ಗ್ರಾಪಂ ಅಧ್ಯಕ್ಷ, ಉಪಾಧ್ಯಕ್ಷ ಮೀಸಲಾತಿ: ಜಾತಿ ಪ್ರಮಾಣ ಪತ್ರ ವಿಚಾರಕ್ಕೆ ತಹಶೀಲ್ದಾರ್​ ಜೊತೆ ವಾಗ್ವಾದ

ಗ್ರಾಮ ಪಂಚಾಯತ್ ಅಧ್ಯಕ್ಷ, ಉಪಾಧ್ಯಕ್ಷ ಮೀಸಲಾತಿ ಸಂಬಂಧ ಜಾತಿ ಪ್ರಮಾಣ ಪತ್ರ ನೀಡುವ ವಿಚಾರದಲ್ಲಿ ಬಾಗಲಕೋಟೆಯಲ್ಲಿ ಕಾಂಗ್ರೆಸ್ ಪಕ್ಷದ ಮುಖಂಡರು ಮತ್ತು ತಹಶೀಲ್ದಾರ್​ ನಡುವೆ ವಾಗ್ವಾದ ನಡೆದಿದೆ.

ಬಾಗಲಕೋಟೆ: ಗ್ರಾಮ ಪಂಚಾಯತ್ ಅಧ್ಯಕ್ಷ, ಉಪಾಧ್ಯಕ್ಷ ಮೀಸಲಾತಿಗೆ ಸಂಬಂಧಪಟ್ಟಂತೆ ಜಾತಿ ಪ್ರಮಾಣ ಪತ್ರ ನೀಡುತ್ತಿಲ್ಲ ಎಂದು ಕಾಂಗ್ರೆಸ್ ಪಕ್ಷದ ಮುಖಂಡರು, ತಹಶೀಲ್ದಾರ್​ ಕಚೇರಿಗೆ ಮುತ್ತಿನ ಹಾಕಿ, ತಹಶೀಲ್ದಾರ್​​ ಜೊತೆಗೆ ವಾಗ್ದಾಳಿ ನಡೆಸಿದ ಘಟನೆ ಜರುಗಿತು.

ರಾಮಪುರ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಸ್ಥಾನಕ್ಕೆ ಕಾಂಗ್ರೆಸ್ ಪಕ್ಷದ ವತಿಯಿಂದ ಜಯಶ್ರೀ ಇಂಗಳೆ ಎಂಬುವವರು ಸ್ಪರ್ಧೆಸಲಿದ್ದು, ಜಾತಿ ಆದಾಯ ಪ್ರಮಾಣ ಇಲ್ಲದೇ ಕಾಂಗ್ರೆಸ್ ಪಕ್ಷಕ್ಕೆ ಹಿನ್ನಡೆ ಆಗಲಿದೆ. ಈ‌ ಹಿನ್ನೆಲೆ ಮಾಜಿ ಸಚಿವರಾದ ಎಚ್​ವೈ ಮೇಟಿ, ಕಾಂಗ್ರೆಸ್ ‌ಪಕ್ಷದ‌ ಜಿಲ್ಲಾಧ್ಯಕ್ಷರಾದ ಎಸ್.ಜಿ.ನಂಜ್ಯಯನಮಠ, ಜಿಪಂ ಅಧ್ಯಕ್ಷೆ ಬಾಯಕ್ಕ ಮೇಟಿ ಹಾಗೂ ವಕ್ತಾರರಾದ ನಾಗರಾಜ ಹದ್ಲಿ ಅವರ ನೇತೃತ್ವದಲ್ಲಿ ಕಚೇರಿಗೆ ಮುತ್ತಿಗೆ ಹಾಕಿ, ತಹಶೀಲ್ದಾರ್​ ಅವರ ಜೊತೆಗೆ ಮಾತಿನ ಚಕಿಮಕಿ‌ ನಡೆಸಿದರು.

ನಾಮ ಪತ್ರ ಸಲ್ಲಿಸುವುದಕ್ಕೆ 3ಬಿ ಮರಾಠಾ ಎಂದು ಜಾತಿಯನ್ನು ನಮೂದಿಸುವಂತೆ ಕಾಂಗ್ರೆಸ್ ಪಕ್ಷದ ಮುಖಂಡರು ಕೇಳುತ್ತಿದ್ದಾರೆ. ಆದರೆ, ತಹಶೀಲ್ದಾರ್​ ಅವರು ,ಈ ಹಿಂದೆ ನಾಮಪತ್ರ ಸಲ್ಲಿಸುವಾಗ ಗೊಂದಳಿ ಜನಾಂಗ ಎಂದು ನಮೂದಿಸಲಾಗಿದೆ, ಈಗ ಮರಾಠಾ ಎಂದು ಬರೆದು ಕೂಡಲು ಆಗುವುದಿಲ್ಲ ಎಂದಿದ್ದಾರೆ.

ಬಿಜಾಪುರ ನಿವಾಸಿ ಆಗಿರುವ ಮಹಿಳೆಯು ಅಂತರ್​ಜಾತಿ‌ ವಿವಾಹ ಮಾಡಿಕೊಂಡಿದ್ದು, ಗಂಡನ ಮನೆಯವರು ಮರಾಠಾ ಜನಾಂಗದವರಾಗಿರುವುದರಿಂದ ಹಾಗೂ ಎಲ್​ಸಿಯಲ್ಲಿ ಮರಾಠಾ ಇರುವುದರಿಂದ ಅದೇ ಜಾತಿಯ ಪ್ರಮಾಣ ಪತ್ರ‌ ನೀಡುವಂತೆ ಕಾಂಗ್ರೆಸ್ ಪಕ್ಷದ ಮುಖಂಡರು, ಒತ್ತಾಯಿಸಿದ್ದಾರೆ.

ಇನ್ನು ಎರಡು ಗಂಟೆಯಲ್ಲಿ ಮೇಲ್ ಮೂಲಕ ಮಾಹಿತಿ ತರಿಸಿಕೊಂಡು ಜಾತಿಯ ಪ್ರಮಾಣ ನೀಡಬೇಕು‌ ಇಲ್ಲವಾದಲ್ಲಿ, ಹಗಲು - ರಾತ್ರಿ ಪ್ರತಿಭಟನೆ ಕುಳಿತುಕೊಳ್ಳುತ್ತೇವೆ ಎಂದು ಕಾಂಗ್ರೆಸ್ ಪಕ್ಷದ ಮುಖಂಡರು ಎಚ್ಚರಿಸಿದ್ದಾರೆ. ಈ ಬಗ್ಗೆ ತಹಶೀಲ್ದಾರರು ಪ್ರತಿಕ್ರಿಯೆ ‌ನೀಡಿ, ಇವರ ಜಾತಿ ಪ್ರಮಾಣ ಪತ್ರದ ಬಗ್ಗೆ ದೂರು ಬಂದ ಹಿನ್ನೆಲೆ ಪರಿಶೀಲನೆ ನಡೆಸಲಾಗುತ್ತದೆ ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ:ಲಾರಿ-ಕಾರು ಮಧ್ಯೆ ಭೀಕರ ಅಪಘಾತ.. ಐವರ ದುರ್ಮರಣ