Tokyo Olympics: 14ನೇ ದಿನ ಪದಕ ಗೆಲ್ಲಬಹುದಾದ ಭಾರತೀಯ ಕ್ರೀಡಾಪಟುಗಳಿವರು..

ಭಾರತದ ಹಾಕಿ ತಂಡ ಮತ್ತು ಕುಸ್ತಿಪಟು ದೀಪಕ್​ ಪೂನಿಯಾ ಕಂಚಿಗಾಗಿ ನಡೆಯುವ ಪಂದ್ಯದಲ್ಲಿ ಕಣಕ್ಕಿಳಿಯಲಿದ್ದಾರೆ. ಮಹಿಳೆಯರ​ 56 ಕೆಜಿ ವಿಭಾಗದಲ್ಲಿ ಟಾಪ್ ಸೀಡ್ ಆಗಿರುವ ವಿನೇಶ್ ಫೋಗಟ್​ ತಮ್ಮ ಒಲಿಂಪಿಕ್ಸ್ ಅಭಿಯಾನವನ್ನು ಇಂದು ಆರಂಭಿಸಲಿದ್ದಾರೆ.

ಟೋಕಿಯೋ: ಒಲಿಂಪಿಕ್ಸ್​ನಲ್ಲಿ ಭಾರತವು ಇಂದು 14 ದಿನದ ಸ್ಪರ್ಧೆಗಳಲ್ಲಿ ಭಾಗವಹಿಸುತ್ತಿದೆ. ಇಂದು ಚಿನ್ನದ ಪದಕ ಭರವಸೆ ಮೂಡಿಸಿರುವ ರವಿ ಕುಮಾರ್ ದಹಿಯಾ ಮತ್ತು ಮಹಿಳಾ ಸ್ಟಾರ್ ಕುಸ್ತಿಪಟು ವಿನೇಶ್ ಫೋಗಟ್​ ಅಖಾಡಕ್ಕೆ ಇಳಿಯುತ್ತಿದ್ದಾರೆ.

ಬುಧವಾರ ರವಿ ಕುಮಾರ್ ದಹಿಯಾ ಆಡಿದ ಮೂರು ಪಂದ್ಯಗಳಲ್ಲೂ ಪ್ರಾಬಲ್ಯ ಸಾಧಿಸಿ 57ಕೆಜಿ ವಿಭಾಗದಲ್ಲಿ ಫೈನಲ್​ ಪ್ರವೇಶಿಸಿದ್ದಾರೆ. ಇವರ ಜೊತೆಗೆ ಭಾರತದ ಹಾಕಿ ತಂಡ ಮತ್ತು ದೀಪಕ್​ ಪೂನಿಯಾ ಕಂಚಿಗಾಗಿ ನಡೆಯುವ ಪಂದ್ಯದಲ್ಲಿ ಕಣಕ್ಕಿಳಿಯಲಿದ್ದಾರೆ.

ರವಿ ಕುಮಾರ್ ದಹಿಯಾ-ಕುಸ್ತಿ:

ದಹಿಯಾ ಈಗಾಗಲೇ ಫೈನಲ್ ಪ್ರವೇಶಿಸಿ ಬೆಳ್ಳಿ ಪದಕ ಖಚಿತಪಡಿಸಿದ್ದಾರೆ. ರವಿಕುಮಾರ್ ಅವರ ಸ್ವಗ್ರಾಮದಲ್ಲಿ ಈಗಾಗಲೇ ಸಂಭ್ರಮ ಮನೆ ಮಾಡಿದೆ. ರವಿ ಕುಮಾರ್ ಭಾರತಕ್ಕೆ ಒಲಿಂಪಿಕ್ಸ್​ನಲ್ಲಿ 5ನೇ ಪದಕ ಮತ್ತು 2020ರಲ್ಲಿ 4ನೇ ಪದಕವನ್ನು ಖಚಿಪಡಿಸಿದ್ದಾರೆ. ಒಲಿಂಪಿಕ್ಸ್​ನಲ್ಲಿ ಫೈನಲ್​ಗೆ ಅರ್ಹತೆ ಪಡೆದ ಭಾರತದ ಎರಡನೇ ಕುಸ್ತಿಪಟು ಎನಿಸಿಕೊಂಡಿರುವ ರವಿ ಕುಮಾರ್ ದಹಿಯಾ ​ಇಂದು ನಡೆಯುವ ಫೈನಲ್​ನಲ್ಲಿ ರಷ್ಯನ್ ಒಲಿಂಪಿಕ್ ಸಮಿತಿಯ ಜೌರ್ ಉಗುವ್​ ಅವರ ಸವಾಲು ಎದುರಿಸಲಿದ್ದಾರೆ.

ವಿನೇಶ್ ಫೋಗಟ್​:

ಮಹಿಳೆಯರ​ 56 ಕೆಜಿ ವಿಭಾಗದಲ್ಲಿ ಟಾಪ್ ಸೀಡ್ ಆಗಿರುವ ವಿನೇಶ್ ಫೋಗಟ್​ ತಮ್ಮ ಒಲಿಂಪಿಕ್ಸ್ ಅಭಿಯಾನವನ್ನು ಇಂದು ಆರಂಭಿಸಲಿದ್ದಾರೆ. ಏಷ್ಯನ್ ಚಾಂಪಿಯನ್ ಭಾರತಕ್ಕೆ ಚಿನ್ನದ ಪದಕ ತಂದುಕೊಡಬಲ್ಲ ಬಹುದೊಡ್ಡ ನಿರೀಕ್ಷೆಯಾಗಿದ್ದಾರೆ. ಅವರು ಸೋಫಿಯಾ ಮ್ಯಾಟ್ಸನ್ ಅವರ ವಿರುದ್ಧ ಕಣಕ್ಕಿಳಿಯಲಿದ್ದಾರೆ.

ಹಾಕಿ ತಂಡ:

ಬರೋಬ್ಬರಿ 49 ವರ್ಷಗಳ ಬಳಿಕ ಒಲಿಂಪಿಕ್ಸ್​ನಲ್ಲಿ ಸೆಮಿಫೈನಲ್ ಪ್ರವೇಶಿಸಿದ್ದ ಭಾರತ ಹಾಕಿ ತಂಡ ಮಂಗಳವಾರ ನಡೆದ ನಾಲ್ಕರ ಘಟ್ಟದಲ್ಲಿ ಬೆಲ್ಜಿಯಂ ವಿರುದ್ಧ 2-5ರಲ್ಲಿ ಸೋಲು ಕಂಡು ನಿರಾಸೆ ಅನುಭವಿಸಿದೆ. ಆದರೆ, ಇಂದು ಸೆಮಿಫೈನಲ್​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೋಲು ಕಂಡಿರುವ ಜರ್ಮನಿ ವಿರುದ್ಧ ಸೆಣಸಾಡಲಿದೆ.

ದೀಪಕ್ ಪೂನಿಯಾ

87 ಕೆಜಿ ವಿಭಾಗದಲ್ಲಿ ಸೆಮಿಫೈನಲ್​ ಪ್ರವೇಶಿಸಿ ಸೋಲು ಕಂಡಿರುವ 22 ವರ್ಷದ ಯುವ ಕುಸ್ತಿಪಟು ಕಂಚಿನ ಪದಕಕ್ಕಾಗಿ ರೆಪ್​ಚೇಜ್​ನಲ್ಲಿ ಗೆದ್ದುಬರುವ ಕುಸ್ತಿಪಟುವಿನೊಂದಿಗೆ ಸೆಣಸಾಡಲಿದ್ದಾರೆ.

ಇದನ್ನೂ ಓದಿ:Tokyo Olympics: ಎದುರಾಳಿ ಕಚ್ಚಿದ್ರೂ ಧೃತಿಗೆಡದೆ ಗೆದ್ದ ರವಿ... ಕುಸ್ತಿಪಟುಗೆ ಭೇಷ್​ ಎಂದ ಸೆಹ್ವಾಗ್