ಕ್ರಿಕೆಟ್​ ವಿಶ್ವಕಪ್​ ಗೆಲುವಿಗಿಂತಲೂ ಹಾಕಿ ಜಯ ಮಿಗಿಲಾದದ್ದು ಎಂದ ಗಂಭೀರ್​... ಕ್ರೀಡಾಭಿಮಾನಿಗಳ ಆಕ್ರೋಶ

ಭಾರತದ ಪುರುಷರ ಹಾಕಿ ತಂಡ ಗೆಲುವು ಸಾಧಿಸುತ್ತಿದ್ದಂತೆ ಟೀಂ ಇಂಡಿಯಾ ಮಾಜಿ ಕ್ರಿಕೆಟರ್ ಗೌತಮ್​ ಗಂಭೀರ್ ಮಾಡಿರುವ ಟ್ವೀಟ್​ವೊಂದು ಇದೀಗ ಚರ್ಚೆಗೆ ಗ್ರಾಸವಾಗಿದೆ.

ನವದೆಹಲಿ:ಟೋಕಿಯೋ ಒಲಿಂಪಿಕ್ಸ್​​ನಲ್ಲಿ ಭಾರತದ ಪುರುಷರ ಹಾಕಿ ತಂಡ ಜರ್ಮನಿ ವಿರುದ್ಧ 5-4 ಅಂತರದಿಂದ ಗೆಲುವು ದಾಖಲು ಮಾಡುವ ಮೂಲಕ ಕಂಚಿನ ಪದಕಕ್ಕೆ ಮುತ್ತಿಕ್ಕಿದೆ. ಸುಮಾರು 41 ವರ್ಷಗಳ ಬಳಿಕ ಭಾರತಕ್ಕೆ ಹಾಕಿಯಲ್ಲಿ ಪದಕ ಸಿಕ್ಕಿದ್ದು, ಇಡೀ ದೇಶವೇ ಹೆಮ್ಮೆ ಪಡುತ್ತಿದೆ. ಇದೇ ವಿಚಾರವನ್ನಿಟ್ಟುಕೊಂಡು ಟೀಂ ಇಂಡಿಯಾ ಮಾಜಿ ಕ್ಯಾಪ್ಟನ್​ ಗಂಭೀರ್​ ಟ್ವೀಟ್​ ಮಾಡಿದ್ದು, ಅದಕ್ಕೆ ಆಕ್ರೋಶ ವ್ಯಕ್ತವಾಗಿದೆ.

ಟೀಂ ಇಂಡಿಯಾ ಜರ್ಮನಿ ವಿರುದ್ಧ ಗೆಲುವು ದಾಖಲು ಮಾಡುತ್ತಿದ್ದಂತೆ ಟ್ವೀಟ್ ಮಾಡಿರುವ ಬಿಜೆಪಿ ಸಂಸದ ಗೌತಮ್​ ಗಂಭೀರ್​, 1983, 2007 ಹಾಗೂ 2011ರ ಕ್ರಿಕೆಟ್​​ ವಿಶ್ವಕಪ್ ಗೆಲುವುಗಳನ್ನ ಮೆರೆತು ಬಿಡಿ. ಈ ಗೆಲುವುಗಿಂತಲೂ ಹಾಕಿ ಗೆಲುವು ಮಿಗಿಲಾದದ್ದು. ಭಾರತೀಯ ಹಾಕಿ ನಮ್ಮ ಹೆಮ್ಮೆ ಎಂದು ಟ್ವೀಟ್​ ಮಾಡಿದ್ದಾರೆ.

2007 ಹಾಗೂ 2011ರ ವಿಶ್ವಕಪ್​ ತಂಡದ ಸದಸ್ಯನಾಗಿದ್ದ ಗೌತಮ್​ ಗಂಭೀರ್​ ಈ ರೀತಿಯ ಹೇಳಿಕೆ ಇದೀಗ ಚರ್ಚೆಗೆ ಗ್ರಾಸವಾಗಿದ್ದು, ಕ್ರೀಡಾಭಿಮಾನಿಗಳ ಆಕ್ರೋಶಕ್ಕೆ ಕಾರಣವಾಗಿದೆ. ಎರಡು ಕ್ರೀಡೆ ಹೋಲಿಕೆ ಮಾಡಿ ಮಾತನಾಡುವುದು ಸರಿಯಲ್ಲ. ಈ ಹಿಂದೆ ವಿಶ್ವಕಪ್​ ತಂಡದ ಸದಸ್ಯರಾಗಿ ನೀವೂ ಈ ರೀತಿಯಾಗಿ ಮಾತನಾಡುವುದು ಎಷ್ಟರ ಮಟ್ಟಿಗೆ ಸರಿ ಎಂದು ಪ್ರಶ್ನೆ ಮಾಡಿದ್ದಾರೆ. ಮತ್ತೊಬ್ಬರು ಟ್ವೀಟ್​ ಮಾಡಿ, ಸರ್​ ನಿಮ್ಮ ಈ ಟ್ವೀಟ್​​ ರಾಜಕಾರಣಿಗಳ ರೀತಿಯಲ್ಲಿ ಇದೆ. ಇನ್ನೊಬ್ಬರ ಸಾಧನೆ ಕಡಿಮೆಯಾಗಿರುವುದಿಲ್ಲ ಎಂದಿದ್ದಾರೆ.

ಇದನ್ನೂ ಓದಿರಿ:ಬೃಹತ್​ ಮೊಸಳೆ ಹೆಗಲ ಮೇಲೆ ಹೊತ್ತು ತಂದ ಜನರು... ವಿಡಿಯೋ ವೈರಲ್​!