎಂದರೆ ಎಲ್ಲರ ಬಾಯಲ್ಲೂ ಇಲ್ಲಿನ ರಿಯಲ್​ ಎಸ್ಟೇಟ್​ ವ್ಯವಹಾರ ಬಗ್ಗೆ ಮಾತು ಕೇಳಿ ಬರುತ್ತೆ. ಇಲ್ಲಿನ ಭೂಮಿ ಚಿನ್ನದ ಬೆಲೆ ಬಾಳುತ್ತಿದೆ. ಸ್ವಲ್ಪ ಯಾಮಾರಿದ್ರೂ ಸಾಕು ಭೂಗಳ್ಳರು ಅಧಿಕಾರಿಗಳೊಂದಿಗೆ ಶಾಮೀಲಾಗಿ ರಾತ್ರೋರಾತ್ರಿ ಇನ್ನಾರದ್ದೋ ಜಮೀನನ್ನು ಮತ್ತ್ಯಾರಿಗೋ ಮಾರಾಟ ಮಾಡಿಬಿಡ್ತಾರೆ. ಈಗ ನಾವು ಹೇಳ ಹೊರಟಿರೋ ಕಥೆಯೂ ಇಂತಹದ್ದೇ ಒಂದು ಗೋಲ್​ಮಾಲ್​.

9 ವರ್ಷದ ಬಾಲಕನಿಗೆ 4 ಎಕರೆ ಜಮೀನು ಮಂಜೂರು ಮಾಡಿಸಿದ್ದಾರೆ ಖತರ್ನಾಕ್​ ಖದೀಮರು. ಅಂದಹಾಗೆ ದೇವನಹಳ್ಳಿ ತಾಲೂಕಿನ ಇಲ್​ತೊರೆ ಗ್ರಾಮದಲ್ಲಿ ಮುನಿಯಪ್ಪ ಎಂಬುವವರಿಗೆ 1965 ರಲ್ಲಿ ಸರ್ವೇ ನಂಬರ್​ 159ರಲ್ಲಿ 4 ಎಕರೆ ಗೋಮಾಳ ಜಮೀನು ಮಂಜೂರಾಗಿದ್ದು, ಬಳಿಕ ಈ ಜಮೀನನ್ನು 2007ರಲ್ಲಿ ಅದೇ ಗ್ರಾಮದ ಅಂಬುಜಾ ಎಂಬುವರಿಗೆ ಮಾರಾಟ ಮಾಡಿದ್ದಾರೆ.

ಅಂಬುಜಾ ಈ ಜಮೀನನ್ನು ನೀರಜ್​ ಮೌರ್ಯ ಎಂಬುವರಿಗೆ 2010ರಲ್ಲಿ ಮಾರಾಟ ಮಾಡಿರುವಂತೆ ಸೇಲ್​ ಡೀಡ್​ ಸಹ ಮಾಡಿಸಿದ್ದಾರೆ. ಆದರೆ, ಬೆಂಗಳೂರು ಮೂಲದ ನೀರಜ್​ ಮೌರ್ಯ ಎಂಬಾತ ಈ ಜಮೀನಿನಲ್ಲಿ ಲೇಔಟ್​ ಮಾಡಿಸಲು ಭೂ ಪರಿವರ್ತನೆ ಮಾಡಿಸಲು ಮುಂದಾಗಿದ್ದು, ಈ ವೇಳೆ ದಾಖಲೆಗಳ ಪರಿಶೀಲನೆ ಮಾಡುವ ವೇಳೆ ಸರ್ವೇ ನಂಬರ್ 159 ರಲ್ಲಿರುವ 4 ಎಕರೆ ಜಮೀನಿನ ಕುರಿತ ಮಾಹಿತಿ ಪರಿಶೀಲನೆ ಮಾಡುವಾಗ ಭೂಗಳ್ಳರ ಅಸಲಿ ಮುಖ ಬಯಲಾಗಿದೆ.

ಭೂಗಳ್ಳರು ಮುನಿಯಪ್ಪ ಎಂಬುವರಿಗೆ 9 ವರ್ಷ ವಯಸ್ಸಿದ್ದಾಗ ಜಮೀನು ಮಂಜೂರು ಮಾಡಿರುವಂತೆ ನಕಲಿ ದಾಖಲೆ ಸೃಷ್ಟಿ ಮಾಡಿದ್ದಾರೆ. ಪ್ರಕರಣ ಬಯಲಿಗೆ ಬರುತ್ತಿದ್ದಂತೆ ಉಪ ವಿಭಾಗಾಧಿಕಾರಿಗಳ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಾಗುತ್ತದೆ. ಈ ಸಂಬಂಧ ಉಪ ವಿಭಾಗಾಧಿಕಾರಿಗಳು ಪರಿಶೀಲನೆ ಮಾಡಿ ನಕಲು ಮಾಡಿರುವುದನ್ನು ದೃಢಪಡಿಸಿದ್ದು, ಜೊತೆಗೆ 4 ಎಕರೆ ಜಮೀನನ್ನು ಸರಕಾರಕ್ಕೆ ಹಿಂಪಡೆದು ತಪ್ಪಿತಸ್ಥರ ವಿರುದ್ದ ಕ್ರಮಕೈಗೊಳ್ಳುವಂತೆ ಶಿಫಾರಸು ಮಾಡಿದ್ದಾರೆ.

ಇತ್ತ ಅಧಿಕಾರಿಗಳು ಮಾತ್ರ ಭೂಗಳ್ಳರ ಜೊತೆ ಶಾಮೀಲಾಗಿ ಸರಕಾರಿ ಜಮೀನನ್ನು ವಶಕ್ಕೆ ಪಡೆಯಲು ಹಿಂದೇಟು ಹಾಕುತ್ತಿದ್ದಾರೆ ಎಂಬ ಮಾತು ಸಹ ಕೇಳಿ ಬರುತ್ತಿದೆ. ಬೆಂಗಳೂರು ಗ್ರಾಮಾಂತರ ಜಿಲ್ಲಾಧಿಕಾರಿ ಕರೀಗೌಡ ಸಹ ಇದರ ಬಗ್ಗೆ ತುಟಿಕ್ ಪಿಟಿಕ್​ ಎನ್ನದೆ ಸುಮ್ಮನೆ ಕುಳಿತಿದ್ದಾರೆ ಎಂಬ ಆರೋಪವೂ ಇದೆ.

ಸರಕಾರಿ ಜಮೀನನ್ನು ಯಾರಿಗೂ ತಿಳಿಯದೇ ಗುಳುಂ ಮಾಡಲು ಹೊರಟಿದ್ದ ಭೂಗಳ್ಳರ ಪ್ಲಾನ್​ ಇಲ್ಲಿ ಪ್ಲಾಫ್‌ ಆಗಿದೆ. ಆದರೆ, ಉಪ ವಿಭಾಗಾಧಿಕಾರಿಗಳ ಆದೇಶದಂತೆ ತಾಲೂಕು ಆಡಳಿತ ಸರಕಾರಿ ಗೋಮಾಳ ಜಮೀನನ್ನು ಸರಕಾರದ ವಶಕ್ಕೆ ಪಡೆಯಬೇಕಿದೆ. ಜೊತೆಗೆ ಜಿಲ್ಲಾಧಿಕಾರಿ ಸಹ ಇಂತಹ ಗೋಲ್‌ಮಾಲ್​ನಲ್ಲಿ ಭಾಗಿಯಾಗಿರುವ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂಬ ಕೂಗು ಕೇಳಿ ಬರುತ್ತಿದೆ.