ವೈದ್ಯ, ವಕೀಲರಿಗೆ ಕೊರೊನಾ ಪಾಸಿಟಿವ್.. ಮಾಜಿ ಸಚಿವ ಮೇಟಿ ಅವರಿಗೂ ಕೊರೊನಾ ಭೀತಿ

ಸೋಂಕಿತ ವೈದ್ಯರ ನಿವಾಸದ ಬಳಿ ಮಾಜಿ ಸಚಿವ ಹೆಚ್‌ ವೈ ಮೇಟಿ ಮನೆ‌ ಇದ್ದು, ಎರಡು ದಿನಗಳ ಹಿಂದಷ್ಟೆ ವೈದ್ಯ ಮೇಟಿ ಅವರೊಂದಿಗೆ ಕೂತು ಮಾತನಾಡಿದ್ದರು ಎನ್ನಲಾಗಿದೆ. ಹಾಗಾಗಿ ಮಾಜಿ ಸಚಿವರಿಗೆ ಕ್ವಾರಂಟೈನ್​ನಲ್ಲಿರುವಂತೆ ತಾಲೂಕು ಆಡಳಿತ ಸೂಚನೆ ನೀಡಿದೆ..

ಬಾಗಲಕೋಟೆ :ನಗರದ ಖಾಸಗಿ ವೈದ್ಯ ಹಾಗೂ ವಕೀಲರೊಬ್ಬರಿಗೆ ಕೊರೊನಾ ಸೋಂಕು ಧೃಡ ‌ಪಟ್ಟಿರುವ ಹಿನ್ನೆಲೆ ಆಯಾ ಪ್ರದೇಶದ ಜನತೆ ಆತಂಕ ಪಡುವಂತಾಗಿದೆ. ಮಾತ್ರವಲ್ಲ ವೈದ್ಯನ ಸಂಪರ್ಕದಿಂದಾಗಿ ಮಾಜಿ ಸಚಿವರಿಗೂ ಕೊರೊನಾ ಆತಂಕ ಉಂಟಾಗಿದೆ.

ಹಳೇ ಬಾಗಲಕೋಟೆಯಲ್ಲಿ ಕ್ಲಿನಿಕ್ ನಡೆಸುತ್ತಿದ್ದ ವೈದ್ಯ ಪ್ರತಿನಿತ್ಯ 40 ರಿಂದ 50 ರೋಗಿಗಳನ್ನು ಪರೀಕ್ಷಿಸುತ್ತಿದ್ದರು ಎನ್ನಲಾಗಿದೆ. ಇದೀಗ ವೈದ್ಯರಿಗೆ ಸೋಂಕು ಬಂದಿರುವುದರಿಂದ ಚಿಕಿತ್ಸೆ ಪಡೆದವ್ರೂ ಆತಂಕ ಪಡುವಂತಾಗಿದೆ. ಜೊತೆಗೆ ವಿದ್ಯಾಗಿರಿಯ 17ನೇ ಕ್ರಾಸ್​​ನ ವಕೀಲರೊಬ್ಬರಿಗೂ ಸೋಂಕು ಪತ್ತೆಯಾದ ಹಿನ್ನೆಲೆ ‌ಆ ಪ್ರದೇಶವನ್ನು ಸೀಲ್​ಡೌನ್ ಮಾಡ್ಲಾಗಿದೆ.

ಸೋಂಕಿತ ವೈದ್ಯರ ನಿವಾಸದ ಬಳಿ ಮಾಜಿ ಸಚಿವ ಹೆಚ್‌ ವೈ ಮೇಟಿ ಮನೆ‌ ಇದ್ದು, ಎರಡು ದಿನಗಳ ಹಿಂದಷ್ಟೆ ವೈದ್ಯ ಮೇಟಿ ಅವರೊಂದಿಗೆ ಕೂತು ಮಾತನಾಡಿದ್ದರು ಎನ್ನಲಾಗಿದೆ. ಹಾಗಾಗಿ ಮಾಜಿ ಸಚಿವರಿಗೆ ಕ್ವಾರಂಟೈನ್​ನಲ್ಲಿರುವಂತೆ ತಾಲೂಕು ಆಡಳಿತ ಸೂಚನೆ ನೀಡಿದೆ.

ಈ ಕುರಿತು ಈಟಿವಿ ಭಾರತದೊಂದಿಗೆ ಮಾತನಾಡಿದ ಹೆಚ್ ವೈ ಮೇಟಿ ವೈದ್ಯರು ಯಾವುದೇ ಸೂಚನೆ ನೀಡಿಲ್ಲ. ಕೊರೊನಾ ಬಂದ ವೈದ್ಯರೊಂದಿಗೆ ಸಂಪರ್ಕ ಹೊಂದಿಲ್ಲ ಎಂದು ತಿಳಿಸಿದ್ದಾರೆ.