ಪುರಸಭೆ ಸದಸ್ಯೆಗೆ ಗರ್ಭಪಾತ: ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡುವಂತೆ ಸಿದ್ದು ಸವದಿಗೆ ಉಮಾ ಶ್ರೀ ಆಗ್ರಹ

ಮಹಾಲಿಂಗಪೂರ ಪುರಸಭೆಯಲ್ಲಿ ನಡೆದ ಘಟನೆಯಿಂದಾಗಿ ಪುರಸಭೆ ಸದಸ್ಯೆ ಚಾಂದಿನಿ ಅವರಿಗೆ ಗರ್ಭ ಪಾತವಾಗಿದೆ. ಹಕ್ಕುಗಳ ರಕ್ಷಣೆ ಮಾಡುವ ಶಾಸಕ, ಹಿರಿಯ ಧುರೀಣ ಎಂದು ಕರೆಸಿಕೊಳ್ಳುವ ಸಿದ್ದು ಸವದಿ ಈ ರೀತಿ ಮಾಡಿದರೇ ಹೇಗೆ? ಸವದಿ ಈ ಘಟನೆಯ ಹೊಣೆ ಹೊತ್ತು ತಮ್ಮ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಮಾಜಿ ಸಚಿವೆ ಉಮಾ ಶ್ರೀ ಒತ್ತಾಯಿಸಿದರು.

ಬಾಗಲಕೋಟೆ: ನವೆಂಬರ್​ 9ರಂದು ನಡೆದ ಮಹಾಲಿಂಗಪೂರ ಪುರಸಭೆಯ ಅಧ್ಯಕ್ಷ, ಉಪಾಧ್ಯಕ್ಷ ಚುನಾವಣೆ ವೇಳೆ ಮಹಿಳಾ ಸದಸ್ಯೆ ಮೇಲೆ ಅಸಭ್ಯವಾಗಿ ವರ್ತಿಸಿದ್ದ ಬಿಜೆಪಿ ಶಾಸಕ ಸಿದ್ದು ಸವದಿ ತಮ್ಮ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಮಾಜಿ ಸಚಿವೆ ಉಮಾ ಶ್ರೀ ಆಗ್ರಹಿಸಿದ್ದಾರೆ.

ಕಾಂಗ್ರೆಸ್ ಕಚೇರಿಯಲ್ಲಿ ಗುರುವಾರ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ನವೆಂಬರ್ 9ರಂದು ತೇರದಾಳ ಕ್ಷೇತ್ರದ ಬನಹಟ್ಟಿ, ಮಹಾಲಿಂಗಪೂರ ಎರಡು ಪುರಸಭೆಯಲ್ಲಿ ಚುನಾವಣೆ ನಡೆದಿದ್ದವು. ಈ ಚುನಾವಣೆಯಲ್ಲಿ ಭಾಗಿಯಾಗಲು ಎಲ್ಲ ಪಕ್ಷದ ಕಾರ್ಯಕರ್ತರು ಹೊರಟಿದ್ದರು. ಈ ನಡುವೆ ಮತಹಾಕಲು ಹೊರಟಿದ್ದ ಸದಸ್ಯರಾದ ಚಾಂದಿನಿ ನಾಯಕ್, ಗೋದಾವರಿ ಬಾಟ್, ಸುಜಾತಾ ಮಾಂಗ, ಹುರಕಡ್ಲಿ ಅವರನ್ನು ತಡೆಯಲು ಸಿದ್ದು ಸವದಿ ಮತ್ತು ಬೆಂಬಲಿಗರು ಯತ್ನಿಸಿದ್ದಾರೆ ಎಂದು ಹೇಳಿದರು.

ಓದಿ:ಮಹಿಳೆ ಮೇಲೆ ನಡೆದ ದೌರ್ಜನ್ಯಕ್ಕೆ ಮಾಜಿ ಸಚಿವೆ ಉಮಾಶ್ರೀ ನೇರ ಕಾರಣ: ಸಿದ್ದು ಸವದಿ ಆರೋಪ

ಅಧ್ಯಕ್ಷ, ಉಪಾಧ್ಯಕ್ಷ ಚುನಾವಣೆಯಲ್ಲಿ ನಮಗೆ ವ್ಯತಿರಿಕ್ತವಾಗಿ ಮತ ಹಾಕಬಹುದು ಎಂಬ ಭಯದಿಂದ ಎಳೆದಾಡಿ ದೈಹಿಕ ಹಿಂಸೆ ನೀಡಿದ್ದಾರೆ. ಸಾರ್ವಜನಿಕ ಹಕ್ಕುಗಳನ್ನು ರಕ್ಷಣೆ ಮಾಡುವ ಶಾಸಕ ಸಿದ್ದು ಸವದಿ ಕೃತ್ಯ ಖಂಡನೀಯ. ಆ ಪುರಸಭೆ ಸದಸ್ಯರು ತಮಗೆ ಯಾರಿಗೆ ಬೇಕು ಅವರಿಗೆ ಮತ ಹಾಕುತ್ತಿದ್ದರು. ಅದು ಅವರ ಹಕ್ಕು. ಈ ಘಟನೆ ನಡೆದಿರುವುದು ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಅಮಾನವೀಯವಾಗಿದೆ. ವಿಪರ್ಯಾಸವೆಂದರೆ ಚುನಾವಣೆ ನಡೆಯುವ ಸಂದರ್ಭದಲ್ಲಿ ಅಷ್ಟು ಜನ ಜಮಾಯಿಸಿದ್ದು ಹೇಗೆ ಎಂದು ಉಮಾ ಶ್ರೀ ಪ್ರಶ್ನಿಸಿದರು.

ಓದಿ:ಮಹಾಲಿಂಗಪುರ ಪುರಸಭೆ ಚುನಾವಣೆ ವೇಳೆ ಗಲಾಟೆ: ಸದಸ್ಯೆಯನ್ನು ತಳ್ಳಿದ ಶಾಸಕ ಸವದಿ!

ನವೆಂಬರ್ 25ರಂದು ಪುರಸಭೆ ಸದಸ್ಯೆ ಚಾಂದಿನಿ ಅವರಿಗೆ ಗರ್ಭ ಪಾತವಾಗಿದೆ. ಹಕ್ಕುಗಳ ರಕ್ಷಣೆ ಮಾಡುವ ಶಾಸಕ, ಹಿರಿಯ ಧುರೀಣ ಎಂದು ಕರೆಸಿಕೊಳ್ಳುವ ಸಿದ್ದು ಸವದಿ ಈ ರೀತಿ ಮಾಡಿದರೇ ಹೇಗೆ? ಸವದಿ ಅವರು ಈ ಘಟನೆಯ ಹೊಣೆ ಹೊತ್ತು ತಮ್ಮ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಒತ್ತಾಯಿಸಿದರು.

ಶಾಸಕ ಸಿದ್ದು ಸವದಿ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಜವಾಬ್ದಾರಿಯುತ ಸ್ಥಾನವನ್ನು ಮರೆತು ಒಬ್ಬ ಮಹಿಳೆಯ ಮೇಲೆ ದೌರ್ಜನ್ಯ ಎಸಗಿರುವುದು ಖಂಡನೀಯ. ಬಿಜೆಪಿಗರು 'ಬೇಟಿ ಪಡಾವೋ ಬೇಟಿ ಬಚಾವೋ' ಎನ್ನುವವರು, ಮಹಿಳೆಯರ ಮೇಲೆ ಅಧಿಕಾರದ ದುರಾಸೆಯಿಂದ ಅಮಾನವೀಯವಾಗಿ ನಡೆದುಕೊಂಡಿರುವ ಘಟನೆ ಮಹಿಳೆಯರು ರಾಜಕೀಯಕ್ಕೆ ಬರಲು ಹಿಂದೇಟು ಹಾಕುವಂತೆ ಮಾಡಿದೆ ಎಂದರು.