ನನ್ನದು ಆಡಿಯೋಗಳು ಮಾತ್ರ, ಆದ್ರೆ ಅವರ ವಿಡಿಯೋಗಳಿವೆ, ರಿಲೀಸ್ ಮಾಡಿದ್ರೆ ನೇಣು ಹಾಕಿಕೊಳ್ತಾರೆ: ವೀರಣ್ಣ ಚರಂತಿಮಠ

ನನ್ನದು ಆಡಿಯೋ ಮಾತ್ರ, ವಿಡಿಯೋಗಳಿಲ್ಲ. ಆದ್ರೆ ಅವರ ವಿಡಿಯೋಗಳಿವೆ ಎಂದು ಮಾಜಿ ಶಾಸಕ ವೀರಣ್ಣ ಚರಂತಿಮಠ ಎಚ್ಚರಿಕೆ ಕೊಟ್ಟರು.

ಬಾಗಲಕೋಟೆ: ನನ್ನ ಆಡಿಯೋ ಬಂದಿವೆಯೇ ಹೊರತು ವಿಡಿಯೋ ಏನ್ ಬಂದಿಲ್ಲ ಅಲ್ವಾ?. ಆದ್ರೆ ನನ್ನ ಹತ್ತಿರ ಅವರ ವಿಡಿಯೋಗಳಿವೆ ಎಂದು ಮಾಜಿ ಶಾಸಕ ವೀರಣ್ಣ ಚರಂತಿಮಠ ಹೊಸ ಬಾಂಬ್ ಹಾಕಿದ್ದಾರೆ. ಇಲ್ಲಿನ ಬಸವೇಶ್ವರ ವಿದ್ಯಾವರ್ಧಕ ಸಂಘದ ಸಭಾಭವನದಲ್ಲಿ ಸೋಮವಾರ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ನನ್ನ ಬಳಿ ಇರುವ ವಿಡಿಯೋ ರಿಲೀಸ್ ಮಾಡಿದ್ರೆ, ಅವರು ನೇಣು ಹಾಕಿಕೊಳ್ಳಬೇಕಾಗುತ್ತದೆ ಎಂದು ತಮ್ಮ ವಿರೋಧಿಗಳಿಗೆ ತಿರುಗೇಟು ನೀಡಿದರು.

ತಮ್ಮ ಆಡಿಯೋ ಸಂಭಾಷಣೆ ವೈರಲ್ ಬಗ್ಗೆ ಪ್ರತಿಕ್ರಿಯೆ ನೀಡಿದ ಮಾಜಿ ಶಾಸಕರು, ಮೂರ್ನಾಲ್ಕು ವರ್ಷದ ಹಿಂದಿನ ನನ್ನ ಹಳೆಯ ಆಡಿಯೋ ಬಿಡುಗಡೆ ಮಾಡ್ತಿದಾರೆ. ನನ್ನದು ಬರೀ ಆಡಿಯೋ ಇವೆ, ವಿಡಿಯೋ ಇಲ್ಲ. ಮುಂದೆಯೂ ಕೂಡ ಆಡಿಯೋ ಮಾತ್ರ ಇರುತ್ತವೆ ಹೊರತು ವಿಡಿಯೋ ಇರಲ್ಲ. ಆದ್ರೆ ನನ್ನ ಬಳಿ ಅವರ ವಿಡಿಯೋಗಳಿವೆ ಎಂದು ಎಚ್ಚರಿಕೆ ಕೊಟ್ಟರು.

ಇದೇ ಸಮಯದಲ್ಲಿ, ಕಳೆದ ಜೂನ್ 26ರಂದು ನಡೆದ ಬಿಜೆಪಿ ಗಲಾಟೆ ವಿಚಾರವಾಗಿ ಮಾತನಾಡಿ, ಅಂದಿನ ಕಾರ್ಯಕ್ರಮ ಪ್ರಧಾನಿ ನರೇಂದ್ರ ಮೋದಿಯವರ ಸಾಧನೆ ತಿಳಿಸುವ ಸಮಾವೇಶ ಆಗಿತ್ತು. ಮಾಜಿ ಸಿಎಂ ಬೊಮ್ಮಾಯಿ ಸೇರಿದಂತೆ ಹಲವರು ನಾಯಕರು ಬಂದಿದ್ದರು. ಕಾರ್ಯಕ್ರಮಕ್ಕೆ ತೊಂದರೆ ಆಗಬಾರದು ಎಂಬ ದೃಷ್ಟಿಯಿಂದ ಕೆಲವರನ್ನು ಹೊರಹಾಕಲು ಹೇಳಿದೆ. ಕೆಲವರು ತಾವು ಮಾಡಿದ ತಪ್ಪನ್ನು ಮುಚ್ಚಿ, ಅದನ್ನು ಸಮಾಜದ‌ ಮೇಲೆ ಹಾಕುತ್ತಿದ್ದಾರೆ. ನಾನು ಯಾವ ಸಮಾಜಕ್ಕೂ ಏನೂ ಹೇಳಿಲ್ಲ. ಎಲ್ಲ ಸಮಾಜದವರು ನನಗೆ ಮತ ಹಾಕಿದ್ದಾರೆ. ಬಿಜೆಪಿ ವೈದ್ಯಕೀಯ ಪ್ರಕೋಷ್ಠದ ಅಧ್ಯಕ್ಷ ಡಾ.ಶೇಖರ್ ಮಾನೆಗೂ ನನಗೂ ವೈಯಕ್ತಿಕ ಏನೂ ಇಲ್ಲ. ಪಕ್ಷ ವಿರೋಧಿ ಚಟುವಟಿಕೆ ಮಾಡಿದ್ದರಿಂದ ಕಾರ್ಯಕ್ರಮಕ್ಕೆ ತೊಂದರೆ ಅಗಬಾರದೆಂದು ಕಾರ್ಯಕ್ರಮದಿಂದ ಹೊರ ಹಾಕಿದ್ದೇವೆ ಸ್ಪಷ್ಟನೆ ನೀಡಿದರು.

ಬಿಜೆಪಿಯಲ್ಲಿ ಯಾವುದೇ ಬಣಗಳಿಲ್ಲ, ಈ ಬಣದ ವ್ಯವಹಾರವನ್ನು ವಿಧಾನ ಪರಿಷತ್ ಸದಸ್ಯರು ಮಾಡುತ್ತಾರೆ ಎಂದು ಹೆಸರೇಳದೆ ಎಂಎಲ್​ಸಿ ಪಿ.ಹೆಚ್. ಪೂಜಾರ ವಿರುದ್ಧ ಹರಿಹಾಯ್ದರು. ನನ್ನ ಕಾಲದಲ್ಲಿ ಕಾರ್ಯಕರ್ತರಿಗೆ ಸಿಕ್ಕಷ್ಟು ಗೌರವ ಯಾವ ಸಮಯದಲ್ಲೂ ಸಿಕ್ಕಿಲ್ಲ. ನಾವು ನೂರೆಂಟು ಸಂಘ ಸಂಸ್ಥೆ ಕಟ್ಟಿ, ಅಭಿವೃದ್ಧಿ ಕೆಲಸ‌ ಮಾಡಿ, ಕಾರ್ಯಕರ್ತರನ್ನು ವಿಶ್ವಾಸಕ್ಕ ತೆಗೆದುಕೊಂಡು ಕೆಲಸ ಮಾಡುತ್ತೇನೆ. ಮೊದಲು ನೀವು ಆತ್ಮಾವಲೋಕನ ಮಾಡಿಕೊಳ್ಳಿ.

ಪಕ್ಷ ಸೋಲಿಗೆ ಪಕ್ಷೇತರ ಅಭ್ಯರ್ಥಿ ಕಾರಣವಲ್ಲ. ಬಿಜೆಪಿ ಪಕ್ಷದ ಮುಖಂಡರು ತೆಗೆದುಕೊಂಡು ಕೆಲ ನಿರ್ಧಾರಗಳು ಹಾಗೂ ಕಾಂಗ್ರೆಸ್ ಪಕ್ಷದ ಐದು ಗ್ಯಾರಂಟಿ ಯೋಜನೆಗಳಿಂದ ಪಕ್ಷ ಸೋತಿದೆ. ಜಗದೀಶ ಶೆಟ್ಟರ, ಕೆ.ಎಸ್. ಈಶ್ವರಪ್ಪ ಹಾಗೂ ಲಕ್ಷ್ಮಣ ಸವದಿಗೆ ಟಿಕೆಟ್ ನೀಡದೇ ಇರುವುದು ಹಾಗೂ ಮೀಸಲಾತಿ ವಿಚಾರ ಗೊಂದಲ ಸೃಷ್ಟಿಯಾಗಿದ್ದು ಕೂಡ ಬಿಜೆಪಿ ಸೋಲಿಗೆ ಪ್ರಮುಖ ಕಾರಣಗಳಾಗಿವೆ ಎಂದು ಅವರು ತಿಳಿಸಿದರು.

ವರ್ಗಾವಣೆಗೆ ಹಣ ಪಡೆದಿದ್ದರೆ ಸಗಣಿ ತಿಂದಂತೆ:ನಾನು ಶಾಸಕನಾಗಿದ್ದ ಸಮಯದಲ್ಲಿ ವರ್ಗಾವಣೆಗಾಗಿ ಆಧಿಕಾರಿಗಳಿಂದ ಹಣ‌ ತೆಗೆದುಕೊಂಡಲ್ಲಿ ಆ ಅಧಿಕಾರಿಯ ಸಗಣಿ ತಿಂದಂತೆ ಎಂದು ಖಾರವಾಗಿ ನುಡಿದರು. ವರ್ಗಾವಣೆಗಾಗಿ ನಾನೂ ಯಾವತ್ತೂ ಹಣ ಪಡೆದಿಲ್ಲ ಎಂದು ಸ್ಪಷ್ಟಪಡಿಸಿದರು. ಆದರೆ ಈಗ ವರ್ಗಾವಣೆಗೆ ಏನು ನಡೆಯುತ್ತಿದೆ ಎಂಬುದು ಎಲ್ಲರಿಗೂ ಗೊತ್ತಿದೆ ಎಂದು ಅಸಮಾಧಾನ ಹೊರಹಾಕಿದರು.

ಇದನ್ನೂ ಓದಿ: ನನ್ನ ಕಿಂಡಲ್ ಮಾಡಿದ್ರೆ ಅದರ ಕಥೆಯೇ ಬೇರೆ ಆಗುತ್ತದೆ: ಯತ್ನಾಳ್‌ಗೆ ನಿರಾಣಿ ಪರೋಕ್ಷ ಎಚ್ಚರಿಕೆ