Tokyo Olympics : ಏರ್ ಪಿಸ್ತೂಲ್ ಕ್ವಾಲಿಫಯರ್ ಸುತ್ತಿನಲ್ಲಿ ಹೊರಬಿದ್ದ ಭಾಕರ್, ದೇಸ್ವಾಲ್

ಟೋಕಿಯೋ ಒಲಿಂಪಿಕ್ಸ್​ನ ಎರಡನೇ ದಿನ ಮಹಿಳಾ ಏರ್ ಪಿಸ್ತೂಲ್ ಕ್ವಾಲಿಫಯರ್ ಸುತ್ತಿನಲ್ಲಿ ಭಾರತೀಯ ಶೂಟರ್​ಗಳು ಹಿನ್ನಡೆ ಅನುಭವಿಸಿದ್ದಾರೆ.

ಟೋಕಿಯೋ :ಭಾರತೀಯ ಶೂಟರ್​ಗಳಾದ ಮನು ಭಾಕರ್ ಮತ್ತು ಯಶಸ್ವಿನಿ ದೇಸ್ವಾಲ್ ಟೋಕಿಯೋ ಒಲಿಂಪಿಕ್ಸ್​​ನ ಮಹಿಳೆಯರ 10 ಮೀಟರ್ ಏರ್ ಪಿಸ್ತೂಲ್ ಕ್ವಾಲಿಫಯರ್ ಸುತ್ತಿನಲ್ಲಿ ಪರಾಭವಗೊಂಡಿದ್ದಾರೆ.

ಭಾಕರ್ 12 ನೇ ಸುತ್ತಿನಲ್ಲಿ ಕೊನೆಗೊಳಿಸಿದರೆ, ದೇಸ್ವಾಲ್ 13 ನೇ ಸುತ್ತಿನಲ್ಲಿ ಕೊನೆಗೊಳಿಸಿದರು. 2019ರ ಐಎಸ್​ಎಸ್​ಎಫ್​ ಕಪ್​ನಲ್ಲಿ ಚಿನ್ನದ ಪದಕ ಮುಡಿಗೇರಿಸಿಕೊಂಡಿದ್ದ ದೇಸ್ವಾಲ್ ಸಂಭವನೀಯ 600 ಸ್ಕೋರ್​ನಲ್ಲಿ 574 ಪಡೆದಿದ್ದಾರೆ.

ಭಾಕರ್ ಒಟ್ಟು 575 ಸ್ಕೋರ್ ದಾಖಲಿಸಿದ್ದು, ವಿವಿಧ ಸುತ್ತುಗಳಲ್ಲಿ 98,95, 94, 95, 95 ಸ್ಕೋರ್​ ಮಾಡಿದ್ದಾರೆ.

ಮೊದಲ ಸುತ್ತಿನಲ್ಲಿ 98 ಪಾಯಿಂಟ್ಸ್ ಗಳಿಸಿದ್ದ ಭಾಕರ್ ಮೂರನೇ ಶ್ರೇಯಾಂಕ ಪಡೆದಿದ್ದರು, ಎರಡನೇ ಸುತ್ತಿನಲ್ಲಿ 20 ಶಾಟ್ಸ್​​ಗಳನ್ನು ಹೊಡೆದ ಭಾಕರ್​ 95 ಸ್ಕೋರ್ ಮಾಡಿದರು. ಮೂರನೇ ಸುತ್ತಿಗೆ ಅವರ ಸ್ಕೋರ್ 94 ಕ್ಕೆ ಇಳಿಯಿತು.

ಎರಡನೇ ಸುತ್ತಿನಲ್ಲಿ ಗನ್ ಸಮಸ್ಯೆ ಎದುರಾಗಿದ್ದರಿಂದ ಮೂರನೇ ಸುತ್ತಿನಲ್ಲಿ ಮಾಜಿ ವಿಶ್ವ ಕಪ್ ಚಿನ್ನದ ಪದಕ ವಿಜೇತೆಯ ಪ್ರದರ್ಶನ ಕುಂಠಿತಗೊಂಡಿತು.