ಬಾಕ್ಸಿಂಗ್​ನಲ್ಲಿ ಕ್ವಾರ್ಟರ್​ ಫೈನಲ್​ಗೆ ಲಗ್ಗೆಯಿಟ್ಟ ಭಾರತ.. ಜಮೈಕಾದ ಬಾಣಸಿಗನನ್ನು ಮಣಿಸಿದ​ ಸತೀಶ್​ ಕುಮಾರ್​!

ತನ್ನ ಚೊಚ್ಚಲ ಒಲಿಂಪಿಕ್​ ಕ್ರೀಡಾಕೂಟದಲ್ಲಿ ಜಮೈಕಾ ಆಟಗಾರನನ್ನು ಸೋಲಿಸಿದ ಭಾರತದ ಸತೀಶ್​ ಕುಮಾರ್​ ಕ್ವಾರ್ಟರ್​ ಫೈನಲ್​ಗೆ ಲಗ್ಗೆಯಿಟ್ಟದ್ದಾರೆ.

ಟೋಕಿಯೋ:ಇಂದು ನಡೆದ ಬಾಕ್ಸಿಂಗ್​ ಪಂದ್ಯದಲ್ಲಿ ಭಾರತೀಯ ಬಾಕ್ಸರ್ ಸತೀಶ್ ಕುಮಾರ್ +91 ಕೆಜಿ ವಿಭಾಗದಲ್ಲಿ ಜಮೈಕಾ ಆಟಗಾರ ರಿಕಾರ್ಡೊ ಬ್ರೌನ್​ ಅವರನ್ನು​ ಸೋಲಿಸಿದರು. ಈ ಮೂಲಕ ಸತೀಶ್​ ತಮ್ಮ ಚೊಚ್ಚಲ ಒಲಿಂಪಿಕ್ ಕ್ರೀಡಾಕೂಟದಲ್ಲಿ ಕ್ವಾರ್ಟರ್ ಫೈನಲ್​ ತಲುಪಿದ್ದಾರೆ.

ಎರಡು ಬಾರಿಯ ಏಷ್ಯನ್ ಚಾಂಪಿಯನ್‌ಶಿಪ್‌ನ ಕಂಚಿನ ವಿಜೇತ ಸತೀಶ್​ಗೆ ಪಂದ್ಯದ ಉದ್ದಕ್ಕೂ ಬ್ರೌನ್‌ರ ಕಳಪೆ ಆಟವೇ ಗೆಲುವಿಗೆ ಸಹಾಯಕವಾಯಿತು. ಹೀಗಾಗಿ ಅವರು 4-1 ಪಾಯಿಂಟ್​ ಗಳಿಸುವ ಮೂಲಕ ತಮ್ಮ ಚೊಚ್ಚಲ ಒಲಿಂಪಿಕ್​ ಕ್ರೀಡಾಕೂಟದ ಬಾಕ್ಸಿಂಗ್​ನಲ್ಲಿ​ ಕ್ವಾರ್ಟರ್​ ಫೈನಲ್​ಗೆ ಲಗ್ಗೆ ಇಟ್ಟರು.

ಆಗಸ್ಟ್​ 1ರಂದು ವಿಶ್ವದ ಮತ್ತು ಏಷ್ಯಾದ ಚಾಂಪಿಯನ್ ಉಜ್ಬೇಕಿಸ್ತಾನದ ಬಖೋದಿರ್ ಜಲೋಲೋವ್ ವಿರುದ್ಧ 2018 ರ ಕಾಮನ್​ವೆಲ್ತ್​ ಕ್ರೀಡಾಕೂಟದಲ್ಲಿ ಬೆಳ್ಳಿ ಪದಕ ವಿಜೇತ ಸತೀಶ್​ ಕುಮಾರ್​ ಕಣಕ್ಕಿಳಿಯಲಿದ್ದಾರೆ. ಜಲೋಲೋವ್ ಅಜರ್ಬೈಜಾನ್‌ನ ಮಹಮ್ಮದ್ ಅಬ್ದುಲ್ಲಾಯೇವ್​ ಅವರನ್ನು 5-0 ಪಾಯಿಂಟ್​ ಮೂಲಕ ಸೋಲಿಸಿ ಕ್ವಾರ್ಟರ್​ ಫೈನಲ್​ಗೆ ಪ್ರವೇಶ ಪಡೆದಿದ್ದಾರೆ.

31 ವರ್ಷದ ಬ್ರೌನ್ 1996 ರಿಂದ ಕ್ರೀಡಾಕೂಟಕ್ಕೆ ಅರ್ಹತೆ ಪಡೆದ ತನ್ನ ದೇಶದ ಮೊದಲ ಬಾಕ್ಸರ್​ ಆಗಿದ್ದಾರೆ. ಇವರು ಉದ್ಘಾಟನಾ ಸಮಾರಂಭದಲ್ಲಿ ಜಮೈಕಾದ ಧ್ವಜ ಹಿಡಿದು ಪ್ರತಿನಿಧಿಸಿದ್ದರು.

ಬ್ರೌನ್ 2014 ರವರೆಗೆ ಜಮೈಕಾದಲ್ಲಿ ಬಾಣಸಿಗನಾಗಿ ಕೆಲಸ ಮಾಡುತ್ತಿದ್ದರು. ಈಗ ಕೆನಡಾ ಮೂಲದ ಸಾವಯವ ಜ್ಯೂಸ್ ಕಂಪನಿಯಾದ 'ಸೆನ್ಸಿ ಜ್ಯೂಸ್'ನ ಸಹ ಸಂಸ್ಥಾಪಕರಾಗಿದ್ದಾರೆ.

ಇಂದು ಮಧ್ಯಾಹ್ನ ಮೇರಿ ಕೋಮ್​​ ವರ್ಸಸ್​​ ಲೂರಿನಾ ಮಧ್ಯೆ ಬಾಕ್ಸಿಂಗ್​ ಪಂದ್ಯ ನಡೆಯಲಿದೆ.